Read Vaiphei DAN LEKHABU 6 Bible Online

DAN LEKHABU 6 - Vaiphei bible

DAN LEKHABU 6

¹Tu’hin la gam luana ding mun uh la gâl kâi ua, la lua phat ua leh la zui ding uh, LALPA la Pathian un thu ei piak, nang uh ka hun hil ding ah thupiakte, dante leh vaihawmna dan thute chu ziate hi a hiu;

²nangma leh la tû leh chateu in LALPA la Pathian uh la lau ua, la dam sung siau a dan te leh a thupiakte la zui ua, la dam sung kumteu hi’sau a hitheina dingin.

³Ziaziakchun, aw Israelte haw, ngai tiam un; la suantuteu LALPA, Pathian in a kiang ua a la kitiamna dungzui a, bawngnawi leh khuaizu luanna, gampha ah nasa tak ah la hung pun ua, la lamzan theina ding un chingthei tak in zui tau in.

⁴Aw Israelte haw, ngai tiam un, LALPA I Pathian uh bep hi LALPA ahi.

⁵LALPA la Pathian chu la lungthim zosia’, la ngaituana zosia’ leh la hatna zosia’n la hepi ding uh ahi.

⁶Zia thute, tu’ni ka hun thupiakte hi la lungthim un vop zing un.

⁷In ah la um unle, khual gam ah la um lai unle; la lup unle, la thaw daw unle la chateu het ah la gennon zing ding uh ahi.

⁸Melchikna dingin la khutbân un but unla, la chalkiu inle kop unla;

⁹la kotkhak biang leh la kêlkot unle zik chiat un.

¹⁰LALPA la Pathian un la pau Abraham, Isak leh Jakob te kiang ah piak a la tiamna gam a hun pui lût phat leh, nang uh tha’ bawl hilo gampha, khawpi lian leh;

¹¹nang uh sepgimna hilo ah thilpha tincheng ah dim Inte; nang uh lai hilo tuikhukte; nang uh sepgimna pang lo ah grep huan leh Oliv thing dimna mun ah a hun pui lût a, niang leh tai ah la hun nêk phat uh leh;

¹²Aigupta gam ah suak leh saltânna In ah kipat nanghaw hun puidokpa, LALPA la hetmil lona ding un chingthei un.

¹³LALPA la Pathian uh chu lau unla, ama na bep sêm in, a min bep in kitiam sek un.

¹⁴La kîmvêl ua namdangte pathian leh pathian dang him him la biak lo ding uh ahi;

¹⁵la lak ua um LALPA la Pathian uh chu, Pathian thangsia hat ahi ngâl ah. LALPA la Pathian uh lungnatna chu la chung un kuangjak in, lei chung ah kipat hin hun hi’mangthai kha’n a.

¹⁶Massah mun ah la chet gual uh khan, LALPA la Pathian uh chu chian takiu in.

¹⁷LALPA la Pathian un hi’ding a tite, a thupiakte, a thu hiatsakte leh a dante chu gunchu tak in zawm un.

¹⁸La pu leh pateu kiang ah LALPA‘n a la tiamna gam la hun luau ah, la chan phat ua leh, lam zang tak ah la khawsak theina ding un, LALPA mit mu ah dik leh pha chu bawl unla;

¹⁹LALPA‘n a la tiamsa gual ah, la mau ah la mêlmateu zosia la naw daw theina ding un.

²⁰Tu’nung ah la chateu in, “LALPA I Pathian un thu ei piakte, ei hiatsakte, dan leh vaihawmna thute hi bang dan a hem?” ti ah a hun dot phat ua leh,

²¹nang un la chateu kiang in: “Aigupta gam ah chun Pharaoh suak in I la um un; himaleh, LALPA‘n a khut hât tak ah chun ei puidok ta ahi.

²²Chuleh, LALPA chun, I mit mu ngei un Aigupta gam chung ah te, Pharaoh chung ah te leh a In sung mite zosia chung in, teptênate, thilmak tak leh lau um takte a la bawl tai.

²³I pu leh pateu kiang ah piak ding ah a la tepna gam chu ei pui lût theina dingin, zia kipat chun ei la puidok ah.

²⁴LALPA chun bangchan ahle I phat theina ding un, LALPA Pathian I lau zing ua, tu’ni gual ah hing leh dam ah ei humbit theina dingin, zia dan zosia hi zawm dingin thu ei la pia ahi.

²⁵Ama thu ei piak gual ah, LALPA Pathian ma ah ei thupiak zosia gunchu tak ah I zop uh chun, ei uh chu a dik hiding I hiu,” ti’n a hil tai.