Read Vaiphei DAN LEKHABU 24 Bible Online

DAN LEKHABU 24 - Vaiphei bible

DAN LEKHABU 24

¹Pawsal khat in ji nei hen la, a kichen zaw nung un doi a tin zawlona hun mudok henla, nolna lekha zik in, a khut ngei ah pia’n a In ah kipat sawldok in, a In chu nusia taleh;

²midang kichenpi thei dingin pawtdok ngâl ta’n a.

³A pawsal nunung zaw chunle dawi kit lo in, nolna lekha zik in, a khut ah pia’n sawldok kit ta leh; (ahiloleh, a pawsal pani’na pa chu a thi bang ahi chun;)

⁴midang in a sukthanhuaisa ahi’tâk ziakin, LALPA â ding ah thil kidak um ahi’tâk ziakin, a pawsal masa, a In ah kipat sawldokpa chun a kichenpi kit tâk lo ding ahi. LALPA la Pathian un la luana ding uh gam a hun piakna chung ah chun thil dik lo tak ah bawl in, thiamlo la chan lona ding un.

⁵Pawsal ji nei thak chu sepai lak ah gâldo in a kuandaw lo ding ahi; chuleh, mawpuakna lian tak le piak lo ding ahi. A kichenpi a ji tawh a in ah nuam tak ah a umna ding un kumkhat zalenna piak ding ahi.

⁶Kitiamna man dingin buhêk suang a hem, buhêk suang chungnung zaw a hem kuama lâk piak kiu in, mi hinna hên piak la hiding ziakin.

⁷Kuale Israelte lak ah mi khat pum mat ah, suak ah mang a hem, Israel mi chu zuak mang a hem a um chun, zia mi manpa chu thalup ding ahi. Zia gual ah chun la lak ua gitlona la hithian kawm kawm ding uh ahi ngâl a.

⁸La lak ua phâk natna a lênjak lona dingin, Levi thiampute thu ka piakte zosia, amau in a hun hil dungzui un chingthei tak in zui tau in.

⁹Aigupta gam ah kipat la hung pawtdok lai ua, Miriam chung ah LALPA la Pathian un a thilbawl kha hezing ta un.

¹⁰La Ingvêngte kiang ah leiba la piak sîk ding ah a In ua la lût in, a kitiamna lâkpiak kin.

¹¹In paw lam ah ngâk inla, leiba neipa’n a kitiamna ding ah a hun piak ding chu ama hun piak ngâk in.

¹²Mi chaga ahi ah, a nîk leh puan a hun piak ziang ahi chun, zia a kitiamna chu jan giakpi kin.

¹³A hun maljawl theina ding leh LALPA la Pathian ah la min phatna a hung hitheina dingin, thilpiak chu jan ah a silman tei tei na dingin, nitum ma ngei ngei ah la piak kit ding ahi.

¹⁴La khawpiteu lak ah la chênkhawmpiu, la unau uh Israel mi hihen la, gam dang mi hitaleh, mi genthei leh tasamte chu a sepnau thaman uh la thep lo ding uh ahi.

¹⁵A nasep man uh nisi’n in la piak ding uh ahi; migenthei a hiziak un, zia bep chu a nisi’n nêk mu’nau ahi ngâl ah; achutiloleh, LALPA kiang ah hun hêk intiu in, nangmau chu maw sak hi kha’n lau.

¹⁶Chate gitlona ziakin a pa thalup ding a hipua’n, pate gitlona ziak ah le a chate thalup ding ahi diak puai; mi tin amau gitlona ziak bep ah amau thalup ding a hiu.

¹⁷Gamdang mite leh nauchagate chung thu diklo tak ah vai la hawm piak lo ding uh ahi; meithâi sil leh chên le banda la lâkpiak lo ding uh ahi.

¹⁸Nang hawle Aigupta gam ah khan suak la la hiu a, LALPA la Pathian un zia tak mun ah kipat khan a hun tatdaw la hiu kha hezing ta un; ziaziakchun, zia thil hi la bawl ding un thu ka hun piak la hiu.

¹⁹Lou ah bu la lâk lai un, buphal lâk hetmil la nei chu la ding in kile’kit kin; ziate chu gam dang mite, nauchagate leh meithâite â ding ah la nutsia piak diu ahi; tichun, LALPA la Pathian un la khut nasepnau zosia ah a hun maljawl theina dingin.

²⁰Oliv theiga la law phat leh le, la hetmilte chu va chomkhawm kit se’ se’ kin; gam dang mite, nauchagate leh meithâite â ding ahi tai.

²¹La grep huan ah grep ga la law zaw nung ah a lêpgate la la hawl kit tâk lo ding uh ahi; gam dang mite, nau chagate leh meithâite â ding ahi tai.

²²Ziate hi la bawl ding ua thu ka hun piak la hiu; Aigupta gam ah khan nang hawle suak ah a la um la hiu ti hezing tau in.