Read Vaiphei DAN LEKHABU 27 Bible Online

DAN LEKHABU 27 - Vaiphei bible

DAN LEKHABU 27

¹Ziaphatchun, Mosi tawh Israel upate chun, mipite zosia zia gual hin thu a pia tau a: Tu’ni ka thu hun piak zosia hi, ka hun hil gual tak in zui tau in.

²LALPA la Pathian un a hun piakna gam lut ding ah Jordan lui la kân ni phat ua leh, suang lian tak tak phu unla, suanglo la nu’ ding uh ahi.

³La pu leh pateu kiang ah piak ding ah LALPA la Pathian un a la tiamna gam pha, bawngnawi leh khuaizu luanna gam, LALPA la Pathian un a hun piakna gam chu lut ding ah gâl langkhat lam la kai phat ua leh, zia ka dan thu hun piak zosia hi zia suang ah chun la zik ding uh ahi.

⁴Chuleh, Jordan lui gâl la kai phat ua leh, tu’ni ka hun thupiak gual in, Ebal tâng in zia suang chu phu unla, suang rong in la jut khum ding uh ahi.

⁵Chun, LALPA la Pathian â dingin suang mâichâm siam unla, zia mâichâm bawlna ding ah chun thîk him him la mat lo ding uh ahi.

⁶LALPA la Pathian uh mâichâm ding chu suang kisekthaw hilo ngen ah la bawl ding uh ahi. Zia tak ah chun, LALPA la Pathian â dingin hâlmang thil latte la lân ding uh ahi;

⁷zia tak ma’ chun, kichamna ding ah kithoinate bawl unla, neu inla, LALPA la Pathian mau ah chun lim tak in la um ding uh ahi.

⁸La suang tian khawmteu chung ah, zia dan thute zosia chu kichian tak in la zik ding uh ahi.

⁹Chun, Mosi leh Levi dan ah thiampute chun, Israelte zosia kiang in, “Aw Israel mite haw, thip unla, ngaipha tau in! Tu’ni ma ma’ hin LALPA la Pathian uh mite la hung hitau hi.

¹⁰Ziaziakchun, LALPA la Pathian uh thu la ngai ding uh ahi’n; a thupiakte leh a dan thuguatte tu’ni ma ma ah ka hun thupiakte hi la zop ding uh ahi,” a tiu a.

¹¹Zia ni ma ma’ chun, Mosi’n mipite chu zia gual hin thu a pia’n:

¹²Jordan lui gâl la kai phat ua, mipite chung ah maljawlna thu gen lat ahi’phat leh, zia mite hi Gerizim tâng ah chun a vadin ding uh ahi: Simeon, Levi, Judah, Issakhar, Joseph leh Benjamin.

¹³Chuleh, hânsialaw dingin: Reuben, Gad, Asher, Zebulun, Dan leh Naphtali te hi Ebal Tâng ah chun a din ding uh ahi.

¹⁴Ziaphat chuleh, Levite chun aw ngai tak in, Israelte zosia kiang ah chun zia gual hin a hun genbe nâklai ding uh ahi:

¹⁵Kua’nle a gûk ah LALPA ki’dak chi, mi khutthiamte milim siamkawm a hem, sunthaw a hem a kibawl uh chun, hânsiadong in um tau hen, a tiu ah. Mipi zosia chun, “Amen,” ti’n dawnhuu hen la.

¹⁶A nu a hem a pa a hem jalo tapo chu, hânsiadong in um tau hen, a ti zaw phat uh leh, mipi zosia chun, “Amen,” tiu hen la.

¹⁷A Invêngte nai ah gamgi chawn taphot chu hânsiadong in um tau hen, tiu hen la. Mipi zosia’n, “Amen,” ti’n dawnhu tau hen.

¹⁸Lamlian ah mitthûm lam diklo hiltu chu hânsiadong in um tau hen, tiu hen la. Mipi zosia’n, “Amen,” ti’n dawnhu tau hen.

¹⁹Gamdang mite, nauchagate leh meithâite diklo tak ah vaihawm piakte chu hânsiadong in um tau hen, tiu hen la. Mipi zosia’n, “Amen,” ti’n dawnhu tau hen.

²⁰A pa ji luppi taphot chun a pa thuneina bangmalo ah a suasak ziakin hânsiadong in um tau hen, tiu hen la. Mipi zosia’n, “Amen,” ti’n dawnhu tau hen.

²¹Bang gancha le luppi taphot chu hânsiadong in um tau hen, tiu hen la. Mipi zosia’n, “Amen” ti’n dawnhu tau hen.

²²A suapinu, a pa chanu hileh, a nu chanu hileh luppi taphot chu hânsiadong in um tau hen, tiu hen la. Mipi zosia’n, “Amen,” ti’n dawnhu tau hen.

²³A talpinu luppi taphot chu hânsiadong in um tau hen, tiu hen la. Mipi zosia’n, “Amen,” ti’n dawnhu tau hen.

²⁴A gûk ah a Invêngte that chu hânsiadong in um tau hen, tiu hen la. Mipi zosia’n, “Amen,” ti’n dawnhu tau hen.

²⁵Mawna bei mi thisan sua ding ah gawlgûkna la taphot chu hânsia dong in um tau hen, tiu hen la. Mipi zosia’n, “Amen,” ti’n dawnhu tau hen.

²⁶Zia dan thute zui lo mihing taphot chu hânsiadong in um tau hen, tiu hen la. Mipi zosia’n, “Amen,” ti’n dawnhu tau hen.