Read Vaiphei DAN LEKHABU 8 Bible Online

DAN LEKHABU 8 - Vaiphei bible

DAN LEKHABU 8

¹Dam ah la um ua, la pun jel ua, LALPA‘n la pu leh pateu kiang ah piak ding ah a tiamna gam la valua theina ding un, tu’ni ka thu hun piak hi gunchu tak ah la zui ding uh ahi.

²A thupiakte zawm ding la hiu em zawm lo ding ti leh, la lungthim uh hetna ding ah patepna la tuak uh leh, la kingaitawm theina ding ua, gamthip ah kum sawmli hial a hun pui dan zosia kha hezing tau in.

³Mihing hi an bep in a hing thei pua’n, LALPA kam ah thu pawt taphot in a hing zawu hi, ti la hun hetchian theina ding un, haksatna a hun tuaksak ah, la gilkial uh a phal ah, la pu leh pateu leh nangmau in la het ngailo uh Manna in a hun vâkvâ la hiu kha.

⁴Zia kum sawmli sung ah hin, la puansil leh chênteu a chul diak pua’n, la kengteu le a vûng diak puai.

⁵Mite’n a chateu a thunun gual un, LALPA la Pathian un a hun thunun ahi ti la lungthim un he tau in.

⁶Ziaziakchun, LALPA la Pathian uh thupiakte chu zawm dingin, a lampite chu zui in ama lau ta un.

⁷LALPA la Pathian un gam phatna mun, tui hing luanna phâizawl leh tâng gamte, tuinâk hing leh lei nuai lam ah tui hing umna mun,

⁸gehu bu leh barli bute, theipi leh theibufaite, Oliv thing leh khuaizu tamna mun,

⁹tasam lo ah an la nêk zing theina ding uh gam, bangma tasam ah la um lona ding uh, a suang ah thîk lâkdokna leh a tâng gam ah leinuai lam thil chawdawna ding munte chun, hun pui lût ding ahi ngâl a.

¹⁰Niang leh tai ah la nêk zaw phat ua leh, gam pha tak a piak ziak in, LALPA la Pathian uh chu la pâkcha ding uh ahi.

¹¹LALPA la Pathian uh hemil ah, tu’ni ka hun thupiak a thuthungte, a dan thute leh a vaihawmna thute hi zui lo ah la um lona ding un chingthei tak in um tau in.

¹²Vâ tak ah la hun nêk ua, chênna ding in pha tak la hun sak ua, la hung chên phat ua,

¹³la gan-gualteu leh bawng honteu, la sana leh dangkateu leh la nei thil zosiau a hung pun phat leh,

¹⁴hung kingaisâng talua’n, LALPA la Pathian uh, Aigupta gam ah suak leh sal tânna In ah kipat leh,

¹⁵gamthip lian tak leh lau um, gulgu hâtchi leh ainuvette lak ah kipat hun puidokpa la hetmil lo ding uh ahi. Ama’n suanggial lak ah kipat la dawn ding uh tui a luan dawsak a;

¹⁶la pu leh pateu in a het ngailo uh Manna’n a hun vâkvâ a; tichun, tu’nung ah la hung phat theina ding leh la kingainiam theina ding un, haksatna hun tuaksak in, a hun patep la hiu kha.

¹⁷La lungthim un, “Zia hausakna zosia hi ka thilhitheina leh keima hâtna ziak ah ka chan ahi,” ti kiu in.

¹⁸LALPA la Pathian uh hezing un; tu’ni a hun bawl piak gual hin, la pu leh pateu kiang ah a la kikam tiamna thuthung namdetna dingin, hausakna go leh gamte lakkhawm theina a hun pia ahi zaw ngâl a.

¹⁹Ahi’n la, LALPA la Pathian uh chu la hetmil ua, pathian dang la zui ua, a nau sêm ding ah la biak him him uh chun, mangthai ding la hiu ti tu’ni hin ti tak tak in ka hun hil khol la hiu.

²⁰La masang ua nam dangte LALPA‘n a hi’mang gual in, nang unle LALPA la Pathian uh aw la ngaisak lo ua leh, hun hi’mangthai ngei ngei ding ahi ngâl a.