Read Vaiphei DAN LEKHABU 25 Bible Online

DAN LEKHABU 25 - Vaiphei bible

DAN LEKHABU 25

¹Mi pani thubuai nei ah a kinak phat ua leh, vaihawmna Inpi ah chia intiu in; tichun, vaihawmte chun pakhat chu thiam chansak intiu in, a khat zaw chu thiamlo a chansak ding uh ahi.

²Migilo zaw chu jep ding ahi chun, vaihawmpa mit mu ngei ah chun, lup sak in, a gitlona tawh kigûn in a jep ding uh ahi.

³Sawmli vei tiang ah jep thei hi’n ah; zia sâng ah tam zaw chu la jep uh chun, la Invêngpa chu la mit mu ah hi’mualpho hi talua kha’n a.

⁴Bawngchal in bu a chil lai in a muk kân kin.

⁵Unau pawsal In khat ah chêng khawm uh hen la, a lak ua khat chapa bei in thi taleh, a thipa ji chun amau In sung mi hilo, mi chuam dang a va kichenpi lo ding ahi. A pawsal suapi dang khat in a kichenpi ah, a pawsal suapipa mawpuak chu a bawl ding ahi;

⁶chuleh, Israelte lak ah a min a manlona dingin, a cha nei masak pen pen uh chun, a suapipa thi ta min chu a law ding ahi.

⁷Ahi’n, ama chun a suapipa ji chu a kichenpi nop lo leh, a suapipa ji chu kulkot ah upate kiang ah chia intin, a kiang un, “Ka pawsal suapipa’n Israel lak ah a suapipa min man lona ding ah a bawl ding dawl a bawl nuam puai,” a ti ding ahi.

⁸Ziaphat chuleh, a khuau ah upate chun ama chu ko in, kihopi in au. “Ama chu ka kichenpi nuam puai,” a ti tei tei chun,

⁹a suapipa ji chun upate lak ah ama vanai intin, a kengtawdap sût piak intin, a maichang ah a chilsiat khum intin, “A suapipa Inkuan siampha nuamlote chu zia gual hin bawl hijel hen,” ti’n a sam ding ahi.

¹⁰Ama Inkuan chu Israelte zosia lak in, “Kengtawdap sût piak ah umte sunghaw,” ti min paw ta’n au.

¹¹Pawsal kina’n, kibuan uh hen la, a zawngzawpa ji chun a pawsal a panpi guatna lam in a hatzawpa zamaw a va tûkkhâk ahi chun,

¹²zia nu khutbân chu tan piak ding ahi; la daidawp lo ding uh ahi.

¹³La te’na koina dip un bûkna chi chuam chuam, a gik zaw leh a jang zaw la neikhawm lo ding uh ahi.

¹⁴La In sung un te’na jat chuam chuam, a lianzaw leh a neuzaw la neilo ding uh ahi.

¹⁵LALPA la Pathian un a hun piakna gam hin, la dam sawt theina ding un, bûkna dik leh te’na dik tak bep la mat ding uh ahi.

¹⁶Zia gual ah diklo tak ah bawl taphot chu, LALPA la Pathian un a kidak lam tak ahi.

¹⁷Aigupta gam ah kipat la hung pawt daw lai ua, lampi Amalekte’n a hun soisak dan uh kha hezing unla;

¹⁸chawl leh basam ah la um lai tak un a hun do ua, la nung uh hun delzui in, a jawngkhal zosia a that gam tau ah; Pathian launa a nei puau hi.

¹⁹Ziaziakchun, LALPA la Pathian un la lua ding ua a hun piakna gam la hung chên phat ua, la kîmvêl ua la mêlmateu zosia lak ah kipat, LALPA la Pathian un gâl muang tak ah a hun umsak phat leh, van nuai ah Amalekte het zingna chu la hibei tei tei ding uh ahi; zia chu la hetmil lo ding uh ahi.