Read Vaiphei DAN LEKHABU 20 Bible Online

DAN LEKHABU 20 - Vaiphei bible

DAN LEKHABU 20

¹La gâlteu do ding ah la kuan lai un, sakolte, sakol kângtalaite leh sepai hon nanghaw sâng ah tam zaw la mu ziak un lau diak kiu in; nanghaw Aigupta gam ah kipat hun puidokpa LALPA la Pathian un a hun umpi zing ngâl a.

²Kidona la pan ding kuan ua leh thiampu chu hung pawtdok in, sepaite kiang in,

³zia gual hin a gen ding ahi: “Aw Israel, zia thu hi ngai un! Tu’ni hin la gâlteu do ding la hitau ah. Lungthuai lo in, lau kiu inla, patau lo in amau chu launa him him nei kiu in;

⁴gâl zaw’na hun pia ding ah la masang ua la gâlteu do ding ah kuandok, LALPA la Pathian un a hun kitonpi zing ngâl ah,” ti in.

⁵Ziaphatchun, hotute chun sepaite kiang in, “La lak ua Inthak sa ah lân lo la um awm? Zia gual mi chu chia kit mai hen; achutiloleh, gâldona hung thi’n tin, a Inthak chu mi dang khat chang ziang kha’n a.

⁶Grep huan siam ngâl ah a ga ne nai lo la um awm? In lam ah chia kit hen la, a grep huan ah ga chu va ne phot hen; achutiloleh, gâldona mun ah hung thi’n tin, a grep huan ah gate chu mi dang khat in ne masa ziang kha’n a.

⁷Numei ji ding ah hual ngâl ah kichenpi man lo la um awm? In lam ah chia kit hen la, ji vanei phot hen; achutiloleh, gâl in hung thi kha’n tin, mi dang khat in kichenpi kha’n a,” ti’n gen uh hen.

⁸Hotute chun sepaite kiang in zia gual hin gen uh hen la: “A lauthawng leh a lungthuai kua la um awm? Ama lungthim gual ah a lawite a hilung-thuailona dingin In lam ah chia kit ziang hen,” ti in.

⁹Hotute’n sepaite kiang ah thu a gen zaw phat uh leh, sepai hotute chun a mawpuaknau a la ngâl ta’n au.

¹⁰Khawpi do ding ah la kisak phat ua leh, kicham a nuam awm ti dong masa phot un.

¹¹Kicham nuam ah a hung kipiak lut ziang uh chun, zia khua ah mipi zosia chun la nau a sep ding uh ahi.

¹²Kicham nuam lo ah a hun do uh chun ûm kîmvêl unla;

¹³LALPA la Pathian un la khut ua a hun piak phat phat leh, a lak ua pawsal zosia chu chemjam ah la thagam sik sek ding uh ahi.

¹⁴Gallâk dingin numeite, nausente, a ganchateu leh khawpi sung ah thil um zosia chu kilâk thei in lau. La gâlteu in gâllâk a lâk khawm sau zosia tawh LALPA la Pathian un a hun piak zosia chu kilâk thei in lau.

¹⁵Zia gual chun, la chênnau ah namte umna hilo khawpi gamla tak ah um zosia chu la sawisa ding uh ahi.

¹⁶Himaleh, LALPA la Pathian un la lua ding ua a hun piakna khawpi ah chêngte a hiu leh vang, a hing ah, a hathei taphot khêk nei lo ah la thâgam sik sek ding uh ahi;

¹⁷LALPA la Pathian un thu a hun piak gual in, Hit mite, Amor mite, Kanaan mite, Periz mite, Hiv mite leh Jebus mite hivang la thagam ding uh ahi;

¹⁸tichun, LALPA la Pathian chung ua thil gilo hiding ah, a pathian chung ua a bawl uh, thil ki’dak um takte chu a hun zilsak theilona ding un.

¹⁹Khawpi lâk gua’ sawt tak la ûm kîmvêl zaw nung ua, la ding ah la do phat ua leh, a sung ah thinghingte chu heicha la tuk siat lo ding uh ahi. Thingte ah kipat in nêk ding ladok thei maleu chin, la phûk lo ding uh ahi. Loulai ah thingkungte chu mihing gual ah do ngai ahi bek awm?

²⁰Nêk theilo ahi ti la het chianteu bep phûk thei in lau; ziate chu khawpi ah nang uh hun do-te la zawthian masangsiau, amau do-na ding ah kul siamna mang in, ûm kîmvêl in, la do ding uh ahi.