Read Vaiphei DAN LEKHABU 32 Bible Online

DAN LEKHABU 32 - Vaiphei bible

DAN LEKHABU 32

¹Aw vante haw, la bil a ladaw un, thu hun gen ding ka hi; lei in ka thugente hi a la he tau hen.

²Hampa lak ah gawnêl zu gual in, ka thuhilte chu gawtui gual in zu hen la; thâi kekthakte chung ah gawmal phîng gual in, ka thugente chu daitui gual in kia hen.

³LALPA min chu puang ding ka hiziak in; lopina chu I Pathian uh pia un!

⁴Ama I Suangpiu, a thilbawl ah pha bukim, a lampi zosia dikna ngen ahi. Pathian ginum leh zuau bawlna um lo, thu dik leh dik tak ah bawl ahi’n;

⁵a cha giloten diklo tak in a la bawl tau ah; nam chavai leh mi lungkawite a hiu.

⁶Aw, mingol leh ngaituana beite haw, zia gual chun maw LALPA la dit kit diu? Ama chu la Pau, a hun siampa leh, tungdingpa hilo maw?

⁷Malai nite kha hezing unla, kum tam tak liamtate kha gêl un; la pa dong lechin, hun hil thei intin; la upate le dong lechin, hun hil in au.

⁸Chungnung pen Pa’n namte gam a hawm piak lai in, mihingte a khenjak lai in, mi tin chu a pathian uh tam dungzui un, a gamgi ding uh a guat piak a;

⁹LALPA chanvo chu a mite a hiu ah, Jakob chu a gochan ahi.

¹⁰Gamkeu leh gamthip hui hân hatna, mun ah chun a nêk ding uh a pia’n; ama chun mitnaucha gual in a vêng in, a khawtua ah, a vêng bit hi.

¹¹Mupi’n a bu ah a no chok tho ah, a note chung ah, a thate a jak ah, a puak to sek gual in,

¹²LALPA bep in amau a pui ah, gam dang pathian a lak un a um puai.

¹³Gam mun sâng in a lângkâi ah, lou ah thâi piangte in a vâk ah; suangpi khikêk kâl ah khuaizu’n a vâk ah, suanggial ah kipat sathau in a chawm in;

¹⁴bawng hon lak ah bawngnawi khalte belam leh, kêlcha lak ah a nawituiteu leh, belamno leh belamchal thaute, Bashan ah bawngchal leh, kelchate gehu bu pha pen pente leh, greptui san uain pha pente la dawn ui.

¹⁵Jakob in a vâ tawk in a ne’n; Jeshurun hung thau in, a hung mom tai. Nang chu la hung thau ah, la hung mom ah, la hung mâm tai! Ama siampa Pathian chu a kiheisan ah, a hukdamna Suangpi chu a hun simmaw tai.

¹⁶Gam dangte pathian chu a thangsiat sak un, ki’dak um tak in a sulungna tau hi.

¹⁷Pathian kiang hilo, thithate kiang in a kithawi un; a hetngai lo uh pathiante kiang in, a pu leh pateu in a la lau ngailo uh, vainung lam tak ah hung um thak, pathiante kiang ah chun.

¹⁸Nangma hun hingtu Suangpi chu, la ngaisak puau ah, nang uh hun siampa Pathian chu, la hemil tau hi.

¹⁹LALPA‘n a mu phât in a thangsia ta’n, a chapa leh a chanute chu a ki’dak tai.

²⁰Hiti’n a gen ah: “Amau ah kipat in, ka maichang sêlgu’ng ka tin; bang gual in a hung tawp awm a la en ma ing ka; ginumna bei cha leh nau, mi chavaite ahi ngâl un.

²¹Ka thangthîpna chu, pathian taklote chung in a choktho un; a milimteu chun ei choklungnau hi. Ziaziakchun, bangma hilote, suklungnat sak ing ka tin, mingol namte thangthîpsak ing ka.

²²Ka lungnatna chu meikuang gual ah, chawthaw in hung um intin; Sheol mun nuainung pente chule kâng tum in ah; lei leh a sung ah um zosia le kâng tum ta’n tin, Mual leh tâng kingaknate chule a kâng hi.

²³A chung un siatna siavum ing ka tin, ka thalchang amau kâpna’n mang zo ta’ng ka tin:

²⁴Kial thi intiu in, natna lau um tak in thi’n au, amau that dingin gamsate sawl ing ka tin, gûlgu hatte’nle chu’lum ta’n au.

²⁵Kotzing ah chemjam in, pindan sung ah dipdap na’n; nungak leh tangval, nawichep lai leh samkângtate, kibang tak in tun khum ta’n a.

²⁶Kil tin ah del mang in, mihing lak ah amau hetna, hibei dingin ka ngaitua ta’n;

²⁷himaleh, a mêlmateu in simmaw ah, a nuaisia bêk ding ziak un: ‘I gual zo tau hi; zia gual ah thilbawl hi LALPA ahi puai,’ a ti khâk ding uh ka lau ngâl a.

²⁸Ngaituana bei nam ngong a hiu in; hetthiamna him him a nei puau hi.

²⁹Pilna nei hileu vang, zia hi hechian ta’n au; bang gual ah hung tawp ding a hem, ti ngaitua ta’n au.

³⁰Bangtidan ah mi khat in mi sang khat zo thei ah, mi pani’n a sîngtêl jam siatsak thei a hiu ah, a Suangpiu in a khotdawsa a hiu ah, a LALPAu in a nutsiasan a hilo ngâl leh?

³¹A dik tak in amau suangpi chu, ei uh Suangpi tawhbang ahi puai; I mêlmateu chu mingol ngen a hiu.

³²A grep tui uh Sodom grep ga, Gomorrah gam ah kipat ahi’n; a grepteu chu grep gu nei leh, a ga bomte chule a kha’ ngen ahi’n;

³³a grep tui uh chu gul gu ahi’n, khuaingal gu hat tak gual chu ahi.

³⁴Ziate hi a leng in ka kiang ah, ka go bawm ah kikhol khawm ah, kichalbit khum hilo a hiu em?

³⁵A kalsuan uh a tawnâl phat uh leh, phuba lâkna leh dit kitna chu kei â ahi; a buaina ni ding uh a nai ta’n, a chung ua siatna kin tak in tung ding ahi.

³⁶A mite hatna a bei tai ti leh, khumbil ah um leh, zalen um chuam talo a hiu ti, a mu phat leh, LALPA‘n a mite dikna’n vaihawm intin, a suakte chu lainat kit ta’n a.

³⁷Ziaphat chuleh, a kiang un: A kingakna suangpiu a pathianteu, khoilam ah a um zo tau em?

³⁸A kithoinau sathau ne ah, a uain thil latteu dawn haw kha, hung tho in, hung panpiu hen la; nang uh hung humbit leu hi ding a pom! hun ti ta’n a.

³⁹Keima, kei bep hi ka hi’n, pathian dang a um puai, ti he tau in. Ka that ah, ka hinsak ah; ka hi’liam ah, ka hi’dam sek; ka khut ah kipat in kuama’n a ladok thei puau hi.

⁴⁰Van lam ah ka bân jak in, ka kihaksial ta’n; kumtuang ah ka hin nâk chun,

⁴¹ka chemjam hiam lek ing ka tin, ka khut in vaihawmna la’ng ka tin, ka mêlmate chung ah phuba a lâk tak leh, ei mudate chu thuk ta’ng ka.

⁴²Ka thalchangte chu thisan khamsak ing ka tin, ka chemjam in taksaphe zosia val zo in, thalup ah umte leh saltângte leh, mêlma samsaute thisan ngei chu.

⁴³Aw vante haw leh, a mipite leh, pathian zosiate haw ama chu ho tau in! Ama’n a chate thisan phuba la ding leh, a mêlmate chung ah phuba la dingin, ama mudate dit kit in, gam chu a mite â ding ah, sukthiantho kit ding ahi ngâl a”.

⁴⁴Mosi a hung ah, zia La thute hi mipite zosia het in, Nun chapa Joshua tawh ama’n a gen tau a.

⁴⁵Mosi’n zia thute zosia hi Israel mipite zosia kiang ah a gen zaw phatin,

⁴⁶a kiang un: “Tu’ni la kiang ua ka thu hun hiatsak zosia ah hin la lungthim uh nga det unla, zia dan thu zosia hi gunchu tak ah zui ding leh bawl dingin la chateu thu piau in.

⁴⁷Zia hi thil mai mai hilo in, la hinnau ma ma ahi ngâl a; zia thu ziak hin Jordan luigâl la vakai ua, la luanau gam ah chun la dam sawt theina ding un,” a tia.

⁴⁸Zia ni ma ma’ chun LALPA‘n Mosi kiang in zia gual hin a gen a:

⁴⁹“Moab gam ah Jeriko gâl tak ah, Abarim tâng dung ah Nebo tângvûm ah chun kal to inla, Israel suante luana ding ah ka piakna Kanaan gam chu vagâl thîl in;

⁵⁰la suapipa Aron le Hor tâng ah a thi ah, a suapite kiang lam ah pui ahi gual khan, la kaltona tâng ah chun hung thi den ta’n la.

⁵¹La paniu in Zin gamthip leh Meribah-kadesh tui mun ah khan Israelte zosia mit mu ah la ginumlonau ziak leh, Israel mipi zosia mit mu ah ka thianthona la sukpolche ziak uh khan.

⁵²Israel chate ka piakna ding gam chu la mit in vagâl mu lechinle, nangma vang lut lo ding la hi,” a tia.