Read Vaiphei DAN LEKHABU 33 Bible Online

DAN LEKHABU 33 - Vaiphei bible

DAN LEKHABU 33

¹Pathian mi matchâk Mosi in a thi masang in zia a nuai ah maljawlna gual hin Israelte chu a maljawl a:

²A kiang un: Sinai ah kipat in LALPA chu a hung ah, Seir tâng ah kipat in nisa gual in a hung suk hi; Paran tâng ah kipat in ei hun sal tai. A kiang in mithiangtho a sîngtêl a um un, a changlam ah a sepai hon tawh.

³Nam zosia lak ah doisakna changte, a mithiangtho zosia chu la khut in a um un; la zanung a chuan zui un, la thupiak a ngai chiat ui.

⁴Jakob mipite’n go ah a lua ding un, Mosi’n dan thu zui ding ei pia’i.

⁵Mipi puitute a kikhop lai un, Israel phungte kizom khawm lak in, Jeshurun ah leng khat a hung piang hi.

⁶A mite chu tawm maleu le, Reuben chu thilo in dam sawt hen.

⁷Judah chung thu zia gual hin a gen a: Aw LALPA, Judah chu ngaisak inla, a mipite kiang ah pui lût in; a khut chu amau â dingin hihat inla, a dogâlteu dopi in pang tau hen.

⁸Levi chung thu zia gual hin a gen a: La Thumim Levite pia’n la, chuleh, la Urim chu la mi ginum kiang ah chun pia’n; Massah ah la patepsate leh, Meribah tui mun ah la kinakpite;

⁹la thupiak a ngaikhawk ziak leh, la thuthung a zop ziak un, a nu leh a pateu kiang a: “Ka hun ngaitua man puai,” tia, a chanauteu kihiatlosak ah, amau chate nasan le a he’pha ta puau.

¹⁰Jakob chu la vaihawmnate zilsak intiu in, Israel chu la dan zilsak ta’n au; la âng ah gimtui a koi un, la mâichâm ah a pum ah, hâlmang thillatte lân ta’n au.

¹¹Aw LALPA, a nei leh lam uh maljawl inla, a khut nasep uh pom ta’n; a dogâlteu leh amau do-tute chun, a hung do kitlona ding un a kawng uh khenbai in.

¹²Benjamin chung thu zia gual hin a gen a: LALPA doichuam chu bit tak in chawldam hen la, sun nitum in Chung Pathian in ûm kîmvêl hen la; a doichuam chu a awmtâng ah chawldam tau hen.

¹³Joseph chung thu zia gual hin a gen a: A gam chu LALPA maljawl in um hen la, chung lam van ah kipat doisakna thilpiak leh, nuai lam thûk tak ah kipatte leh;

¹⁴nisa kipat doisakna gate, thasin ah ga tam tak tawh;

¹⁵malai ah tângte ga pha tak leh, kumtuang ah mualte hausaknate;

¹⁶lei leh a chung ah hausakna zosia tawh, Sinai ah chêngpa doisakna tawh chang ta hen. Zia zosiate hi Joseph luchung ah tung hen la; a suapite chung ah vaihawmpa chalpâng ah chun um ta hen.

¹⁷Ama chu bawngchal piang masa pen gual ah ja’um hita hen! A kîte chu jangsial kî gual hi hen la, a kîte chun nam tin phil hen la, khawvel gam tin ah thejâk ta hen. Ephraim suan ah mi a sîngtêl leh, Manasseh suan ah mi a sangtêlte thil chan hi hen.

¹⁸Zebulun chung thu zia gual hin a gen a: Zebulun, la vaikuan phat leh kipak in; Issakhar le la puan In ah kipak tak in um ta’n.

¹⁹Tâng ah mipi a ko khawm un, kithoina dik tak chu a pia tau a; tuisuagiat ah hausakna a lua un, piunêl ah go phûmguk a chên ui.

²⁰Gad chung thu zia gual hin a gen a: Gadte hiliantu chu maljawl in um hen! Gad chu sakeibaknei gual in a um hi; bânpuam leh lugu a chêp nawi hi.

²¹A pha pen a kitêl in, vaihawmte chanvo chu ama â dingin khêk ahi; mipite mapui in a hung pang ah, LALPA dikna’n vai a hawm in, a dan thuguatte Israel a pia’i.

²²Dan chung thu zia gual hin a gen a: Dan chu sakeibaknei vanglai Bashan ah kipat, hung chawmdok chu ahi.

²³Naphtali chung thu zia gual hin a gen a: Aw Naphtali, doisakna chun lung awi in, LALPA maljawlna ah dim in, tumlam leh simlam chu lua ta’n.

²⁴Asher chung thu zia gual hin a gen a: Maljawlna tam pen Asher in chang hen la, a suapite doisak pen hi hen la; a keng chu sathau in dia hen.

²⁵La kulpite chu thîk tâk leh, dâk thîk hi hen la, la dam sung in la hatna kiam pua’n a.

²⁶Aw Jeshurun, nang hung panpi ding ah, vante ah chuang in, chung lam vandum khêl ah, lopi tak ah um Pathian tawh bang dang a um puai.

²⁷Ama’n tuanah tângah pathiante a nuaisia ah, malai ah thuneite chu a tawden ah; la mêlmate la âng un a del mang a, a kiang un, “Hi’mangthai un,” a tii.

²⁸Tichun, Israel chu bit tak in um intin, kuama sukbuailona mun ah, Jakob chênna mun chu, bu leh uain tamna gam, van daichîm in a chapnona mun chu ahi.

²⁹Aw Israel, la hampha nau e! Nanghaw tawhbang ah, LALPA‘n a hukdaw namte, nangmau panpitu phaw leh, la hatnau chemjam chu ahi! La nuai ua kitulut dingin, la mêlmateu hung intiu in, a tungtûn uh chuan den ta’n lau.