Read Vaiphei DAN LEKHABU 31 Bible Online

DAN LEKHABU 31 - Vaiphei bible

DAN LEKHABU 31

¹Mosi’n zia thu zosia chu Israelte kiang ah a gen zaw phatin,

²a kiang un zia gual hin a gen a: “Tu’hin keima kum za leh sawmni ka hung hi tai. La lak un ka kisawng vel thei ta pua’n; chuleh, LALPA‘n le, ‘Zia Jordan lui hi gâl kâi lo ding la hi,’ ti le ei hil ta’n.

³LALPA la Pathian un hun pui gâl kâi intin; zia namte hi la ma-âng un hun hi’mangthai piak intin; nang un amau chu la suandaw ding uh ahi. LALPA‘n a tiam dungzui in, Joshua’n hun pui gâl kâi ding ahi.

⁴LALPA‘n Amorte leng Sihon tawh Og, a gam tawh a la hi’siat gual ah khan, ziate hile hun bawl ding ahi.

⁵Ka thu hun piakte dungzui ah a chung ua la bawltheina ding un, LALPA‘n la khut un hun pia ding ahi.

⁶Hat tak leh hangsan tak in um un; amau chu lau kiu inla, lunglel him him kiu in; LALPA la Pathian un a hun umpi zing ngâl a; ama’n hun lawsap sak ngai pua’n tin, hun nusia diak pua’n ah,” a tia.

⁷Ziaphatchun, Mosi’n Israel mipite zosia mu in Joshua a kodok ah, a kiang in, “Hat tak leh hangsan tak in um in; zia mipite hin a pu leh pateu kiang ah LALPA‘n piak ding ah a la tiamna gam chu nang in pui lût in, luasak ding la hi’n.

⁸LALPA la Pathian un la mau a pui pek hi. Hun umpi zing intin, hun lawsapsak lo ding leh hun nusia ngailo ding ahi ngâl a. Lau kin la, lungthuai diak kin,” ti’n a thamuan a.

⁹Chun, Mosi’n zia dan chu a zikdok ah, thiampute, LALPA thuthung thingkuang pua ah pang, Levi chate leh Israel upate zosia kiang in a pia’n.

¹⁰Mosi’n zia gual hin thu a pia’n: “Kum sagi tin si’n ah, kingaidamna kum ding ah kiguat leh bawkcha kût si’n leh,

¹¹LALPA la Pathian un a guatchuamna mun ah, Israel mi zosia a hung kilâk phat si’n ua leh, a het ngei ngei ding un, zia dante hi la simdaw sek ding uh ahi.

¹²Mipi zosia: Pawsal, numei, naupang nalaite leh la In ua midang um zosia chunle a ngaithâk ua, a zil ua, LALPA la Pathian uh chu lau dan a hun het ua, zia dante hi gunchu tak ah a hun zop theina ding un la ko khawm ding ahi;

¹³tichun, bangma henai lo a chateu inle a ngaithâk ua, Jordan luigâl hung kâi ah la luana ding uh gam ah la um sungsiau LALPA la Pathian uh lau dan a ziltheina ding un la ko khawm ding ahi,” ti in.

¹⁴LALPA‘n Mosi kiang in: “La thi ni ding a nai tai; Joshua ko inla, mawpuakna ka piak theina dingin, kikhopna biakbûk ah hun pui in,” a tia. Tichun, Mosi tawh Joshua chu kikhopna biakbûk ah chun a vachia tau a;

¹⁵chuleh, LALPA chu sûmpi dingin biakbûk ah chun a hung kilâk ta’n; sûmpi ding chu biakbûk lutna kotkhak ah chun a ding a.

¹⁶LALPA‘n Mosi kiang in: “La pu leh pate kiang ah chawldam pai ta ding la hi. Zia mipite hin, zia gam pathiante lak ah chun ei hun ângkawmsan pai in, ei kiheisan intiu in; a kiang ua ka thutepna thuthung chu bawtsia’n au.

¹⁷Ziaphat chuleh, a chung ua ka lungnatna kuangjak intin, amau chu kilepsan ing ka tin, ka mai sêlgu ta’ng ka; thil phalo leh tizat um tak in hun chup ta’n ah. Zia ni phat chuleh, ‘I Pathian un ei umpi lo ziak ah zia gual buainate hi tuak hi talo I hiu em leh?’ ti’n tiu in.

¹⁸Zia ni phat chuleh, pathian dangte lam ah ei kiheisan ziak leh, a thil phalo bawl zosiau ziakin kilepsan ngei ngei ding ka hi.

¹⁹Ziaziakchun, zia La hi zikdok inla, Israelte hil in; Israel chate chung thu ah ei hiatpitu a hitheina dingin a kam un koi in.

²⁰Bawngnawi leh khuaizu luanna gam, la pu leh pateu kiang ah piak ding ah ka la kitiamna gam chu la hung luau ah, vâ leh tai tak ah la um ua, la hung thau phat un pathian dangte ngaisak in, a nau sêm in, keima ei musit in, ka thuthungte la hun bawtsia tau a.

²¹Buaina huaisia tak a chung ua a hung tun phat leh, zia La hi a hetdawsaktu hung hita’n ah; a suanteu kam ah kipat hetmil ziang thei hilo ding ahiziak in. Tu’hun ziang ah hinle, ka tiamna gam ah ka puilût masang ziang hinle, a ngaitua danteu chu ka hiatsa him ahi ngâl ah,” a tia.

²²Zia ni ma ma chun zia La hi Mosi’n zikdok in, Israelte a hil tai.

²³Chuleh, LALPA‘n Nun chapa Joshua chu mawpuakna a pia’n, a kiang in: “Hat tak leh hangsan tak in um in. Israel mipite hi a kiang ua ka kipautiamna gam ah chun pui lût ding la hi’ngâl ah; hun umpi zing ding ka hi,” a tia.

²⁴Mosi’n zia dan thute hi a leng in, a tawp tiang ah lekhabu’ a zik zaw phatin,

²⁵LALPA thuthung thingkuang jawn ah pang, Levite chu Mosi’n zia gual hin thu a pia’n:

²⁶“Zia dan lekhabu hi la unla, la chungthuu ah hiatpitu dingin LALPA la Pathian uh thuthung thingkuang kiang ah chun koi tau in.

²⁷La kiphin nop dan uh leh la lochal dan uh ka he ngâl a. Tu’ni la kiang ua dam ah ka um lai ah bawn, LALPA chung in la hel ua; ka thi’nung vang vang leh bang gual bep ah khawk in la hung hel ta bep ding awm maw!

²⁸A hetnau ngei ah zia thu hi ka gen ah, a chungchâng thuu ah hetpi ding ah lei leh van chu ka ko theina dingin, la phung tin ua upate leh la hotuteu zosia hun ko khawm tiam un.

²⁹Ka thi’nung leh nasa tak ah kisupolche in, ka thupiak lampi pêtsan ding la hiu ti ka hechian ma ma ngâl a. LALPA mit mu ah thil phalo la bawl ua, la khut nasep ua kipat in ama chu chok lungna ding la hiziak un, tu’nung phat leh, buaina tincheng hun tuak in lau,” a tia.

³⁰Tichun, Israel mipi chia khawm zosiate het ah chun, zia La te hi Mosi’n a leng in a gen tai.