Read Vaiphei DAN LEKHABU 21 Bible Online

DAN LEKHABU 21 - Vaiphei bible

DAN LEKHABU 21

¹LALPA la Pathian un la lua ding ua a hun piakna gam ah chun, mi khat thisa mudaw in um hen la, a thattu het lo hileh;

²upate leh vaihawmte hung khawm intiu in, mi thisa umna mun ah kipat in khuate gamlat dan chu a tê ding uh ahi.

³Mithiluang umna tawh kinai pen khua ah upate chun, bawnglâ khat, ngawngkol bât kha nai lo hun kai intiu in;

⁴khua sung ah upate chun tuihing luanna mun phâihawm khat, lou ding ah kikaibuat nai lo leh thâichi le kitû nai lo na mun ah chun zia bawngchal chu, tuiluang lak ah chun a gawl ta’n uh hen.

⁵Levi chapate, LALPA la Pathian un a na sêm ding leh LALPA min ah maljawlna don ding ah a guat chuam thiampute, thubuai leh kinakna thu taphot ngaitua ding ah umte chun, a thubuai chu a tan ding uh ahi.

⁶Mithiluang tawh kinai pen khua ah upa zosia chun, lui luang lai chung ah bawnglâ gawl kitan chung ah chun a khut uh sil intiu in,

⁷zia gual hin a gen ding uh ahi: “Zia thisan sua’na hin ka khut uh ka tha puau ah, a hetpi inle ka pang puau hi.

⁸Aw LALPA, la tat daw la mipi Israelte chung ah ja’ngai in; la mi Israelte lak ah mawna bei thisan sua’na ziakin thiamlo chansak kin,” tiu hen. Tichun, zia thisan sua’na ziak ah ngawna chun thiang thei ta’n au.

⁹Zia gual chun la lak ua kipat, mawna bei thisan sua’na ziak ah maw chansakna chu kisil thiang thei in lau, LALPA mit mu ah dik tak in la bawl ding uh ahi ngâl a.

¹⁰Gâl do ah la kuan ua, la gâlteu chu LALPA la Pathian un la khut ua a hun piak ah, sal ah la mat phat ua leh,

¹¹sal ah la matteu lak ah numei melpha la sak, la ji ding ah la dawi zawng la mu chun,

¹²la In ah pui tung in: a lu metkol inla, a khuttin le tan inla;

¹³hing matte puanâk chu liptha’n, tha khat sung a nu leh a pate sûn in la In sung ah umsak phot in; ziazaw chuleh, luppi inla, a pawsal hita’n la tin, ama le la ji hita’n a.

¹⁴Ama ah la lung awi zaw lona a um chun, a nopna lam lam zuan thei dingin la thâdaw ding ahi, la zok lo ding ahi. Ama chu la sukmualphosa ahi tâk ziakin suak gual ah la bawl lo ding ahi.

¹⁵Kua’n le ji pani nei in, pakhat lungsiat in, a khat zaw chu dawi ta lo hen la; a pani un chapa nei gêl uh hen la, a doi lo zawknu chapa chu a upa zaw hi nalai leh,

¹⁶a go chu a chate lak ah a hawm piak phat leh, a doi lo zawknu tawh a chapau himaleh, a upa zaw ahi ziakin, a hepi zawknu tawh a chapau chu a upa zaw sâng ah chun a piak tam zawk diak lo ding ahi.

¹⁷A doi lo zawknu tawh a chapau himaleh, a chapa upa pen ahi ziakin, a nei zosia lak ah a chan uh le’ni in a chan chuang ding ahi; a cha masa pen hi’na ziakin upa hi’na chu a chang him him ding ahi.

¹⁸Kua a hem khat in chapa lochal tak leh thukhel tak nei hen la, a nu leh pa thu zui nuam lo in, a thununnau le ngaisak lo leh,

¹⁹a nu leh a pa chun ama chu pum mat in, a khawpiu ah kul kotkhak bul ah a upateu ma-âng in a hun pui ding uh ahi.

²⁰A khuau ah upate kiang in, “Zia ka chapau hi lochal leh phengphel tak ahi. Ka thuu a awi puai. Ama hi mi gawlsan leh zu he’ mi ahi,” a hung ti ding uh ahi.

²¹Ziaphat chuleh, khua sung ah mipi zosia chun suang in a sep lum ding uh ahi. Zia gual chun, la lak ua thil phalo chu la hi’thiang kawm kawm ding uh ahi; chutileh, Israel mipi zosia’n he’n tiu in, lau ta’n au.

²²Mi khat in thi’na ding hial gitlona a bawl ah, thi’na ding ah a chungchâng thutanna bawl ahi chun, thinglêk ah khailup ngâl ding ahi;

²³a luang chu thinglêk ah jankhua’n la koiden lo ding uh ahi; khailup ahi ni ma ma ah chun vui ding ahi, thing ah khailup ah um taphot chu Pathian hânsia dong ahi ngal ah. La lua ding ua LALPA la Pathian un a hun piakna gam chu la hi’buak lo ding uh ahi.