Read Vaiphei DAN LEKHABU 9 Bible Online

DAN LEKHABU 9 - Vaiphei bible

DAN LEKHABU 9

¹Aw Israelte haw, ngai un! Nangmau sâng ah tam zaw leh hatzaw te, a khawpiu det leh a kulbâng uh van supha khop ah sangte suandok dingin tu’ni hin Jordan lui gâl kâi ding la hitau.

²Anakim suan ah milian leh hât tak takte umna ngei chu ahi ti la hiatsau ahi ngâl ah. Amau chungchâng ah, “Anakimte kua’n do ngam ding a hem?” a ti sek uh la he ta’ngâl un.

³Tu’ni hin LALPA la Pathian uh chu kâng mang sek mei kuang gual ah la ma lam ua chia pek ahi ti he tau in; LALPA‘n la kiang ua a la tiamsa gual khan, amau la suandawu ah, la hi’mangthai theina ding un hun do piak in, hun zaw piak ding ka hi ti he tau in.

⁴LALPA la Pathian un a hun naw daw piak zaw phat leh la lungthim un, “Keimau dikna ziakin zia gam hi lua ding ah LALPA‘n ei pui lût ahi,” ti him him kiu in; zia gam ah chêngte a la thanhuai ziak un, LALPA‘n la masang un a hun naw daw piak ahi zaw ngâl a.

⁵La dikna ziak leh la lungthim uh a dikna ziak ah zia gam hi lua ding la hi puau ah; zia gam ah chêng namte thanhuaina ziak ah hin, LALPA‘n la suantuteu Abraham, Isak leh Jakob kiang ah a thutep namdet dingin, LALPA la Pathian un amau chu a hun suan dawsak la hizaw ngâl un.

⁶Nangmau dikna ziak ah zia gampha hi, LALPA la Pathian un a hun piak ahi puai, ti he tau in; mi lochal nam la hi’ngâl un.

⁷Gamthip ah LALPA la Pathian uh bang gual tuk ah a la hi’lungna la hiu em ti hezing unla; Aigupta gam ah kipat la hung pawt daw ua kipat, tu’ni zia tak mun la hung tun tiang ua LALPA chung ah hel zing nalai la hiu hi.

⁸Horeb mun tiang in LALPA la chok lungnau ah, hun that gam nuam hial ah a lungnat kha.

⁹La kiang ua LALPA‘n thu a thunna suangpêk la ding ah ka va chia to lai ah khan, ni sawmli leh jan sawmli zet ka vaum ah; anle ka ne pua, tui le ka dawn puai.

¹⁰Chun, LALPA‘n suangpêk pani, Pathian khutzung ngei ah zik chu ei pia; zia suangpêkte ni ah chun la kikhop niu ah tâng ah kipat mei ah LALPA‘n la kiang ua thu a gen zosia kha a chuang a.

¹¹Ni sawmli leh jan sawmli a tin phatin, thuthung kizikna suangpêk te ni chu LALPA‘n ei pia tai.

¹²Ziaphatchun, LALPA‘n ka kiang in, “Tho inla, kin tak in chia suk in, Aigupta gam ah kipat la mi puidawte chu pawlche tak in a um zo tau hi. Ka thupiakte chu kin tak in a kihei mangsan tau in; a milim ding uh a sung tau hi,” ti’n ei hil a.

¹³Ziazaw chun, LALPA‘n ka kiang in, “Zia mite hi mi lochal tak a hiu ti ka hechian tai.

¹⁴Amau hi’mangthai ding leh van nuai ah a min uh thaimang dingin kei ngen in ei nusia mai ta’n! Nangma la hileh vang, amau sâng ah hatzaw leh tam zaw’n hun siam ing ka,” a tia.

¹⁵Tichun, ka kihei ah, tâng chu meikuang in a tuam zing lai in ka hung kum suk ta’n, thuthung sutna suangpêk te ni chu ka khut in ka chawi gêl a.

¹⁶Ziaphatchun, LALPA la Pathian chung un thil sual la la bawl tak tak tau, bawngno lim la la sung tau ah; LALPA la Pathian un a thu hun piakte la la pêtsan tau hi ti ka mu tai.

¹⁷Tichun, suangpêk te ni chu ka khut in ka la, ka sep tha ta’n, la mit mu ngei un ka sep kek tai.

¹⁸Ziaphatchun, tu’ ma ka bawl gual in LALPA ma-âng in, ni sawmli leh jan sawmli zet ka bokkhup ta’n, LALPA mit mu ah thil sual huaisia tak bawl ah, a lung la hi’nat tâk ziak un, bangma ne lo leh dawn lo in ka la um ta ahi.

¹⁹La chung ua LALPA a lungnat ma ma ziakin, la leng un hun hi’mangthai ziang kha’n ah ti ka lau ma ma ngâla. Ahi’n, zia hun ah hinle LALPA‘n ka dotna ei ngaithâk piak nalai a.

²⁰Chuleh, LALPA chu Aron hinna hi’bei nuam hial in a chung in a lungna’n; ahi’n, Aron â dingin zia hun ma ma ah chun ka dot piak tai.

²¹La gitlonau ziak ah la bawngno lim siam uh chu la’n, mei in ka hal ah, ka gawtbuang ah, leivui gual ah nêl in ka gawtnêl ah; zia kigawtbuang chu tâng ah hung luang suk lui ah chun ka pai lut tai.

²²Taberah mun leh Massah mun leh Kibroth-hattaavah munte ah hin, LALPA lungnatna la chok tho tau a.

²³“Gam ka hun piakna chu lua dingin chia to un,” ti ah LALPA‘n Kadesh-barnea mun ah kipat a hun sawl daw lai ah khan, LALPA la Pathian uh thupiak chu la nial ua, ama la taksang puau ah, a thule la ngai puau a.

²⁴Nanghaw ka hun het ni ah kipat in LALPA thu dodâlte la hizing ui.

²⁵LALPA‘n nanghaw a hun hi’ mangthai guat lai ah khan, LALPA âng ah ni sawmli leh jan sawmli hial ka bokkhup a;

²⁶LALPA kiang in, “Aw LALPA PATHIAN, la lopina la tatdaw, khut hât tak mai ah Aigupta gam ah kipat nangma mite leh la gochan ding ah la puidawte hi’mangthai ziang kin.

²⁷La suak Abraham, Isak leh Jakob te kha hezing inla; zia mite lochal dan, gitlo dan leh a phat lo dan teu hi limsak kin;

²⁸achutiloleh, lei puidawna gam ah mite chun, ‘LALPA‘n a gam tiam ah a pui tung theilo ziak leh, amau haw a huat ziakin, gamthip ah thigam ding ah a puidaw ahi,’ ti kha’n au.

²⁹La thilhitheina lopi tak leh la ban jak ah la puidaw, la mite leh la gochante chu ahi ngâl un,” ka tia.