Read Vaiphei DAN LEKHABU 34 Bible Online

DAN LEKHABU 34 - Vaiphei bible

DAN LEKHABU 34

¹Ziaphatchun, Mosi chu Moab phâijawl ah, Jeriko khaw zawn ah Nebo tâng ah, Pisgah tângvûm ah chun a kalto ta’n; chuleh, LALPA‘n a gam pumpi: Gilead ah kipat Dan tiang;

²Naphtali gam zosia, Ephraim leh Manasseh gam zosia leh, Judah gam ah kipat tumlam Tuisuagiat tiang ah gam zosia,

³Negeb leh a Phâicham, tûm thing khawpi Jeriko leh, Zoar tiang in a etsak a.

⁴LALPA‘n a kiang in: “Zia gam hi ahi Abraham, Isak leh Jakob kiang ah, ‘La suanteu kiang ah ka piak ding ahi,’ ti ah ka kipau tiamna gam chu; a gam chu hun etsak ing ka tin, himaleh, zia tak chu gâlkâi lo ding la hi,” a tia.

⁵LALPA suak Mosi chu, LALPA thu gual tak in, Moab gam ah chun a thi tai.

⁶Moab phâijang Beth-peor jawn ah chun a vui tau ah; himaleh, tu’tiang hin kuama’n a thân mun chu a he ta puau hi.

⁷Mosi a thi ah chun kum za leh sawmni ah upa ahi; a mit a thim pua’n, a tha le a ke diak puai.

⁸Moab phâijang ah Israelte’n Mosi chu ni sawmthum a sûn ua; tichun, Mosi a sûnna hun uh chu a bei tai.

⁹Chun, Nun chapa Joshua chu Mosi in a chung ah a khut a ngat ziak in, pilna thagau in a dim ah; LALPA‘n Mosi thu a la piak gual gual in Israelte’n a thu a mang tau a.

¹⁰Zia kipat chun LALPA‘n kimâitua ah a het Mosi tawhbang jawlnei Israel gam in a um ta puai.

¹¹Pharaoh leh a suakte leh a gam pumpi chung ah, LALPA‘n Aigupta gam ah bawl ding ah a sawl teptênate leh thilmakte leh,

¹²thil thupi tak tak bawlna leh, Israel zosia mit mu ah thilhitheina tizat um tak ah tâklatnate ah chun, ama tuk ding kuama a um puai.