Read Vaiphei DAN LEKHABU 23 Bible Online

DAN LEKHABU 23 - Vaiphei bible

DAN LEKHABU 23

¹A tilchang kêk leh a zamaw kitanbong taphot chu LALPA mite kikhawpna lak ah simkhawm lo ding ahi.

²Zaucha le LALPA mite kikhawpna lak ah simkhawm lo ding a hiu. Amau suan ah mi, a khang sawmna tiang in LALPA mite lak ah pansak lo ding a hiu.

³Ammon mi leh Moab mite him him chu LALPA mite kikhawpna lak ah pansak lo ding a hiu. Amau suan leh pâk taphot chu a khang sawmna tiang unle, LALPA mite kikhawpna lak ah lâklut lo ding a hiu;

⁴Aigupta gam ah kipat la hung pawt daw lai un, lampi la hun hawu ah, nêk leh dawn ding bangma a hun piak nop lo ziak un leh, nanghaw hânsia law ding leh, la siatna ding uh bawl ding ah Mesopotamia gam ah kipat, Pethor khua Beor chapa Balaam a goi ziak un.

⁵(Himaleh, LALPA la Pathian un Balaam thu bangma’n a ngaisak pua’n; LALPA la Pathian un nanghaw a hun lungsiat ziakin, zia hânsialawna chu nangmau â dingin maljawlna’n LALPA la Pathian un a hun chansak zaw ta’ngâl a).

⁶La damsung siau amau phatna ding leh khantona ding uh bangma la bawl lo ding uh ahi.

⁷Edomte lak ah khat chale la kidak bawl lo ding uh a hiu, la chanau kinaipiu ahi ngâl un. Aiguptate lak ah khat chale la kidak bawl lo ding uh ahi, a gam un malzin in la vachêng ta ngâl un.

⁸A suan leh pâkteu, a khang thumna chate chu LALPA mite lak in pansak thei ta’n lau.

⁹Gâldo ding ah la giak daw lai un, thil thianglo lak ah kipat in kisuthiangtho un.

¹⁰La lak ua mi pakhat jan kâl ah ama ah kipat, thilbuak a la pawt khâk ziak ah thianglo ahi chun, gia mun ah kipat in pawtdok hen; zia giamun ah chun a lût kit tâk lo ding ahi.

¹¹Nitâk lam ah chun kisil thiang hen la, nisa tum nung leh zia giamun ah chun lût kit bep hen.

¹²Zia gual mite um chuam theina ding mun, la giamun pawlam un la bawl sek ding uh ahi ngâl a.

¹³Lei laina ding matchâk la nei ding uh ahi; la dâilênna ding uh lei la chawkuak ua, a nung leh la vuk khum kit sek ding uh ahi.

¹⁴LALPA la Pathian uh chu nangmau veng bit ding leh la mêlmateu hun do piak ding ah la lak un a hung pang zing sek ah; ziaziakchun, la lak ua a kiheimang lona dingin, la puanbûk uh chu a thiantho ding ahi.

¹⁵Mi khat suak hi’na kipat hung taidok ah, nangma hung bêl taphot chu, a pu kiang ah la thak kit lo ding uh ahi.

¹⁶La khuau ah, a nopna mun pen pen chu têl hen la, la kiang ah chun a chênden ding ahi; la sukgenthei lo ding uh ahi.

¹⁷Israel chanute lak ah khat chale biakna mun ah nawchi zuak ah a pan lo ding uh ahi; Israelte cha pawsal lak ah khat chale biakna mun ah kizuak a um lo ding uh ahi.

¹⁸Numei nawchi man leh pawsal kizokna mante chu, LALPA la Pathian kiang ah kitiamna ding ah la piak lo ding uh ahi; zia chu LALPA la Pathian un a ki’dak lam tak ahi ngâl a.

¹⁹A pung doina ziakin la Israel chanpite kiang ah bat la piak lo ding ahi: Sum ah punna hileh, nêk leh dawn ah punna leh nei leh lam ah punna him him thil batsakna chung ah la lâk lo ding uh ahi.

²⁰Gam dang mite kiang in vang a pung del in thil la batsak thei ui; ahi’n, la Israel chanpiteu kiang in vang a pung delna ziakin bat la piak lo ding uh ahi; LALPA la Pathian un la lua ding ua a hun piakna gam ah chun a hun maljawl theina dingin.

²¹LALPA la Pathian kiang ah kitiamna la nei phat leh, la bawlna ding hunbî chu vawchawn kin; LALPA la Pathian in a hun phût phat leh, gilo ah thiammaw chang hi mai ding la hi’ngâl a.

²²Kipautiam lo ding ah la kisûm thei leh vang, la bawlkhialna ziak ah thiamlo channa ding um lo mai ding ahi.

²³LALPA la Pathian kiang ah la kipautiamna leh la thutep taphot chu, la kam ah pawt dungzui in gunchu tak ah la bawl tei tei ding ahi.

²⁴La Invêngte grep huan ah la chia lai in, la du jat jat, la vâ sêt in nethei in la tin; ahi’n, la puakdaw lo ding ahi.

²⁵La Invêngte bu leilai la haw leh, bu vuite chu la khut in la thei in la tin; himaleh, kawite mang in buvuite chu ât lo ding ahi.