Read Vaiphei JOHAN 13 Bible Online

JOHAN 13 - Vaiphei bible

JOHAN 13

¹Chiakân Kût ma deu ah chun, Jesu’n zia khawvel hi nusia ah, Pa kiang ah a chia hun tung ding ahi tai ti a hia’n. Ama mi, khawvel ah um, a hepi sekte chu a tawp tiang in a hepi zing a.

²Chuleh, jan an a nêk lai un, diabol in Simon chapa Juda Iskariot lung sung in ama matsakna ding lungthim a la koi zo ta’n.

³Jesu chun, Pa’n bangkim a khut ah a koi leh, Pathian ah kipat hung ahi’n, Pathian kiang ah chia kit ding ahi dante chu hezing in;

⁴a jan an nêknau ah chun a hung kipan ah, a puansil a hun koitha, kithekna puan khat a hun la, a kawng in a vei a.

⁵Kuang ah tui a sung ah, a nungzuite keng a sil pan a; kithekna puan a kawng ah a vei chun a thiak malam pek a.

⁶Simon Peter kiang a hung tun phatin Peter chun, “LALPA, nang hîl hial in ka keng sil ding la hem?” a tia.

⁷Jesu’n a dawnhu, “Ka thilbawl hi tu’hin la henai puai, tunung tak leh hun he na’n la,” a tia.

⁸Peter chun, “Ka keng sil him him pua’n la,” a tia. Jesu’n a dawnhu, “Ka hun sil piak lo chun, keima ah hin bangma chan nei pua’n la,” a tia.

⁹Ziaphatchun, Simon Peter in, “LALPA, chutichu ahileh, ka keng bep hilo in, ka khut leh ka luchangle lam,” a ti kit a.

¹⁰Jesu’n a kiang in, “A kisilsa chu a keng longal sil a ngai puai, a pum in a thiang suak nai; nanghaw la thiang nau hi; la leng ua vang hilo in,” a tia.

¹¹Ama chun a matsak ding pa chu a hezing a; ziaziakchun, “La leng un vang la thiang puau hi,” a ti ahi.

¹²Chun, a keng uh a sil zaw phatin a puan a la, a hung kichu kit ah, a kiang un, “La chung ua ka thilbawl hi a ngaina la hiau em?

¹³Nang un keima hi LALPA leh Hotupa lei ti sek un; la ti dik ui, hile ka hi him ahi.

¹⁴Keima la LALPAu leh Hotupau inle la keng uh ka hun sil piak ahi leh, nang uh le la keng uh la kisil piak sek diu ahi.

¹⁵La chung ua ka bawl gual ah nang unle la bawl ding dan uh la etton ding un ka bawl ahi.

¹⁶Titakzet in ka hil la hiu, suak a pu sâng in a lian zaw ngai puai; chuleh, sawl ah um chule a sawlpa sâng in a lian zaw ngai puai.

¹⁷Zia thilte hi la het ua, la hun bawl ua leh hampha ma ma in lau.

¹⁸La leng ua thu ka gen ei puai, ka têlte chu ka hia’i; ahiziak in, ‘Ka vaithum nepa’n ka chung ah a keng khawtal a lâm tai,’ ti Pathian Lekha thu’n a gen kha a guitun theina ding ahi.

¹⁹Tu’hin, a hun tun ma ka hil la hiu, zia chu a hung tun tak leh keima ka hi, ti hun hechian ta’n lau.

²⁰Titakzet in ka hil la hiu, kuale keima’n ka sawlte a la lop chun keima ei lop a hiu a; kuale keima ei lop chu keima ei sawlpa lop a hiu,” a tia.

²¹Jesu’n zia thute chu a gen lai in, a lunggim ma ma ah, kichian tak in a gen a: “Titakzet in ka hil la hiu, la lak ua mi pakhat in ei matsak ding la hiu,” a tia.

²²Ziaphatchun, nungzuite chu a ki-entuau ah, kuapen a gen ahila a hepuau a,

²³zia lai tak ah chun nungzuite lak ah pakhat, Jesu’n a hepi chu a âng in a kinêl a;

²⁴Simon Peter chun zia pa kiang ah chun, kua a ti’na a hem ti vak dong dingin a sawl a.

²⁵Tichun, ama chu Jesu âng ah chun a kinêlchâk ngai ah chun a kinêlcha zing a, “LALPA zia chu kua a hem?” ti’n a dong a.

²⁶Jesu’n, “Vaithum hal ka dia ah, ka piak pen pen chu ahi,” a tia. Tichun, vaithum hal chu a la a dia zaw in, Simon chapa Juda Iskariot chu a pia tai.

²⁷Zia vaithum hal kidia chu a nêk phatin, a sung ah Setan a lut ngal tai. Jesu’n a kiang in, “La hi’ ding chu vahi’ziang ta’n,” a tia.

²⁸Himaleh, a an nêkpite chun, bang hi’ding a gen a hile a hepuau hi.

²⁹A lak ua khenkhat chun, Juda chun dangka dip a vop ziakin, “Kûtna mat ding thil poimaw vachaw ding ah Jesu’n a sawl a hem, ahiloleh, gentheite kiang ah piak ding bang a hem chaw ding ah a sawl hi’n a,” a tiu a.

³⁰Zia vaithum hal kidia chu a ne, a pawtdok ngal tai; zia hun chu jan ahi.

³¹Ama a pawt daw nung in Jesu’n, “Tu’hin, Mihing Chapa hi choihoi in a um tai, ama ziakin Pathian le choihoi in a um hi.

³²Ama ah Pathian choihoi ah a um chun, Pathian in ama chule chawihoi ngal in a.

³³Naute haw, la kiang un chomkhat bep um ding ka hi tai. Nang un ei hawl in lau; chuleh, Judate kiang ah, ‘Ka chiana ding ah hung thei pua’n lau,’ ti ah ka gen gual khan, tu’hin nang uh kiang inle ka gen a hi.

³⁴Thupiak thak ka piak la hiu, kihepiu inla, keima’n nanghaw ka hepi gual hin nanghaw le kihepiu in.

³⁵La kihepiu chun mi zosia’n ka nungzuite la hiu ti hun hethei ta’n au,” a tia.

³⁶Simon Peter chun a kiang in, “LALPA, khoi ah chia ding la hem?” a tia. Jesu’n a dawnhu a, “Ka chiana ding ah hin tu’hin ei zui thei pua’n la tin; ahi’n, chomkhat zaw tak leh ei hun zui kit thei ta’n la,” a tia.

³⁷Peter chun a kiang in, “LALPA, bangatia em tu’hi ka hun zui theilo ding? Nangma ziakin ka hinnale pia’ng ka,” a tia

³⁸Jesu’n a dawnhu, “Keima ziakin la hinna maw la piak ding? Titakzet in ka hil la hi, âk khua’n ma’n thum vei ei kilepsan ding la hi,” a tia.