Read Vaiphei DAN LEKHABU 26 Bible Online

DAN LEKHABU 26 - Vaiphei bible

DAN LEKHABU 26

¹Chuleh, LALPA la Pathian un go ding ah la luana ding uh gam a hun piakna chu la hung lut phat ua, la luau ah, la chên phat ua leh,

²LALPA la Pathian un a piakna gam leilung ah ga masa pente lak ah bang a hem jat chu, LALPA la Pathian un a min hetzingna ding ah a guatna mun ah chun la hun puak ding uh ahi.

³Zia hun ah thiampu kiang ah chun chiau inla, a kiang in, “LALPA la Pathian kiang ah piak ding ah a la tiamna gam ah chun tu’ni hin ka hung ui ti ka puang hi,” tiu in la.

⁴Thiampu’n la khut ah kipat la law chu a lak zaw phat leh, LALPA la Pathian mâichâm mai jawn ah chun koi intin;

⁵ziaphat chuleh, nang in LALPA la Pathian ma-âng ah chun zia gual hin thu la gen ding ahi: “Aram gam ah kipat mi vâkvâi kha ka suantubul ahi’n; Aigupta gam in a chia suk ah, zia tak ah chun malzin in a vachâm a; mi tawmcha himaleu, nam lian tak, hat tak leh mipi tam tak a hung hitau in;

⁶Aiguptate’n na haksa tak tak ei sepsak in, ei sukgenthei ah ei soisak phat un,

⁷ka pu leh pateu Pathian, LALPA kiang in ka kiko tau ah; ama’n ka awu chu a la ngaitha’n, ka genthei danteu, ka nasep gim danteu leh tawimaw hial ah ka um danteu chu a hun mu ta’n.

⁸LALPA‘n a khut hat tak chu lâm in, a thilhitheina tizat um takte sua in, thilmak leh tepte’na tam tak te bawl in, Aigupta gam ah kipat in ei la puidok ta’n;

⁹zia gam pha, bawngnawi leh khuaizu luanna gam hi ei pia’n, ei pui lût tai.

¹⁰Tu’hin aw LALPA, nang in lei piakna gam ah ga masa ka hun choite hi,” tiu in la. LALPA la Pathian uh mai ah chun nga thau inla, LALPA la Pathian uh ho in khûn tau in.

¹¹Ziaphat chuleh, LALPA la Pathian un thilpha a hun piak zosia chung ah, la Inkuan un, Levite tawh, la lak ua gam dang mi a chêngdente tawh la sunghaw un lim tak in la um ding uh ahi.

¹²Akum thumna (sawm ah khat piak kum) ah la sepdawteu sawm ah khat la piak zaw phat ua, la khua sung ua vâ tak ah nêkthei dingin, Levite, gam dang mite, nauchagate leh meithâite la piak zaw phat uh leh,

¹³ziaphat chuleh, LALPA la Pathian kiang un zia gual hin la gen ding uh ahi: “Thu lei piak dungzui in, ka In ah thilzek thiangthote chu ladok in, Levite, gam dang mite, nau chagate leh meithâite kiang in ka pia tai; la thupiak chu bangma ka botsia pua’n, hetmil le ka nei diak puai;

¹⁴ka lusûn hun inle ka ne pua’n, thianglo ah ka um sung inle bangma ka khoilok puai; mithite â dinginle ka pia puai. LALPA ka Pathian thu bep ka zawm in, la thu ei piak dungzui bep in ka hun bawl hi.

¹⁵La umna mun thiangtho van ah kipat in ei hun en suk inla, gam pha, bawngnawi leh khuaizu luanna gam, ka pu leh pateu kiang ah piak ding ah la la tiamna gual ah lei piakna gam leisiat leh, la mi Israelte hi maljawl in,” la ti ding uh ahi.

¹⁶Tu’ni ma ma hin, LALPA la Pathian in a dante leh a vaihawmna dante chu la zui dingin thu a hun pia ahi; ziaziakchun, la lungthim zosia leh la ngaituana zosia in ziate chu gunchu tak in la zui ding ahi.

¹⁷Tu’ni hin, LALPA lampite la zui ah, a dante, a thupiakte, a vaihawmnate leh a thugente la zopna dingin ama tawh kilemna la bawl tai.

¹⁸Tu’ni hin LALPA‘n a thutiamna dungzui ah, ama â ding bîk hi’ding leh, a thupiakte la zopna ding un, la lemsaknau a chang tai;

¹⁹ama’n nanghaw nam zosia lak ah a hun koisân ah, pakchat um, minthang leh ja um tak ah hun bawl dingin; chuleh, a la kitiamna dungzui ah, ama LALPA la Pathian uh â ding ah nam thiangtho la hi’ding uh ahi.