Read Vaiphei JOHAN 16 Bible Online

JOHAN 16 - Vaiphei bible

JOHAN 16

¹La kisui lona ding un zia thute hi la kiang un ka hun gen ahi.

²Sunagog ah kipatte’n hun kaidok intiu in; ahi, kuale nangmau hun that tapo chu Pathian ho in kingai in au, zia tawhbang hun chu hung tung pai ding ahi.

³Pa leh keima ei het lo ziak un, zia thilte chu hun bawl in au.

⁴Himaleh, zia thute hi ka gen masak la hiu, a hun a hung tun tak leh ka thugente hi la hun hetdaw theina ding un. A lim lai khan la kiang ua ka um zing ziakin, zia thute hi a ka hun hil lo ahi.

⁵Tu’hin ei sawlpa kiang ah chia ding ka hi tai; nanghaw lak ah khat cha’n le, “Khoi ah chia ding la hem?” ti’n lei dong puau hi.

⁶Himaleh, zia thute chu la kiang ua ka gen ziak hin, la lungthim uh lungngaina’n a dim zo tai.

⁷Abang chu hileh, thutak ka hun hil la hiu; ka chia mang ding hi nanghaw â dingin a phazaw ahi; kei chia mang lo leng Genpiakpa chu la kiang un hung lo ding ahi; himaleh, ka chia tak leh ama chu la kiang un hun sawl ding ka hi.

⁸Ama a hung tun phat leh, gitlona thute, dikna thute leh vaihawmna thute’n khawvel a thiamlo dan hun hiatsak in a.

⁹Gitlona thu’n thiamlo chang in au, keima ei gin lo ziak un.

¹⁰Dikna thu’n thiamlo chang in au, Pa kiang ah chia ding ka hi’n, nang un lei mu tâk lo ding ziak un;

¹¹vaihawmna thu’n thiamlo chang in au, zia khawvel vaihawmpa hi a dik lo ziak in.

¹²La kiang un gen ding tam tak ka nei nalai hi; himaleh, tu’hin la tin tadi puau hi.

¹³Banghilehle, ama Thagau thutak chu a hung tun tak leh, thutak zosia’n hun pui lût intin, ama phuak kawm in thu gen pua’n tin, a het tapote chu gen intin, thil hung tung dingte chu hun hiatsak in a.

¹⁴Keima ei chawisâng in a. Ama chun kei â zosia chu la’n tin, la kiang un hun taklang in a.

¹⁵Pa nei zosia chu kei â ahi. Ziaziakchun ahi, Kei â chu la’n tin, la kiang un hun taklang ding ahi, ka ti kha.

¹⁶Chomkhat sung nang un ei mu ta pua’n lau; chuleh, chomkhat zaw leh ei mu kit in lau, a tia.

¹⁷Ziaphatchun, a nungzuite lak ah khenkhat chu a kiho un, chomkhat sung nang un ei mu ta pua’n lau; chuleh, chomkhat zaw leh ei mu kit in lau; Pa kiang ah ka chia ding ziakin, a ti hi bangati’na ahi diam?, tiu a.

¹⁸Ziaziakchun, zia, chomkhat zaw leh, a ti hi bangati’na a diam? A thugen hi a ngaina I hepuau hi, a tiu a.

¹⁹Jesu’n a thugen chu dot a nuam ui ti a he, a kiang un, chomkhat zaw leh ei mu ta pua’n lau; chuleh, chomkhat zaw leh ei mu kit in lau, ka ti thu ah hin nangmau kidong tua la hiu maw?

²⁰Titakzet in ka hil la hiu, nanghaw chu kap in, lusûn in um in lau; khawvel chu vang kipak in a; nang uh lungngai tak in um in lau; himaleh, la lungngainau chu kipakna hung chang in a.

²¹Numei chun nau a vei lai in a thuak gim sek ah, a hun tung ahi ziakin. Nau a nei zaw tak leh vang, khawvel ah mihing pakhat a hung pianbe ziak in, a lungkhamna chu a hemil zo ta sek hi.

²²Zia gual ah chun, tu’hin nang uh le la lungngai tadiu ahi; himaleh, nang uh hung mu kit ding ka hi, zia tak chuleh la lungthim uh kipak ta’n a; kuama’n la kipaknau chu lak piak thei talo ding ahi ngal a.

²³Zia ni phat chuleh nang un bangma ei dong kit ta pua’n lau. Titakzet in ka hil la hiu, ka min ah Pa kiang ah la dot uh chun hun pia’n a.

²⁴Tu’tiang hin ka min in bangma la don kha nai puau hi. Don un, mu’n lau, la kipaknau a bukim theina ding in.

²⁵Zia thute hi la kiang un thupil in ka hun hil hi. A hun hung tung ding ahi tai, ziaphat chuleh thupil ah gen talo in, Pa kiang ah kipat ka thupuak chu kichian tak in hun hiatsak ta’ng ka.

²⁶Zia ni phat chuleh, ka min in don in lau; nang uh sik ah Pa kiang ah don ing ka, ka ti ei puai;

²⁷keima lei hepi ziak uh leh, Pa ah kipat hung ka hi dan la taksan tâk ziak un, Pa ngei chun nangmau a hun hepi hi.

²⁸Pa ah kipat in ka hung ah, zia khawvel ah hin ka hung hi; chuleh, khawvel hi nusia ing ka tin, Pa kiang ah chia ding ka hi tai, a tia.

²⁹A nungzuite chun, a kiang in, “Ngai tia, tu’hin chu kichian tak in lei gen tai, thupil ah lei genle ahi diak ta puai!

³⁰Nang in bangma zosia la hia’n, bangma dot la ngai ta puai, ti ka he tau hi; ziaziak hin Pathian kiang ah kipat hung pawt la hi ti ka gingcha tau hi,” a tiu a.

³¹Jesu’n a hun dawnhu a, “Tu’hin la gingcha tau maw?

³²A hun a hung tung tai, tu’ ma ma hin a hung tung tai, nangmau In lam chiat in ei nusia in la tiu in, keima ngen in ei nusia ding la hiu. Himaleh, kei ngen ka hi puai, Pa chun ei umpi zing hi.

³³Keima ah thamuanna la neitheina ding un, zia thute hi ka hun hil la hiu. Khawvel ah hin gim genthei thuak in lau. Himaleh, thamuang tak in um un; keima’n khawvel ka zo tai,” a tia.