Read Vaiphei DAN LEKHABU 4 Bible Online

DAN LEKHABU 4 - Vaiphei bible

DAN LEKHABU 4

¹Tu’hin, aw Israel mite haw, LALPA, la pu leh pateu Pathian in a piakna gam chu dam ah la lût ua, la lua theina ding un ka dan thu leh ka thuguatte chu ngaisak ah la zui ding uh ahi.

²LALPA la Pathian uh thupiak, ka hun hilte hi la zui theina ding un, thu ka hun piakte hi khatchale la belap un, la pai khen diak lo ding uh ahi.

³Baal-peor chung thu ah LALPA bawl dan kha la mit ngei un la mu tau ah; LALPA la Pathian un, Peor mun ah Baal zui leh ho zosia chu nangmau lak ah kipat in a hi’mangthai dim dem ta’n;

⁴LALPA la Pathian uh bêl zing taphot vang, tu’ni tiang hin hing leh dam in la um chiat nau hi.

⁵Ngai un, la luana ding gam ua la zui zing ding un, LALPA ka Pathian in thu ei piak dungzui in dante leh, thuthungte chu ka hun hil la hiu hi.

⁶Chingthei tak ah la zui ua leh, namdangte mit mu ah la pilnateu leh la hetthiamnau tâklat ah um in, zia dan thuthungte hi a het phat ua leh, “Zia nam thupi tak hi nam pil leh hetthiamna nei mi ahi ngei uh hilam e!” hun ti’n au.

⁷I ko phat si’n leh naicha um zing, LALPA I Pathian uh gual hi, kua nam inle pathian dang a nei kha ngai him him ua a hem?

⁸Tu’ni la kiang ua ka hun tâklat, dan leh dan thuthungte gual ah dik leh kitup dan nei, nam thupi dang kua a hem um?

⁹La mit ua la muteu chu hemil lo a, la dam sungsiau la lunggil ua la het zing theina ding un, chingthei tak ah kivêng in um phot un; zia thute chu la chateu, la tuteu leh la tusawnteu tiang in hil unla;

¹⁰Horeb tâng ah LALPA la Pathian âng ah la din lai ua, LALPA‘n ka kiang ah, “Mipite chu ei ko khawm piak inla, ka thu hil ing ka; lei chungah a dam sungsiau ah ei lau theina ding uh leh a chateu a hilsawn theina ding un;

¹¹vanlaijawl tiang ah sûmpi’n, thim lêt lût ah a tuam suak tângbul la hun nai ua, la hung din danteu kha hil un.

¹²Ziaphatchun, meikuang lak ah kipat chun LALPA‘n nanghaw a hun ho a. A aw git chu la hiau ah, ahi’n, bangma la mu puau ah, aw git bep chu a um a.

¹³A thuthung la zop ding ua a piak, Thu Sawm a hun piak chu la kiang un a puangjak ah; zia chu suangpêk pani in a zikdok a.

¹⁴Chuleh, zia hun ah khan la gâlkâi ua, la luana ding uh gam ah la zop ding un dante leh thuthung dante, nanghaw hun hil dingin LALPA‘n thu ei pia ahi.”

¹⁵Horeb tâng ah, meikuang lak ah kipat LALPA‘n la kiang ua thu a gen lai khan, mêl kichian tak ah bangma la mulo ziak un chingthei zaw diak tau in;

¹⁶muthei milim kisiam kawm, pawsal lim a hem, numei lim a hem ah kisiamte ziakin kisuthanghuai kiu inla;

¹⁷lei ah tâ ganhing lim leh, beingawn ah leng tha nei vacha a hem,

¹⁸lei ah bokvâk leh, lei nuai ah tui lak ah khawsa sanga chite him him lim a hem siam in la kisukpawlche lo ding uh ahi.

¹⁹Chuleh, van lam en ah la dakdok ua, LALPA la Pathian un van nuai nam tin lak ah a hawm gual sa nisa, thapi, aksite leh van ah thil um zosiate chu la mu phât ua leh, Pathian gual ah ho ding ah pui mang in um kiu in.

²⁰Himaleh, tu’ni hun ah LALPA golua mite la hi gual ua la hung um theina ding un, ama’n thîk haltuina lak ah kipat, Aiguptate khut ah kipat ngei khan a hun hukdok la hiu kha.

²¹Chuleh, nangmau ziakin LALPA chu ka chung in a lungna; Jordan lui ka gâl kâi ah, LALPA la Pathian un la lua ding ua a hun piakna gam chu ka lût lona dingin, a kipautiam hial ziang tai.

²²Kei vang Jordan lui gâl kâi lo ah zia gam ah hin thi den ta’ng ka tin, nanghaw vang gâl kâi in, zia gam pha tak chu lua in lau.

²³Ziaziakchun, LALPA la Pathian un la kiang ua thuthung a siam la bawsiat khâk lona ding uh leh, LALPA la Pathian un bangma lim leh a kibatpi him him siam a phal lo haw kha, la hetmil lona ding un chingthei tak in um tau in.

²⁴LALPA la Pathian uh hi, mi kâkmang mei gual leh doichilgil tak Pathian ahi ngâl a.

²⁵Cha leh tûte la hun nei ua, zia gam ah hin la hung chêndet phat ua leh, milim siamkawm mai a hem, thil dang lim him him a hem la siam ua, LALPA la Pathian uh ma-âng ah thil phalo bawl ah la kisubuak ua, la suklungnat phat ua leh;

²⁶Jordan lui gâl kâi ah, la hun luana ding gam ua kipat hi’mangthai ah um ding la hiu ti ei hiatpitu hi dingin lei leh van ka ko ahi; chêng sawt pua’n la tiu in, mangthai sik sek ding la hiu.

²⁷LALPA‘n nam tin lak ah hun thejak intin, namtin lak ah kipat a hun pui kit ding tawmcha bep suakcha ta’n lau.

²⁸Zia tak ah chun, khut ah siamkawm thing leh suangte, muthei lo, ho thei lo, ne thei lo, gimle hethei lo, pau thei lo milim kisiam pathiante hun ho in la tiu in;

²⁹zia kipat chun, LALPA la Pathian uh chu, la lungthim leh ngaituanau zosia ah, la hun hawl phat ua leh mu kit bep ta’n lau.

³⁰Tu’nung ah buaina zosia la hun tuak ua, la hung lungkham phat ua leh, LALPA la Pathian lam ua hung kihei kit in, a thu zawm ta’n lau.

³¹LALPA la Pathian uh chu ja’ngai thei tak Pathian ahi ziakin, hun nusia pua’n tin, hun hi’mangthai diak pua’n ah; la pu leh pateu kiang ah a thuthung tiamsa kha hemil ngailo ding ahi, a tia.

³²Nangmau um masang, tu’ma lam pek ah, lei ah um ding, Pathian in mihing a siam masang lam pek kha vak ngaitua unla; van mong langkhat lam ah kipat a langkhat lam tawp tiang in ngaitua him him tiam un: zia gual ah thil lopi leh a kibatpi him him hi a um lam la he ngai him him awm?

³³Nanghaw gual ah mei kuang ah kipat Pathian in a hona aw git he, dam nalai kua dang a um him him awm?

³⁴Ahiloleh, nam dangte lak ah patepnate, teptênate, thilmakte, kidona ah a khut thahât takte bânjak ah, tizat um tak ah Aiguptate khut ah kipat LALPA la Pathian un la mit mu ngei ua, ama â ding bîk ah a hun kipui daw gual ah hin, Pathian dang, zia gual bawlthei leh bawl kha hi la he’kha ngai him him awm?

³⁵LALPA bep hi Pathian ahi’n, ama tilo ngâl a dang umlo ahi, ti la hiatsak theina ding un la kiang ua tâklat ahi.

³⁶A thu hilna la hettheina ding un van ah kipat in a aw a hun hiatsak ah. Lei chung ah mei kuang lak ah kipat a aw la het zing lai un, a meipi nasa tak a hun etsak tai.

³⁷La pu leh pateu a la hepi ziakin, a suan leh pâkteu chu a hun têl ta’n. Ama’n hun umpi zing in, a khut thahât tak ziakin Aigupta gam ah kipat hun puidok in,

³⁸la masang ua nanghaw sâng ah nam lopi zaw leh hatzaw te del daw piak in, tu’ni tiang ah a gam uh la lua den theina ding un a hun pui lût a.

³⁹Ziaziakchun, LALPA chu Pathian, chung lam ah van leh nuai lam ah lei ah hin ama tilo a dang umlo ahi ti hen, la lunggil un ngaitua zing tau in.

⁴⁰Nanghaw leh la nung ua la tû leh chateu â ding ah thilpha ahi theina ding leh, LALPA la Pathian un a hun piakna gam ah la um sawt theina ding un, tu’ni ka thupiak dungzui ah hin ama dan leh a thupiakte chu zawm tau in.

⁴¹Ziazaw chun, Mosi’n Jordan lui, sualam gâl ah chun khawpi pathum a guat chuam a;

⁴²Insak Inthang ah kinei tua, kihuatna nei kha le hilo ah, mi pakhat chanpal ah that kha a um chun, zia khawpite lak ah khat pen pen ah chun a vatai lut ah, a bittheina dingin.

⁴³Zia khuate chu: Reubente gam tâng tawp ah um Bezer; Gadte gam ah Gilead ah um Ramoth leh, Manassehte gam ah Bashan ah um Golan te hi a hiu a.

⁴⁴Zia hi Mosi’n Israelte dan a piakte chu ahi.

⁴⁵Aigupta gam ah kipat a hung pawt daw nung ua, Mosi’n Israel te kiang ah a thugente, a chanchin leh a dan thuguatte tawh,

⁴⁶Aigupta gam ah kipat a hung pawt daw nung ua, Mosi tawh Israel chate’n, Jordan lui gâl Beth-peor phâicham mai jawn ah Sihon gam ah Amorte lengpa Heshbon ah a thalup danteu chu ahi.

⁴⁷Heshbon Lengpa Og chu tawh, Jordan luigâl sualam ah chun Amorte lenggam pani chu a lua tau a;

⁴⁸Arnon lui pang ah um Aroer ah kipat Sirion tâng (zia chu, Hermon a ti sek un) tiang in;

⁴⁹Jordan lui sualam Arabah gam zosia, Pisgah tângpang ah Arabah Tuisuagiat gei tiang ahi, ti in.