Read Vaiphei DAN LEKHABU 2 Bible Online

DAN LEKHABU 2 - Vaiphei bible

DAN LEKHABU 2

¹LALPA‘n a gen gual in, Tuipi San lam zuan in, gamthip ah chun ka kitawl lut tau ah; Seir tâng ah chun sawt tak ka vâkvâi tau a.

²Ziaphatchun, LALPA‘n ka kiang in:

³“Zia tânggam ah hin la vak kual sawt ta law tau hi. Mallam zuan in kipandok unla,

⁴zia gual hin mipite thu pia’n: La chanauteu, Esau suante chênna gam Seir tânggam hawtheng malam ding la hitau a. Amau chun nang uh a la huphul ma ma ding a hiu; ziaziakchun, chingthei tak in um unla,

⁵amau chu do him him kiu in, Seir tânggam hi Esau suante ka piaksa ahi tâk ziakin, a gam uh khutpêk tia le nang uh hun pelo ding ka hi’ngal a.

⁶A buu chu sum ah chaw’n la nêk ding uh ahi; a tui uh la dawn ding uh le sum ah la kichawk ding uh ahi.

⁷La thil bawlnau taphot in LALPA‘n mal a hun jawl ma ma ah; zia gamthip lian tak la hawthen danteu le a he sik sek hi. Zia kum sawmli sung ving veng hi LALPA la Pathian un a hun umpi zing ah, bangma tâksap le la nei puau,” ti in.

⁸Tichun, ka chanau uh Esau suante chênna Seir gam haw malam in Arabah lam zuan in, Elath leh Ezion-geber nusia in Moab gam ka paltheng tau a.

⁹LALPA‘n ka kiang in, “Moabte chu subuai kiu inla, kidopi ding inle chok tho kiu in; Ar gam hi Lot suante â ding ah ka piaksa ahi tâk ziakin, a gam uh chu neuchale nang uh hun pelo ding ka hi,” ti’n a gen tai.

¹⁰(Zia gam ah chun tu’ma lam in Anakimte gual ah milian leh sâng Emimte tam tak a la chêng tau a.

¹¹Amau chule Anakimte gual tho ah Rephaim ti ah ko a hiu ah; ahi’n, Moabte chun vang Emimte ti’n a ko sek ui.

¹²Malai ah Seir ah chun Horimte a la chêng ua, LALPA‘n Israelte gam luana ding ah a piak gual tho ah hin, Esau suante chun a gam ah chêngte chu that gam in, a khuau haw chule lua in, a la suandok tau hi).

¹³“Tu’hin, Wadi Zered lui chu kân dingin kipandok tau in,” a tia. Tichun, Wadi Zered lui chu ka pal gâlkâi tau a.

¹⁴Chun, Kadesh-barnea ah kipat Zered lui ka pal kâi tiang uh chu kum sawmthum leh giat a hita; zia nung ah chun LALPA‘n gâldo thei zosia a thigam malam ding uh ahi ti thu a la tiam dungzui in, amau khang ah mi zosia chu a thi zo man tau a.

¹⁵A dik tak in, LALPA‘n amau haw a sukmanthai suak masia, a khut chu amau do in a lek zing a.

¹⁶A lak ua gâldo ah pangte a thigam zaw phat un,

¹⁷LALPA‘n ka kiang in:

¹⁸“Tu’ni hin Ar mun ah Moab gamgi kân ah chia ding la hitau.

¹⁹Ammonte gamgi la hung tun phat ua leh, amau chu hi’buai kiu inla, kidopi diak kiu in; Ammonte gam hi Lot suante â ding ah ka piaksa ahi tâk ziakin, a gam uh chu neuchale nang uh hun pelo ding ka hi,” a ti hen.

²⁰(Zia gam chule Rephate chênna, ti ahi. Ammonte’n Zam-zummin tileule, zia tak ah chun Rephate a la chêng ua;

²¹amau chu Anakte gual tho ah sâng leh lian tam tak a hiu ah. Ahi’n, Ammon mite’n a suandok ua, amau umna mun ah a chên den theina dingin LALPA‘n a ma âng un a la hi’gam dik dek tai.

²²Zia gual tho ah chun, Esau suante’n le Seir gam chu a la suandok ua, tu’ni tiang ah a lua den theina ding un, Horte a la that gam ah, a la nawdok him kha a hiu a.

²³Zia gual ma chun, Gaza khawpi tuam ah Avvimte chule Kaphtorte ah kipat hung pawtdok Kaphtor te’n that gam in, a munteu chu suandok in, a chêngden tau ahi).

²⁴“Arnon lui pal gâl kâi dingin kipandok tau in. En un, Heshbon khua Amorte lengpa Sihon leh a gam chu la khut un ka hun petai. Ama chu do in, a gam chu lua pan ngal tau in.

²⁵Tu’ni hin, van nuai ah mi zosiate â ding ah tizat leh lau in hun siam ding ka hi; la chanchin a het phat phat ua leh, lau in kithing intiu in, nanghaw ziakin lungdong tak in um ta’n au,” a tia.

²⁶Tichun, Kedemoth gamthip ah kipat in Heshbon lengpa Sihon kiang ah, zia gual hin kilemna thu tut dingin palai ka sawl a:

²⁷“La gam sung ei hawthensak inla, lamlian bep zui ing kau; changlam a hem, veilam a hem ah pêtdok pua’ng kau.

²⁸Ka nêk ding uh an ei chawksak unla, dawn ding tuile sum in ei chawksak un; ka keng ua la gam uh hawthen ding bep ei phal piak un.

²⁹Seir ah Esau suante leh Ar mun ah Moabte’nle Jordan lui gâl kâi ah, LALPA ka Pathian un ei piaknau gam ka lut masiau a gam uh ei hawsak phal gual un,” ti in.

³⁰Himaleh, Heshbon lengpa Sihon chun a gam sung ka hawthen ding uh a phal ta pua’n; LALPA la Pathian un amau chu la khut ua a hun piak theina dingin a lungthim uh a hikhau piak ah, tu’ni tiang ah la mu gual ngei un, a lungthim uh a hi’lulul ta ahi.

³¹Chun, LALPA‘n ka kiang in, “En in, Sihon leh a lenggam chu ka hun pepan ta ahi. A gam chu tu’ kipat hin lua pan ngal tau in,” a tia.

³²Tichun, Sihon leh a mite zosia chu ei do ding ah Jahaz mun ah a kuandaw phat un,

³³LALPA ka Pathian un amau chu ka khut un ei pia ta’n; ama tawh, a suante tawh, a mipite zosia pum in ka that gam tau a.

³⁴Zia chung ah chun, a khawpiu zosia ka lau a, khawtin ah pawsal, numei leh chapang natiang in ka that gam tau a. Mihing khat chale ka hawi puau hi.

³⁵Ka lâknau khuate ah chun, gâllâk thil leh ganchate bep keimau â dingin ka kilâk ui.

³⁶Arnon lui pang ah um Aroer ah kipat (phâijawl ah khuate tawh pum in) Gilead tiang in, ka lâk zaw lo ding khop ua khawpi detdo a um puai. LALPA ka Pathian un a leng un ei pia sik sek tai.

³⁷LALPA I Pathian un thu ei piak dungzui in, Ammonte gam leh Jabbok lui mallam gâl leh, tânggam ah khuate him him ah chun la lut lo ding uh ahi, a tia.