Read Vaiphei DAN LEKHABU 22 Bible Online

DAN LEKHABU 22 - Vaiphei bible

DAN LEKHABU 22

¹La Invêngte bawngchal a hem, belam a hem vâk mang la mu chun kihiatlosak ziang kin; a neite kiang ah la kai tung kit tei tei ding ahi.

²A neite chu la kiangnai ah um lo a hem, ahiloleh, a neite chu kua ahi la het lo ahi chun, la In lam ah kai tung phot inla, a neite’n a hetdaw masangsiau la koltup ding ahi; ziazaw chuleh la pia kit ding ahi.

³La Invêngte sabiltung le zia gual ma chun la bawl ding ahi; zia gual ma chun la Invêngte nîk leh puan le la bawl ding ahi’n, la Invêngte thil matsua la mu taphot chu zia gual ma chun la bawl ding ahi. La Invêngte panpi ding chu la sumsial lo ding ahi.

⁴La Invêngte sabiltung hileh, bawngchal hileh, lampi kilîk la mu chun, la kimulosak ding ahi pua, la kaithaw ngei ngei ding ahi.

⁵Numei chu pawsal van in a kichei lo ding ahi, pawsal le numei van ah a kichei lo ding ahi; zia gual hi LALPA la Pathian uh ki’dak lam tak ahi ngâl a.

⁶Thinglêk a hem, lei tual a hem ah vacha bû la muu ah, a tui a hem, a no a hem a pi’n a awp lai la muu chun, a pi tawh a no chu la lak khawm lo diu ahi.

⁷Nang â ding ah thilpha a hi’theina ding leh la damsawt theina ding un, a pi naw mang in, a no bep kilâk un.

⁸Inthak la sak phat leh, a chung ah kipat mi a kiakthâk ah, la In sung ah thisan sua’na ziak ah thiamlo la chan lona dingin, la Inchung chu a dâi la bawl ding ahi.

⁹La grep huan ah chun thâichi dang la chîn lo ding ahi; achutiloleh, la grep ga tawh, la thâichi dangte ga chu hi’buak ah um gêl gêl ding a hiu.

¹⁰Bawngchal tawh sabiltung lou la kaikhawm sak lo ding ahi.

¹¹Samul tawh pat malngat kikhawng khawm puan la sil lo ding ahi.

¹²La puanâk chual a mongkâi chung kil li ah a jem la bawl ding ahi.

¹³Pawsal khat in numei khat ji’n nei hen la, a kipawlpi nung in doi lo ta leh,

¹⁴a doi lo man in suanlam phuak kawm in, “Zia numei hi ka kichenpi ta’n; ahi’n, ka luppi phatin nungak thiangtho ahi’na bangma ka mu puai,” ti’n zia numei chu sukminsiatna ding ah a gen thanhuai chun,

¹⁵nungak nu leh pate chun, kul kotkhak bul ah khawpi sung ah upa vaihawmte kiang in, nungak-thiangtho ahi’na enchian dingin a pui ding uh ahi.

¹⁶Upate kiang ah chun nungaknu pa chun, “Zia pa kiang ah hin ka chanu chu a ji dingin ka la pia’n, ahi’n, a dawi ta pua’n;

¹⁷‘La chanu hi nungak thiangtho ahi’na bangma ka mu puai,’ ti’n a gensia’n. Himaleh, zia hi ahi ka chanu nungak thiangtho ahi ti kihiat chianna chu,” ti’n khawpi sung ah upate ma-âng ah chun a puanpha hun jak mal intiu in.

¹⁸Khawpi ah upate chun zia tangval chu man in gawt intiu in;

¹⁹Israelte lak ah nungak thiangtho khat a sukminsiat ziakin, dangka thîk shekel za khat liausak intiu in (nungak pa chu a piak ding ahi;) nungak chu a ji hi’ntin, a dam sung sia a ji chu a nol phal hita pua’n a.

²⁰Ahi’nla, a hêkna chu a dik ah, nungak thiangtho ahi’na mu a hilo chun;

²¹zia nungak chu a pa In kotkhak ah kipat in kaidok intiu in, khawpi sung ah pawsalte chun suang in a se’lup ding uh ahi; Israelte lak ah a pa Insung himualpho ah nawchi a la zok ziakin. Zia gual ah chun la lak ua thil phalo chu la hithiang jel ding uh ahi.

²²Pawsal khat mi ji a luppi lai tak mat daw a hileh, numei tawh tasualpa chu a numei tawh pum in thalup ding a hiu. Zia gual ah chun Israelte lak ah thil phalo chu la sukthian jel ding uh ahi.

²³Nungak thiangtho khat, mi ji ding ah hualsa, pawsal dang khat in khawpi sung ah chun vamu’n, valuppi taleh,

²⁴a paniu in khawpi kotkhak ah hun pui intiu in, suang in la sep lum ngâl ding uh ahi; nungak chu khawpi sung ah um hi’ngâl in, panpitu ding hawl ah a kiko lo ziak leh; a pawsal chunle a Invêngte ji ahi minsiat ziakin. Zia gual ah chun la lak ua thil phalo chu la hithiang jel ding uh ahi.

²⁵Himaleh, pawsal khat in daipâm ah mi ji hualsa nungak vamu hen la, man in, luppi ta leh, a luppipa bep chu thalup ding ahi.

²⁶Nungak chu bangma la law lo ding uh ahi; zia nungak chun thi’na khop sual bangma a bawl lo ziakin; zia gual hi mi khat in a Invêngte va bulu ah vathat gual mai ahi ngâl a.

²⁷Daipâm ah pawsal in a sual, hualsa nungak chun panpitu a la ko maleh, ama panpi ding mi a um lo ziak ahi.

²⁸Pawsal khat in nungak thiangtho leh hualsa hilo khat pum mat in, sual ta leh, zia chu hetdaw ahi chun,

²⁹a luppipa chun dangka shekel sawmnga liau intin, zia chu nungak pa chu pia’n tin, zia nungak chu a ji hita’n ah. A ma’n zia nungak chu a sukminsiat ziakin, a dam sung sia a nol phal a hita puai.

³⁰Pawsal khat in a pa thuneina bangmalo sua dingin, a pa ji chu a kichenpi ding ahi puai.