Read Vaiphei JOHAN 11 Bible Online

JOHAN 11 - Vaiphei bible

JOHAN 11

¹Mari leh a suapinu Martha te umna Bethani khua chun Lazar kiti, mi pakhat a dam pua’n.

²Zia Mari chu LALPA sathau hung nu’, a sam ah a keng hung thiak kha a hia; zia damlo Lazar chu a suapi ahi.

³Chun, a suapinute chun, a kiang in mi a hun sawl ua, “LALPA, hung en tia, la hepi kha a dam puai,” a hung tiu a.

⁴Jesu’n zia chu a het phat in, “Zia natna hi thina ding ahi puai, Pathian lopina ding ahi zawi, Pathian Chapa chu ziaziak hin chawihoi ah um ding ahi,” a tia.

⁵Jesu chun Martha leh a suapinu leh Lazar chu hepi maleh,

⁶a dam puai ti a het nung in, a umna ngai ah chun ni ni’ a châm nalai hi.

⁷Zia nung ah chun, a nungzuite kiang in, “Judea gam lam in chia kit tai tiu,” a tia.

⁸A nungzuite chun, a kiang in, “Hotupa, tu’ma deu khan Judate’n suang ah hun se a guau ah, tu’hin chia kit ding la ti a hem?” a tiu a.

⁹Jesu’n a dawnhu, “Ni khat sung hin dakkal sawm leh ni a um hilo a hem? Sûn ah chiate chu kipal pua’n au, zia khawvel vâk hi a mu zing ziak un.

¹⁰Himaleh, jan ah a chia chun, a kipal sek hi, amau ah chun vâk a umlo ziakin,” a tia.

¹¹Zia thute chu a gen zaw in, a kiang un, “I gualpau Lazar kha a ipmu tai; a ipmu kaitho dingin chia ding ka hi,” a tia.

¹²Ziaphatchun, a nungzuite chun, “LALPA, a ipmu ahileh, a pha lam hita’n a” a tiu a.

¹³Himaleh, Jesu chun a thi thu a gen ahi zaw ngal ah; amau chun a ipmu chawldam mai mai hiding in a gingchau a.

¹⁴Ziaziakchun, Jesu’n kichian tak in, “Lazar kha a thi tai.

¹⁵Nang un la taksan theina ding un, zia tak ah ka umlo chu nang uh â dingin ka kipak ahi; banghilehle, tu’hin hung un, a kiang in vachia hitiu,” a tia.

¹⁶Tichun, Thoma, Diduma a tiu chun, nungzui dangte kiang ah chun, “Ei hawle chia hitiu in, ama tawh vathikhawm hitiu,” a tia.

¹⁷Jesu a tun phat chun, ama chu ni li hial thân ah a la um ahi tai ti a he ngal a.

¹⁸Bethani khua chu Jerusalem tawh kinaicha ahi’n, a kikâl uh chu mêl ni ding vêl bep ahi;

¹⁹Mari leh Martha kiang ah chun a suapipau ziak ah thamuan dingin Judate tam tak a hung kikhawm un.

²⁰Martha chun Jesu a hung hi ti a het phat in, a lamtua dingin a vachia ah; Mari chu Insung in a chu zing hi.

²¹Martha’n Jesu kiang in, “LALPA, zia tak hin a la um hilechin ka suapipau thilo ding hi ve’n.

²²Himaleh, tu’hin le, la dot taphot chu Pathian in hun pia’n ah ti ka hia’i,” a la tia.

²³Jesu chun, “La suapipau hung thokit ding ahi,” a tia.

²⁴Martha chun a kiang in, “Nitawp ni thawkit ni tak leh hung tho kit ding ahi ti ka hia’i,” a tia.

²⁵Jesu’n a kiang in, “Keima hi thawkitna leh hinna chu ka hi, ei gingcha taphot chu thi maleule hing zing in au;

²⁶chuleh, hing ah, keima ei gingcha chu thi ngai ta pua’n au. Zia chu la taksang em?” a tia.

²⁷Ama chun, a kiang in, “Taksang e LALPA, nangma hi Messiah, Pathian Chapa, zia khawvel ah hung ding pa chu la hi ti ka taksang hi,” a tia.

²⁸Zia a gen zaw ah chun, a chia ah, a gûkcha’n a suapinu Mari chu a ko ah, “Hotupa a hung ta’n, a hun ko hi,” a tia.

²⁹Ama’n zia chu a het phat in, kin tak in a hung ding ah, a kiang lam ah chun a hung a.

³⁰Ziaphatchun, Jesu chu khawpi sung a hung lut naipua’n; Martha tawh a kituakna mun ua khan a la um zing nalai a.

³¹Judate a Insung ah ama thamuan ah a la umte chun, Mari kin tak ah ding ah hung pawt a mu phât un, a hun zui tau a, “Ama chu thân ah vakap ding ah chia ding hi’n a,” a tiu a.

³²Mari chu Jesu umna a hung tun ah ama a mu phât in, a kengbul in a bokkhup ah, a kiang in, “LALPA, zia tak ah hin a la um hilechin ka suapipa hi thilo ding hive’n,” a hun ti kit a.

³³Jesu’n ama leh Judate a hun zuite kâ chu a mu in a lunggil in a thûm ah, a lung a khoi ma ma a.

³⁴“Ama chu khoi ah la vui uh a hem?” a tia. Amau chun, “LALPA, hung in la, hung en in,” a tiu a.

³⁵Jesu a kap tai.

³⁶Judate chun, “En tiam un, a hepina lawm lawm e!” a tiu a.

³⁷A lak ua khenkhatte chun, “Zia mitthûmte mitle hi’vâk sekpa hin, zia pa thi lona ding hile hitheilo a diam?” a tiu a.

³⁸Jesu chu lunggil lam ah thûm kawm in, thân lam ah chun a hung a. Zia chu suang kikhuak hawm, suang lian tak khat in a sit ahi’n.

³⁹Jesu chun, “Zia suang hi likdok un,” a tia. Martha, a thipa suapinu chun, “LALPA, tu’hin vang ui ta’n ah, a thina ni li ei tai,” a tia.

⁴⁰Jesu’n a kiang in, “La gin leh Pathian lopi zia mu’n la, ka ti pua a hem?” a tia.

⁴¹Tichun, suang chu a likdok tau ah, Jesu’n van lam a en a, “He Pa, ka thu lei ngaithâk piak zing ziakin ka kipak hi.

⁴²Keima hi lei la ngaitha zing hi ti le ka hia’i; ahi’n, zia mipite, ka kiang ah dingte ziak ah hin nang in lei sawl ka hi dan a hun taksan theina ding un, zia hi ka ti ahi,” a tia.

⁴³Zia a hun ti zaw ah chun, aw ngai tak in a hung kiko ah, “Lazar, hung pawt in,” a tia.

⁴⁴Ziaphatchun, mithi chu a khut leh kengte puan ah kituam in, a mâile mâituamna kituam zing kawm in a hung pawtdok tai. Jesu’n, a kiang un, “Phel unla, chiasak un,” a tia.

⁴⁵Mari hun zui Judate tam tak haw khan, Jesu thilhite chu a mu phât un, ama chu a hun gingcha tau a.

⁴⁶Himaleh, khenkhatte chu Pharisaite kiang lam in a chiau ah, Jesu thilhi’te chu a valawtsia tau hi.

⁴⁷Ziaphatchun, thiampu lalte leh Pharisaite chun vai a hawm khawm un, “Zia pa hin thilmak tak tak a hi’ta’n, bang law ding I hitau em?

⁴⁸Hitia hi I thathawt zing ua leh, ama hi mi zosia’n hun gingcha’n tiu in, zia tak chuleh Rom mite hung intiu in, I mun thiangtho leh I nam uh hi hung susia ding a hiu,” a tiu a.

⁴⁹Zia kum ah thiampu lianpen ah hung pang Kaiapha a tiu chun, a kiang un, “Bangma la hepuau hi!

⁵⁰‘Nam pumpi a manthai sâng in mi pakhat a thi chu a phazaw ma ma hi,’ ti hi la ngaitua kha puau ah ahi,” a tia.

⁵¹Zia a thu gen chu ama lungthim ah kipat a gen a hipua’n, zia kum ah chu ama thiampu lianpen a hung hi’n, ziate nam sik ah chun Jesu a thi ding a hi, ti a genlawkna a hizawi;

⁵²zia namte â ding bep chule hilo in, Pathian chate gam tin ah kithejak ah umte a puikhawm kit theina dinginle ahi.

⁵³Tichun, zia ni kipat chun, Jesu chu a tha theina ding uh a ngaitua khawm tau hi.

⁵⁴Jesu chu Judate lak in langchang tak in a tawi ta pua’n; gamthip tawh kinai khawpi khat, Ephraim kiti chun a chia ah, zia tak ah chun a nungzuite tawh a um zing tau hi.

⁵⁵Judate Chiakân Kût a hung nai ta’n; mi tam tak chu a gam ua kipat in, Jerusalem ah Chiakân Kût masang ah a la kithiansak dingin a hung sau sau tau hi.

⁵⁶Amau chun Jesu a hawl ua, tempul ah chun a ding ua, “Ama chu Kûtna hung dingin la gingcha em?” a kitiu a.

⁵⁷Thiampu lalte leh Pharisaite chun, ama chu a mat theina ding un, Jesu umna he taphot in a hun hil diu ahi, ti’n thu a than tau a.