Read Vaiphei DAN LEKHABU 5 Bible Online

DAN LEKHABU 5 - Vaiphei bible

DAN LEKHABU 5

¹Mosi’n Israelte zosia a ko khawm ah, a kiang un: Aw Israel mipite haw, tu’ni la kiang ua ka gen ding dante leh dan thupiakte hi a la ngai tiam un; ziate hi gunchu tak ah la zil ua, la zop ding uh ahi.

²LALPA I Pathian un Horeb tâng ah khan, I kiang un thuthung a la siam ta’n:

³LALPA chun I pu leh pateu kiang ah hilo in, ei haw tu’hun ah hing leh dam ah um nalaite kiang ma ma hin zia thuthung hi a siam ahi.

⁴Tângvûm ah khan, mei kuang lak ah kipat in LALPA‘n kimâitua in a hun ho a;

⁵(zia lai ah chun LALPA thu la kiang un ka hun gen lat theina ding in, nang un mei kuang la lau ziak un, LALPA tawh nanghaw kikâl in ka la ding zing ah.) Tichun, ama’n zia gual hin a hun gen tai:

⁶Keima hi LALPA la Pathian uh, Aigupta gam ah suak leh sal ah la tânnau ah kipat hun puidokpa kha ka hi’n;

⁷keima tilo ngâl pathian dang him him la neilo ding uh ahi.

⁸Chung lam van ah umte mêlpu leh, nuai lam lei chung ah umte mêlpu a hem leh, tui lak ah chêngte lak ah bang a hem khat mêlpu milim la kisiam lo ding uh ahi.

⁹Zia tawhbang chu ho lo ah a nau le la sep lo ding uh ahi; keima LALPA la Pathian uh hi Pathian thikthusia, pate gitlona ziak ah a chate gawt sek, ei pâmpaite chu a suan thumna leh a suan li’na tiang ah gawt sek leh,

¹⁰ei hepi a, ka thupiak zawm taphot, a suan sangkhatna tiang ah le ja’ngaina hi’lang sek chu ka hi ngâl a.

¹¹LALPA la Pathian min chu diklo tak ah la mat ding ahi puai; LALPA‘n ama min diklo tak ah mang tapo chu gawt lo ah koi lo ding ahi ngâl a.

¹²LALPA la Pathian thupiak dungzui ah sabbath ni chu la chan diu, la mat thiantho diu ahi.

¹³Ni guk sung in la sep ding zosiau sêm zo un.

¹⁴A ni sagi ni hivang LALPA la Pathian sabbath ni ahi’n; zia ni’ hin na la sep lo ding uh ahi: nang leh la chapa leh, la chanu’n le, la suakpa leh la suaknu’n le, la bawngchal leh la sabiltung inle, la gancha taphot inle, la In sung ua gam dang mi leh, nangma gual tho ah la suakpa leh la suaknute le a chawl dam chiat theina ding un.

¹⁵Nanghaw le Aigupta gam ah khan suak leh sal in la la um tau ah; zia’ kipat chun LALPA la Pathian un, a khut hât tak leh a bânjak in a hun puidok la hiu ti kihe zing un; ziaziakchun, LALPA la Pathian un sabbath ni chang thiangtho dingin thu a hun piak la hiu.

¹⁶LALPA la Pathian thupiak dungzui un la nu leh pa ja un; tichun, LALPA‘n a hun piakna gam ah hin lamzang in la tiu in, la dam kum uh le sawt in ah.

¹⁷Tual that kin.

¹⁸Âng kawm kin.

¹⁹Gucha kin.

²⁰La Invêngte chung ah hiatpitu diklo in pang kin.

²¹La Invêngte ji la dawichâk lo ding ahi. La Invêngte In leh lou, suakpa leh suaknu, bawngchal hileh, sabiltung hileh, a thil neite him him la ên lo ding ahi, ti in.

²²Zia thute hi tâng chung ah khan mei kuang sûmpi leh khawthim lak ah kipat in, LALPA‘n aw ngai tak in la kikhopnau ah a la gen ta’n; ziate chu a belap ta puai. Ziate chu suangpêk pani chung ah zikdok in, ka kiang in ei pia.

²³Tâng chu mei kuang in a tuam a, thim lak ah kipat a aw la het lai ua khan, la phung tin luchangteu leh la upateu chun lei hun nai un;

²⁴ka kiang in, “En in, LALPA ka Pathian un a lopi dan leh a nasat dan chu ei etsak ah; mei kuang lak ah kipat in a aw chu I he tau ah. Tu’ni hin Pathian in mi a kihopi inle a hing tho ui ti I he tau hi.

²⁵Ziaziakchun, bang ding ah thi ding I hiu em? Zia meikuang nasa tak hin ei kâng tum ding ahi ngâl a; LALPA I Pathian uh aw I het kit uh chun thi ngei ngei ding I hiu.

²⁶Eihaw gual ah mei kuang lak ah kipat Pathian hing aw he’ ah, taksa hing zing kua a um ngai em?

²⁷Nang in vanai inla, LALPA I Pathian un a gen nop zosia chu va ngaitha’n. Chuleh, LALPA I Pathian un a hun hil zosia chu kei uh ei hilsawn in; zia chu ngaitha’n, zawm ziang ing kau,” la tiu a.

²⁸Ka kiang ah la thugen uh chu LALPA‘n a hia’n; tichun, LALPA‘n ka kiang in, “La kiang ah zia mipite thugen chu ka he tai; la kiang ah a thugen zosiau chu a dik hi.

²⁹Zia gual lungthim chu pu zing hita maleu chu ei lau zing intiu in, ka thupiak zosia chule zawm intiu in; tichun, amau leh a chateu â dingin kumkhua’n pha’n tin, lamzang ding hi ve un aw!

³⁰Chia inla, a kiang un, ‘La puanbûk chiat un lut tau in,’ vati’n.

³¹Nang la hileh vang, ka kiang ah hin ding zing in, a lua ding ua ka piakna mun a tun phat ua leh a zop ding uh ka thupiakte, dan thuguat leh thuthungte la hilsawn ding chu hun hil ing ka,” a tia.

³²LALPA la Pathian un thu a piak gual ah hi dingin chingthei un; changlam a hem, veilam a hem ah la pêtsan lo ding uh ahi.

³³La gam luana ding ua chu la dam sawt ua, lam zang tak ah la hin theina ding un, LALPA la Pathian un thu a hun piak gual tak in la zop ding uh ahi, a tia.