Read Vaiphei DAN LEKHABU 28 Bible Online

DAN LEKHABU 28 - Vaiphei bible

DAN LEKHABU 28

¹LALPA la Pathian uh thu, tu’ni ka hun hil gual ah a thupiakte la zui ua, la bawl nâk uh leh, LALPA la Pathian uh chun lei chung nam zosia chung in hun koisâng in a;

²LALPA la Pathian uh thu la mat ua ahileh, zia maljawlna zosia hi la chung un hung tung in, hun jangvuk in a.

³Khawpi sung in maljawl in um in la tiu in, lou mun inle maljawl in um in lau.

⁴La gil ah gate, la huan gate, la ganchate, la gan-gualte pung jel in, la belam honteu le maljawl in um in au.

⁵La sêng leh la vaithum mêknau kuang uh le maljawl in um intin.

⁶La vaitun hun in maljawl in um in la tiu in, la vaikuan hun inle maljawl in um in lau.

⁷LALPA chun nang hun do-te, la mêlmateu chu la mitmuu ah hun nuaisia sak intin; nang uh do dingin lampi pakhat in hung kuan intiu in; himaleh, lampi sagi ah la mu ngei un taijak ta’n au.

⁸LALPA‘n la bu In teu, la khut nasepnau zosia ah maljawl dingin thu pia’n tin; tichun, LALPA la Pathian un a hun piakna gam ah hin hun maljawl in a.

⁹LALPA la Pathian thupiakteu la ngai ua, a lampite la hawu chun, LALPA chun la kiang ua a la kitiamna dungzui in, Ama â ding ah nam thiangtho hiding in hun phudet in a.

¹⁰Lei chung ah mi zosia’n nanghaw, LALPA min ah ko la hiu he in, hun lau ta’n au.

¹¹LALPA la Pathian un, la pu leh pateu kiang ah piak ding ah a la tiamna gam ah hin, nei leh lam ah kiningting ah, cha leh nau, gan-gual, lou leh huan thâi lam ah LALPA maljawlna tam tak dong ta’n lau.

¹²LALPA chun a hun chet chet ah la gam uh chapno ding gawtui hun pia ding leh, la khut nasepnau taphot hun maljawl dingin, van, a hausakna van koina hun hon piak in a; chutichun, nam tamtakte kiang ah bat lâksak in la tiu in, nang un vang kuama â ba pua’n lau.

¹³Tu’ni zui ding leh bawl ding ah ka hun thupiak gual ah hin pathian dangte nungdel ah, a nau sêm ding ah, veilam a hem, changlam a hem ah la pêtmang lo ua, LALPA Pathian thupiakte chu pha tak cha la zui phot ua leh;

¹⁴LALPA chun a mei ding ah hilo in, a luchang dingin hun siam intin; a niam pen ah pang lo in a sângpen in pang in lau.

¹⁵Himaleh, LALPA la Pathian uh pha tak ah la ngaisak lo ua, tu’ni ka thuhil gual ah, a thupiakte leh a vaihawmna dante la zui lo ua leh, zia hânsia zosia hi la chung un hung tung intin, hun phanot in a.

¹⁶La khawpi sung leh lou lam ah hânsiadong in um in lau.

¹⁷La sêng leh la vaithum mêknau kuang uh le hânsiadong in um in lau.

¹⁸La gil ua gate, la gam ua gate, la bawng hon leh la belam gualteu ah le hânsiadong in um in lau.

¹⁹La vaitun unle hânsiadong in um in la tiu in, la vaikuan unle hânsiadong in um in lau.

²⁰La thilbawlteu a phatlo ziak leh keima lei kiheisan tâk ziak un, hisiat dim dem la hiu ah, kin tak ah sukmanthai la hung hi masang un LALPA‘n la chung un siatna, buaina leh la thilbawl guatnau taphot ah beidonnate la chung un hun tunsak ding ahi.

²¹Lua ding ah la lutnau gam ah hin a hun hi’mangthai masia, LALPA‘n hipi hun lênsak zing ta’n a.

²²LALPA chun, kumjawnna, khawsikna, vûnnatna, ti sat hut hutna, khawkhâlna, lung leh hisian hun gawt intin, la manthai masiau hun delzui in a.

²³La chung lam uh van chu dâk thîk suak intin, la umnau nuai lam lei chu thîk tak suak ta’n a.

²⁴LALPA‘n la gam ua chun gua thasâng in leivui zuksak intin, suksiat dik dek ah la um masangsiau leivui chu gua in zuksak ta’n a.

²⁵LALPA‘n la mêlmateu zaw in hun umsak in, amau do dingin lampi khat zui maleu chin, lampi sagi ah taijak in lau. Khawvel lenggam zosiate â ding ah tizat um ah gensim hung hita’n lau.

²⁶La luang uh chunglêng vachate leh gamsa chitinte an ding hi ta’n tin, kuama’n naw lau pua’n au.

²⁷Sukdam theilo Aigupta gam ah uilut te, meimasia, thisan natna leh tithak te hin LALPA‘n hun gawt in a.

²⁸LALPA‘n ngolna, mitthûmna, lungthim lam buaina te’n hun gawt intin;

²⁹thim lak ah mitthûm ah kimai mai gual un, sûnchang lai tak inle kimai kimai la tiu in, ahi’n la, la lampi ding uh mudok zo diak pua’n lau; tichun, mi dangte daichâkvai leh suam gam in um ta’n la tiu in, kuama a hun panpi ding um pua’n a.

³⁰La ji ding ua la hualsau chu pawsal dang khat in a la luppi ta’n au. In sa maleu chin chêng pua’n lau. Grep huan bawl maleu chinle ne diak pua’n lau.

³¹La mit muu in la bawngchalteu chu that intiu in, a sa vang ne pha pua’n lau. La sabiltungteu chu lâkpiak in um in la tiu in, hun dit kit ta pua’n au. La belamteu chu la gâlteu kiang ah pia’n tiu in, kuama’n hun panpi pua’n a.

³²La mu zing un la chapateu leh la chanuteu chu midangte suak ding ah kaimang in um in au; nisa tum in la mit un en zui maleu chin bangma law thei pua’n lau.

³³La het ngailoteu in la lei gateu leh la sepgimnau gate chu ne ta’n tiu in; kihelna leh chotden in hun mang ta’n au;

³⁴la mit ua la thil muteu ziak ah chun ngol khawlaw hial ta’n lau.

³⁵Sukdam thei lo natna LALPA‘n la khûp ua te, la keng ua te leh la kengpêk ah kipat la luvûm tiang un hun veisak in a.

³⁶La pu leh pateu ah kipat la la hetkhâk ngailo uh, la chung ua lal leh vaihawm dingte kiang ah chun LALPA‘n hun pui intin, zia mun ah chun la het ngailo uh, thing leh suang ah kibawl pathiante na sêm in lau.

³⁷Tichun, LALPA‘n a hun puimangna ding nam tin lak ah chun, mite’n a sia lam genna ding ah tizat um leh pauchangthiatna’n hun mang ta’n au.

³⁸Lou ah chun buchi tampi the’ maleu chin, tawmcha bep lakhawm in lau; khauphâkte’n ne zo ding ahi ngâl un.

³⁹Grep huan siam in thohâ leu chinle, a tuite chu dawn pua’n la tiu in, a ga le lou diak pua’n lau; lung in ne zo ding ahi ngâl a.

⁴⁰La gam sung zosiau ah Oliv thing phu’n la tiu in, himaleh, a thau in kijut pua’n lau; Oliv ga chu hût ding ahi ngâl a.

⁴¹Chanu chapate hing in la tiu in, ahi’n, nang uh chang lo in, suak in koltâng ta’n au.

⁴²La theikung zosiau leh la lei ga zosiau khauphâk in ne zo in a.

⁴³La lak ua um gam dang mite chu la chung un kal sang deu deu intiu in; nang uh la hiu leh vang, keniam deu deu in lau.

⁴⁴Amau in hun batsak intiu in, nang un vang bat lâk in lau; amau a luchang in pang intiu in, nanghaw vang a mei in pang ta’n lau.

⁴⁵LALPA la Pathian un a thupiakte leh a dan hun piakte leh a aw la ngaisak lo ziak un, zia hânsia zosia hi la chung un hung tung intin, a hun hi’mangthai masangsia hun delzui in, hun phanot in a.

⁴⁶Amau chu nanghaw leh la suanteu chung ah, tepte’na leh thilmak gensim dingin kumtuang in um zing ta’n au.

⁴⁷Bangkim kiningting tak ah a hun piakna chung inle, LALPA la Pathian na kipak leh lungthim thanuam tak ah la sep piak nop lo ziak un;

⁴⁸bangkim tasam kawm ah gilkial, dangchâk leh ngawnchang in LALPA‘n nanghaw do ding ah la mêlmateu a hun sawlteu na chu sep piak in lau.

⁴⁹Nangmau hun do ah, mupi’n a lâk gual ah hun ladok dingin, gamla tak, kawlkawdong lam pek ah mite, a pau uh la het ngai loteu LALPA‘n hun sawl intin,

⁵⁰têksete ja’na neilo leh khanglaite le doichuamna nei diak lo, mêl lau um tak namte hun sawl ding ahi.

⁵¹A hun gawt chimit kêi masangsiau, la gan-gualteu leh la lei gateu ne’n tiu in; bu te, uain te, sathau te, bawngno te leh la belamno honteu hun nêk gam piak in au.

⁵²La kisuanpi la kulbâng sâng tak tak teu leh, la chênna khawpiteu zosia a chip suak masangsia, ûm chimit in au; LALPA la Pathian un a hun piakna gam ah chun la chênnau khawpi zosia chu hun ûm suak ta’n au.

⁵³La mêlmateu in a hun ûmchilnau ziak leh, a hun hi’gentheinau ziak in, LALPA la Pathian un a hun maljawlna, la gil ua ga la chapau leh la chanuteu sa ne ta’n lau.

⁵⁴La lak ua mi nunpha leh dik tak te’nle, a suapipa hileh, a doithaw ma ma a pom lai a ji hileh, a umpi lai uh a chateu nasan ngaisak thei ta pua’n tiu in;

⁵⁵la khawpiteu ah mêlma ûmchilna a huaisiat bêk ziakin, a chateu sa a nêkbang nasan uh kuama hawm phal ta pua’n au; nêk ding dang bangma um diak talo ahi ziakin.

⁵⁶La lak ua miliante chanu doi um pen pente, a tino leh tinem ziak ua a keng ngawn ua leitual le chuan khalote nasan in, a pawsal dawilai, a pom zing leh ama chapa leh chanu ngawi ngawi nasan hawm nuam lo in,

⁵⁷a chasen hung piangtha lim leh a nâulam chu a gûk in neta’n tin; la khawpiteu mêlma’n a hualvelnau ah la hung tâksap huaisiat bêk bêk ding ziak un.

⁵⁸LALPA la Pathian uh min chungnung leh tizat um tak hi lau lo ah, zia lekhabu’ kizik dan thu zosia hi gunchu tak ah la zop lo ua ahi chun,

⁵⁹LALPA‘n nanghaw leh la cha la nauteu chung in natna huaisia leh dam theilote hun lênsak in a.

⁶⁰La lau leh la tizat uh, Aiguptate chung ah natna tung zosia kha a leng un la chung un tung intin, hun nusia ta pua’n a.

⁶¹La manthai masangsiau in zia dan lekhabu chuang khel lo, natna leh hî tincheng la chung ua tung dingin LALPA‘n hun sawl in a.

⁶²LALPA la Pathian thu la mat nop lo ziak un, tu’ma lam ah van ah aksi jat hial ah tamte kha, tawmcha bep hung hita’n lau.

⁶³Chuleh, nangmau phatna ding bawl leh hipunna ding bawl thanuam ma ma LALPA chu, nanghaw hun hi’mangthaina ding leh bang malo ah hun siam ding chu a lung lam tak hung hita’n tin; chuleh, la luana ding ua la lutnau gam ah kipat ma ma hin, nang uh jukdok in um ta’n lau.

⁶⁴Kawlkil langkhat lam ah kipat a le’lam tiang in namtin lak ah LALPA‘n hun thejak intin; zia mun ah chun nangmau leh la pu leh pateu inle a la het ngailo uh, thing leh suang ah kibawl pathiante na hun sêm ta’n lau.

⁶⁵Zia namte lak ah chun nopsakna leh la kengteu â ding ah chawldamna ding him him mu ta pua’n lau. Zia mun ah chun LALPA‘n lungthim ah dîpdapnate, mit chaunate leh lungthuainate hun pia ta’n a.

⁶⁶La hinkhuau chu lauthawng leng leng ah mang in; a sûn a jan ah dipdap zing ta’n la tin uh; thamuang tak ah hinkhua mang kit ngai ta pua’n lau.

⁶⁷La lungthim un la thil tuak ding uh la tizat ziak uh leh, mittha la muzing ziak un, jingkal sîn leh, “Nitâk hitaleh aw!” ti’n la tiu in; nitâk sîn leh, “Jingkal hitaleh aw!” ti kit ngen sek in lau.

⁶⁸LALPA‘n Aigupta gam zuan ah long in hun pui intin; ahi’n, la kipatna lam uh chu mu kit talo ding ah thutiam dungzui in; zia gam chun la mêlmateu kiang ah suakpa leh suaknu dingin kizuak maleu chin, a hun chaw ding kuama um ta pua’n ah, ti in.