Read Vaiphei DAN LEKHABU 30 Bible Online

DAN LEKHABU 30 - Vaiphei bible

DAN LEKHABU 30

¹LALPA la Pathian un nam tin lak ah a hun thejakna mun chiat ah kipat in, la chung ua tung ding ah a koi maljawlna leh hânsia lawnate hi la hun hetdaw phat uh leh,

²tu’ni ka hun thupiak gual ah, nangmau leh la chateu in la lungthim zosiau leh la ngaituanau zosia ah, LALPA la Pathian uh kiang lam ah la hung kile’kit ua, a kamsuak zosia la hun zop phat ua leh,

³LALPA la Pathian un hun tung ding kit in, hun khawtua ta’n tin; chuleh, LALPA la Pathian un namtin lak ah a hun thejakna gam zosia ah kipat in hun puikhawm kit ta’n a.

⁴Kawlkawdong tiang ah thejak ah um hiziangleu chinle, LALPA la Pathian un, zia kipat chun hun kaikhawm kit in, hun pui kit tho tho ding ahi.

⁵La pu leh pateu in a la luanau gam chu LALPA la Pathian un hun pui lût kit in, hun luasak kit in ah; la pu leh pateu sâng ah tam zaw leh maljawlna dong tam zaw’n hun siam kit ding ahi.

⁶Zia ban ah chun, LALPA la Pathian un nang mau leh la chateu lungthim zosia thumat theina hun pia’n tin; tichun, la hin theina ding un la lungthim zosiau leh la ngaituanau zosia in LALPA la Pathian uh hepi ta’n lau.

⁷LALPA la Pathian un zia hânsia lawna zosia hi la mêlmateu leh, nang uh a la dodâlte leh la chung ua amau lawkna ding hawl zosiate chung in tunsak zaw ta’n a.

⁸Ziaphat chuleh, tu’ni ka hun thupiak zosia hi zui in, LALPA thu mang ta’n lau,

⁹zia dan lekhabu ah kizik gual ah hin, LALPA la Pathian uh paukam ngaitha’n, a thupiakte leh a vaihawmna thute la zop ua; chuleh, la lungthim zosiau leh la ngaituanau zosia ah LALPA la Pathian lam uh la hun ngat phat uh leh,

¹⁰LALPA la Pathian un la khut nasepnau zosia ah te, la gil ua ga ah te, la gan-gual lak ua te leh la lei gau ah te nasa tak in hun hipung ta’n a. La pu leh pateu â ding ah thilpha a la bawl thatnop gual tho ah khan, la chung ua thilpha bawl ah, hun maljawl ding chu kithalawp ma ma ta ding ahi ngâl a.

¹¹Tu’ni ka thu hun piakte hi nanghaw â ding ah zui haksa talua leh, gamla talua le ahi diak paw ngâl a.

¹²“Ka het ua, ka zuitheina ding ua kua a hem van ah vakal to ah ei va lâkpiak ding?” la ti ding ua van ah um a hipua’n;

¹³ahiloleh, tuisuagiat gâl lam ah um, “Ka het ua, ka zui theina ding ua tuisuagiat gâl lam ah kua a hem va gâlkâi ah ei va lâkpiak ding?” la tiu le ngai talo ahi.

¹⁴A thu la het ua, la zuitheina ding ua zia gual ah chu um hi mai jenlo in, la kam uh leh la lungthim ua naicha um ahi ngâl a.

¹⁵En un, tu’ni hin la âng ua hinna leh phat theina, thi’na leh siatna ka koi hi.

¹⁶LALPA la Pathian uh hepi ah, a lampi la hawu ah, a dante, a thupiakte, a vaihawmna thute la zop ding ua tu’ni thu ka hun piakte hi la zop ua ahi chun, hing leh dam in hung pung in la tiu in, LALPA la Pathian uh chun hun maljawl in a.

¹⁷Himaleh, la lungthim un ama ngaisak lo ah, la kiheimangsan ua, pathian dangte la ho ua, a nau la sep uh chun,

¹⁸mangthai sik sek ding la hiu ti tu’ni hin ka hun hil la hiu. Jordan lui gâl kâi ah la va luanau gam ah chun damsawt pua’n lau.

¹⁹La mau ah chun hinna leh thi’na, maljawlna leh hânsia lawna ka koi hi nangmau chung thu ah hiatpitu dingin lei leh van chu ka ko ahi. Chutichun, nangmau leh la suanteu la hintheina ding un hinna chu têl tau in;

²⁰la pu leh pateu Abraham, Isak leh Jakob kiang ah LALPA‘n piak ding ah a la tiamna gam ah chun la hin nikhuau a sawt theina ding in, LALPA la Pathian uh chu la hepiu ah, a thute la mat ua, ama bep chu la bêlchâk zing ding uh ahi.