Read Vaiphei JOHAN 12 Bible Online

JOHAN 12 - Vaiphei bible

JOHAN 12

¹Chiakân Kût hun ding ni guk masang chun, Jesu chu Lazar, a thisa a kaithaw kitna Bethani khua khan a hung kit a.

²Zia tak ah chun, ama jan an a nêksak un. Martha’n nêk a bawl ah, Lazar chu Jesu kichutpite haw lak in a pang a.

³Mari chun spiknard sathau gimtui, man tam tak a hun chawi a, Jesu keng a nu’ zaw in a sam in a thiak ah. Insung zosia chu zia sathau gimtui chun a jel suak tai.

⁴Himaleh, Simon chapa Juda Iskariot, (ama matsak dingpa chun,)

⁵“Bangatia, zia sathau hi dangka za thum ah zawk ah, migentheite kiang ah piak hizaw lo a hem?” a tia.

⁶(Migentheite a khawtua ziak ah a gen ahi pua’n; ama hi mi gucha a hia, dangka dip a kol ah, a sung ah um chu a lak sek ziakin ahi zawi.)

⁷Jesu’n, “Amanu chu subuai kiu in, zia chu ka kivui ni â ding ah a bawl lawk ahi.

⁸Migentheite chu la kiang un um zing ding a hiu in, keima hi vang um zing lo ding ka hi,” a tia.

⁹Juda mipite chun, Jesu chu zia mun ah chun a um hi ti a hun het phat un, ama mu nuam leh, a thisa Lazar a kaithaw kit kha mu nuam kawm in a hung khawm tau a.

¹⁰Tichun, thiampu lalte chun Lazar le tha theina ding a ngaituau a;

¹¹ama ziak ma ma ah chu Judate tam tak in amau nusia in, Jesu a ginchâk khawlaw tau hi.

¹²A jing ah chun Kûtna hung mipi tam takte chun, Jerusalem ah Jesu a hung hi, ti a hun he tau a.

¹³Tichun, tûmbâkte a lau ah, Jesu lamtua dingin a chiau ah, a hung kiko ua: “Hosanna! LALPA min ah hung, Israelte Lengpa chu a hampha na e!” a tiu a.

¹⁴Jesu’n sabiltungno a mu’n a chung ah a chuang a:

¹⁵“Lau kin, Zion chanu! En in la Lal chu, sabiltungno chung ah chuang in a hung hi,” ti kizik gual khan.

¹⁶Zia thute chu a lim in a nungzuite’n a la hethiam puau ah; himaleh, Jesu chohoi ah a hung um phatin, a chung thu a la kizik ahi dan leh, ziaziak ah chu hung tung ahi dante le a hun hechian tau hi.

¹⁷Ziaphatchun, Lazar a kaithaw lai ah mipi a kiang ah a la umte khan, thân kiang ah a thil hiatteu kha a hilsawn tau a.

¹⁸A thilmak bawlte a la muu ah, a het ziak tak ua hin, ama lamtua ding ah hungle ahi him ui.

¹⁹Pharisaite chu a kiho ua, “En un, bangma la law theilo uh hi; en tiam un, khawvel ah mite’n a nung a zui tau hi,” a tiu a.

²⁰Zia Kûtna Pathian ho ding ah hungte lak ah chun, Grik mi lawi khatle a hung pang un.

²¹Ziate chu Galili gam ah Bethsaida khua um Philip kiang in a hung un, “He pu, Jesu mu ka nuam ui,” a hung tiu a.

²²Philip chu a hung ah, Andria kiang in a gensawn a; chuleh, Andria leh Philip chun Jesu a vahil tau hi.

²³Jesu’n a la dawnhu ah, “Mihing Chapa hi chawihoi ah a um hun hung tung ding ei tai.

²⁴Titakzet in ka hil la hiu, Bu changkhat lei ah a kiak ah, a thizet lo chun, a ngai ngai in a um zing sek hi; himaleh, a hung thizet tak leh chu tam tak in a ga sek hi.

²⁵Kuale a hinna itcha chun chân intin; kuale, zia khawvel ah a hinna itcha lo chun, kumtuang hinna nei in a.

²⁶Kua’nle ka na a sep ding chun ei zui hen; keima umna chun ka nasemte chule a um diu ahi; kua’nle ka na a sep chun, zia mi chu ka pa’n chawihoi in a”.

²⁷Tu’hin vang ka lung a gim hi. Aleh, bang ka gen ta diam? He Pa, zia dakkal ah kipat hin ei hukdok in; himaleh, ziaziak tak ah hi tu’hun ah um ka hingal a.

²⁸He Pa, la min hun chawisâng in, a tia. Ziaphatchun, van ah kipat in aw a hung pawt a, “Ka chawisâng tai, hun chawisâng kit ngen ing ka,” a hun tia.

²⁹Mipi a kiang ah dingte chun zia chu a hiau ah, van-gi ahi, a tiu a; khenkhat chun, vansawlchâk in ama a hun ho ahi, a tiu a.

³⁰Jesu’n a kiang un, “Zia aw chu kei â ding ah hung pawt a hipua’n, nangmau â ding ahi zawi.

³¹Tu’ ma ma hin zia khawvel hin vai a hawm hi; tu’hin zia khawvel vaihawmpa hi paidaw ah um ding ahi tai.

³²Chun, keima hi lei ah kipat khaikâng a ka um tak leh, mi zosia keima lam ah huai khawm ing ka,” a tia.

³³Zia thu chu a thi ding dan a genna ahi.

³⁴Mipite chun a hun dawnhuu ah, “Dan Lekhabu ah khan Messiah chu kum tuang ah um ding ahi ti ka hiau a; aleh, nang in bangtidan ah Mihing Chapa hi khaikâng ah um ding ahi, la ti’thei a hem? Zia Mihing Chapa hi kua a hem?” a tiu a.

³⁵Jesu’n, “Zia vâk hi hun chomkhat sung la lak un a um tadi hi, vâk la nei sung un chiau in, dan leh la chung un thimna hung tung intin, kuale thim lak ah tawite chun a chiana diu a he puau hi.

³⁶Vâk la lak ua a um sung hin vâk hi gingcha tau in, vâk chate la hung hitheina ding un,” a tia. Jesu’n zia thu chu a gen zaw chun a chia mang ah, amau lak ah kipat chun a kisêl mang tai.

³⁷Amau haw ma-âng in thilmak zia jatzojai chu bawl maleh ama a ging diak puau hi.

³⁸Jawlnei Isai in a la gen kha a guitunna ding ahi: “LALPA, keimau thugen kua’n a taksang em? Chuleh, LALPA bân chu kua kiang ah suklat in a um em?” tia a la gen kha a guitunna dingin.

³⁹Ziaziakchun ahi, a taksan theilo uh, Isai in a gen kit a:

⁴⁰“Ama’n a mit uh a hi’thûm ah, a lung uh ahi tâk ah; a mit ua a mu lo ua, a lungthim ua a het thiam lo ua, a lung hei lona ding un, achutiloleh a la hi’dam kha ding ka hi,” a ti kit gual in.

⁴¹Zia thute hi Isai in a lopi dan a mu’n, a kiang ah thu a gen lai ah kha a la zik ahi.

⁴²Ahi’n la, thuneite lak ah le mi tam tak in ama chu a hun ging tau a; himaleh, kikhopna In ah kipat nawdaw a um khak diu a lau ziak un, Pharisaite ziakin langchang tak in a kipuang ngam puau hi.

⁴³Pathian pakchakna sâng in mihing pâkchâkna a hawl zaw ngal un.

⁴⁴Chun, Jesu chu ngai tak in a kiko a, “Kuale ei ging chu, keima ei ging mai hilo in, ei sawlpa ging a hizawi.

⁴⁵Kuale keima ei mu chu, ei sawlpa mu ahi.

⁴⁶Kei khawvel salvâk ding ah hung ka hi, kuale ei ging chu thim lak ah a um zing lona ding un.

⁴⁷Kua’nle ka thu a hetnung ah le ei taksan diak lo chun, a chung thu keima’n ka tan puai: khawvel vaihawm ding ah hung ka hipua’n, khawvel hukdam ding ah hung ka hizawi.

⁴⁸Kuale, keima ei doi lo ah, ka thu mang nuam lo chun, a chung thu tan piak ding pakhat a nei hi: a kiang ah ka thugente hin, nitawp ni tak leh amau chung thu hun tan piak ding ahi.

⁴⁹Keima phuakkawm in thu ka gen puai, Pa ei sawlpa’n ka gen ding leh ka hil ding thu chu ei pia zaw ahi.

⁵⁰Ama thupiakte chu kumtuang hinna ahi ti ka hia’i; ziaziakchun, ka thugen taphot hi Pa ei hil gual ah ka gen ahi,” a tia.