Read Vaiphei DAN LEKHABU 3 Bible Online

DAN LEKHABU 3 - Vaiphei bible

DAN LEKHABU 3

¹Bashan lam zuan ah ka chia to phat un, Bashan lengpa Og tawh a mipite zosia Edrei mun ah ei do dingin a hung kuandok tau a.

²LALPA‘n ka kiang in, “Amau chu lau kiu in, a mipite tawh, a lenggam pumpi chu la khut ah ka hun pia ta ngâl in. Amor mi, Heshbon ah vaihawmpa Sihon la bawl gual ah khan amau chule la bawl ding ahi,” a ti’n.

³Tichun, Bashan lengpa Og chu a mipite zosia tawh, LALPA ka Pathian un ka khut un ei pia ta’n. Mihing khat chale hawilo in ka that gam tau a.

⁴Zia hun ah chun khawpi sawmguk umna, Bashan gam ah Og lenggam Argob bial zosia chu ka la sik sek tau ah; kulpi det nei, ka lâk zaw lo uh khawpi khat chale a um puai.

⁵Zia hun ah khawpi ka lâk uh haw chu, kulbâng sâng tak tak, thikjawl ah kotpi kibawl, thuani ngen ah kisiam beple hilo in, khawpel bang a hem jat chiat neisawn nalaite ngen a hiu a.

⁶Heshbon lengpa Sihon chung ah ka bawl gual un, numei, pawsal leh naupang khen chuam umlo in, khawpi sung ah um zosia chu a bân in ka that gam sik sek tau a.

⁷Ahi’n, khawpi sung ah gancha leh thilpha taphot chu ka gâllâk ding un ka chom nâm tau hi.

⁸Zia hun ah chun, Jordan lui gâl ah um Amorte leng pani khut ah kipat in, Wadi Arnon lui ah kipat Hermon tâng,

⁹(zia Hermon tâng chu Sidonte’n Sirion a tiu ah, Amor mi te’n chu Senir a tiu a;)

¹⁰phâicham ah khawpi zosia, Gilead gam zosia tawh Bashan gam zosia leh, Bashan gam ah Og lenggam khawpi Salekah tawh Edrei tiang in ka la zo tau a.

¹¹(Tu’hin, Bashan lengpa Og bep hi mi lian chi, Rephaimte suan ah mi um sun chu ahi tai. Chuleh, a thîk lupna chu Ammonte khua Rabbah ah chun muthei in a um zing hi. A thîk lupna chu mihing tong ah te’ in a dung tong kua leh a vai tong li ahi).

¹²Zia hun lai ah gam ka lâkpiak uh, Arnon lui pang ah Aroer khua mallam chu tawh, Gilead tânggam kim khat, a sung ah khawpi um zosia chu tawh, a leng in Reuben phung tawh Gad phung te ni ka pia’n;

¹³chuleh, Gilead gam kim khat um nalai chu tawh, Og gam ah Bashan gam zosia chu Manasseh phung kim khatte kiang in ka pia, Argob gam zosia leh Bashan gam ah milian Rephaimte gam a ti nau bial leh,

¹⁴Manasseh chapa Jair in, Argob gam zosia, Geshurte leh Maakathte gam tiang in a la’n; zia gam chu ama minsak in, Bashan gam ah Havvoth-Jair a sak ah; tu’ni tiang hinle zia chu a um zing a.

¹⁵Gilead gam chu Makirte ka piai.

¹⁶Gilead ah kipat Arnon lui tiang, phâicham kim khat gamgi ding ah Jabbok lui tiang, zia chu Ammonte gamgi bul tiang ah chun Reubente leh Gadte chan dingin ka pia’n;

¹⁷Arabah tawh Jordan lui pang Kinnereth ah kipat Arabah dil, Tuipi Thi kiti tawh, sualam pang ah Pisgah tângpang gam zosia chule a huam a.

¹⁸Zia lai ah chun, zia gual hin thu ka hun pia: “LALPA la Pathian un zia gam hi la chan ding un hun peta maleh, la gâldo mi teu zosiau chu gâlvan ah kithuam in, la unau Israelte gâlmatawng ah pang in a la gâl kâi ding uh ahi.

¹⁹Khawpi ka hun piaksate ah hin la jiteu, la chateu leh la gan honteu zosia (gancha hon tam tak la nei uh ka henai) la nutsia ding uh ahi.

²⁰LALPA‘n la unauteu le nanghaw gual tho ah thamuang tak ah a chawldamsak ah, Jordan luigâl langkhat lam ah LALPA la Pathian un a gam ding chiat uh a piak zaw phat leh, nang hawle la gam chan ding uh ka hun piakna lam chiat un la chia kit thei bep ding uh ahi,” ti in.

²¹Chuleh, zia hun ma ma’ khan, hiti hin Joshua le thu ka pia: “LALPA la Pathian in lal panite chung ah a thilbawl dan zosia la mit ngei in la mu ta’n; LALPA‘n la gâlkâina ding lenggamte zosia chung ah le zia gual ma chun bawl ding ahi.

²²Lau him him kiu inla, LALPA la Pathian un gâl hun do piak ding ahi ngâl ah,” ti in.

²³Zia hun ah chun LALPA kiang in zia gual hin ka don a:

²⁴“Aw LALPA PATHIAN, la suak hi la lopi dan leh la hât dan lei musak pan ta’ngâl ah; nangma thilbawl gual leh la thilbawl nasa takte gual ah bawlthei pathian dang him him lei leh van ah a um puai!

²⁵Jordan lui gâl ah gampha, tânggam pha leh Lebanon chu mu dingin ei gâl kâisak ham ham in aw,” ka ti’n.

²⁶Himaleh, nanghaw ziakin LALPA chu ka chung in a lungna’n, ka thildot chule ei ngaisak pua’n; LALPA‘n ka kiang in, “Hun ta hen! Zia thu ah hin ka kiang ah bangma dang gen ta kin!

²⁷Pisgah tângvûm ah kal to inla, tumlam, mallam, simlam leh sualam en vêl in. Pha tak in thîl vêl in; zia Jordan luigâl hi kailo ding la hingâl a.

²⁸Himaleh, Joshua hi thu pia’n la, tîl hangsan in. Ama hin zia mipite hi pui gâl kâi in, la mu ding gam zosia chu luasak ding ahi ngâl a,” a ti’n.

²⁹Tichun, Beth-peor jawn tak ah chun ka umden tau a.