Read Vaiphei DAN LEKHABU 29 Bible Online

DAN LEKHABU 29 - Vaiphei bible

DAN LEKHABU 29

¹Horeb tâng ah a kiang ua thuthung a la piak sim lo in, Moab gam ah Israelte zui ding ah LALPA‘n Mosi kiang ah a la piak thuthungte chu ziate hi ahi.

²Mosi chun Israelte zosia a ko khawm ah, a kiang un zia gual hin a gen ah: La mit mu ngei ua LALPA‘n Aigupta gam ah, Pharaoh chung leh, a suakte chung leh mi zosiate chung ah a thilbawl zosia,

³patepna huaisia takte, teptênate leh thilmak nasa takte kha la mu mau mau a.

⁴Himaleh, LALPA‘n tu’ni tiang hin ziate haw kha la hetchian theina ding uh lungthim leh, mu chian theina mit leh hettheina nakhangte a hun penai puai.

⁵Gamthip ah hin kum sawmli veng veng ka hun pui tai. La chung ua la puanteu a chul nai pua’n, la keng ua la kengtawdap bu teule a chul nai diak pua’n;

⁶kei hi LALPA la Pathian uh ka hi’dan lei hettheina ding un, tu’ni tiang hin vaithum la ne puau ah, uain leh zukha la dawn nai puau hi.

⁷Zia tak mun hi I hung tun phat un, Heshbon lengpa Sihon tawh Bashan Lengpa Og chu ei do dingin a hung kuan un; ahi’n, amau chu I la zo tau a.

⁸A gam uh chu lâkpiak in Reubente, Gadte leh Manasseh phung kimkhatte go dingin I la pia tau a.

⁹Chutichun, la thil bawlnau zosia ah la lamzan theina ding un, zia thuthungte hi gunchu tak in zawm tau in.

¹⁰La leng un, tu’ni hin LALPA la Pathian uh ma-âng hin hung ding chiat tau in: la phung tin ua luchangte, la upateu, la hotuteu leh Israel mipi zosia,

¹¹la cha leh nauteu, la jiteu, la umpiu gam dang mi, la thingpuateu leh la tuikhaiteu zosia tawh;

¹²tu’ni LALPA la Pathian un la kiang ua a thuthung siam, LALPA la Pathian tawh la kikâl ua la thuthung siam ua la pan theina ding un;

¹³nangmau kiang ah a la gensa gual leh, la pu leh pateu Abraham, Isak leh Jakobte kiang ah a la kitiamna dungzui ah khan, ama mite la hung hi’det theina ding leh la Pathian uh a hitheina ding in.

¹⁴Zia thuthung leh kipautiamna thu hi, tu’ni nangmau kiang bep ah bawl hilo in,

¹⁵LALPA la Pathian uh kiang ah tu’ni umte leh a umlo te kiang tiang inle ka bawl ahi.

¹⁶Aigupta gam ah khan bang gual ah a la um I hiu em, ti leh nam dangte lak hawtheng ah bang gual ah hungdok I hiu em ti la he’nau hi.

¹⁷A thil ki’dak um bawlteu, thing leh suang, dangka leh sana milim pathian polche tak ah a bawlteu la mu tau a.

¹⁸La lak un pawsal khat, numei khat, Inkuan khat a hem leh phung khat a hem, zia namte pathian ho ding leh a nau sêm ding ah a lungthim ua LALPA la Pathian uh kiheimangsan kha pal la lak un hung um kha tawl in, thil gu nei leh a ga kha seldawna bulte hung um kha’n a.

¹⁹Tu’ni la kitiamnau thute heta ngâl ah, a lungthim ah, “I lampiteu ah lochal tak in a la chia ta maleu hinle, a pha lam ngen in hung um jel na’n ah,” ti la um uh chun, (la lak ua mipha leh mi phalo kibang tak in la leng un manthai khawlaw mai ding la hiu.)

²⁰LALPA‘n mawk ngaidam ziang nuam pua’n tin, zia gual ah ngaituate chung ah chun LALPA lungnatna puangjak kha’n a. Zia lekhabu ah sapsiatna kigen zosia hi a chung un tung intin; a min uh LALPA‘n van nuai ah thaimang mai ding ahi.

²¹Zia dan lekhabu ah thuthung ah sapsiatnate tuak dingin Israel phung zosia lak ah kipat in LALPA‘n têldok chuam ziang kha tawl in a.

²²Tichun, la nung ua khangthakte leh gam dang mite, gamla tak ah kipat hungte chun, LALPA‘n a bawlsiat dante, a enggawt dante chu a mu phât ua leh gensim in hun nei kha’n au.

²³LALPA‘n a lungnat lai tak ah Sodom leh Gomorrah, Admah leh Zeboim te, a gam pumpi ah mei leh kât ah a hâltum ah, chisuang, meisuang leh suanggial ah dim, bangma ke’daw theilona mun ah a hisiat dante a mu phât uh leh,

²⁴amau leh nam tin in maksa’n, “Bang ding ah LALPA‘n zia gam hi a hiti bawl a hem? Zia gual khop ah a lungnatna hi bang ziak ahi diam?” a ti tak uh leh.

²⁵Mite chun, “Aigupta gam ah kipat a puidaw lai ah, amau tawh kikâl ah, LALPA, a pu leh pateu Pathian un thuthung a la bawl a kiheimang san ua;

²⁶amau in a la het ngailo leh a ho uh le a phal piak lo pathian dangte lam ah a la kiheisan ziak un;

²⁷LALPA lungnatna a chung ua kuangjak in, zia dan lekhabu ah chuang hânsia lawna zosia hi, zia gam chung ah hin tung a hita hi.

²⁸LALPA‘n lungna tak leh hachang thak leh thangtawm ma ma in a gam ua kipat botdok in, gam dang in a naw lut in, tu’ni a um gual uh hi a tuak tau ahi,” a la ti’n au.

²⁹Thil kisêlgute chu LALPA I Pathian uh â ahi’n; a hin la, tâklat ah umte vang eimau leh I suanteu â dingin zia dan zosia hi kumkhua I zoptheina ding un ahi.