Read Vaiphei JOHAN 17 Bible Online

JOHAN 17 - Vaiphei bible

JOHAN 17

¹Jesu’n thu zia cheng chu a gen zaw in, van lam en in a dakdok ah, He Pa, a hun chu a hung tung tai; chapa’n nangma a hun chawihoi theina dingin, la Chapa hun chawihoi in;

²zia gual ah mi zosia chung ah thunei ah la siam khan, a kiang ah la piak tapote chu kumtuang hinna a piak theina ding in.

³Zia hi kumtuang hinna chu ahi, Pathian tak khat bep nangma leh la sawl Jesu Khrista a het uh hi.

⁴Nang in na sep ding ah lei piak kha ka sêm zo ta’n, khawvel ah hin nangma ka chawihoi tai.

⁵Chuleh, He Pa, tu’hin khawvel kisiam masang ah, la kiang ah nangma ngei lopina lei choisa’n gual ah khan ei chawisang kit ta’n.

⁶Khawvel ah kipat nangma’n lei piak mite kiang in la min ka hi’lang tai. Amau haw chu nang â a hiu in, nang in amau haw chu kei lei piak ahi’n; amau in la thu a zawm tau hi.

⁷Tu’hin chu nang in lei piak zosia kha, nangma ah kipat ngei a hinai ti, a hechian tau hi;

⁸nang in thu gen ding ah lei piakte kha ka gen zo ta’n, nei le a nei tau in, nangma ah kipat pawt ka hi’danle a hechian tau in, nang in lei sawl ka hi tile a taksang tau hi.

⁹Amau haw â ding ah don ka hi; khawvel â ding ah don ka hi puai; nang in kei lei piakte â ding bep ah don ka hi; nangma â a hiziak un.

¹⁰Kei â zosia chu nang â ahi’n, nang â zosia chu kei â ahi; amau haw jal in chawihoi in ka um hi.

¹¹Tu’hin, keima khawvel ah umlo ding ka hi tai, amau haw vang khawvel ah a um nalai ui; chuleh, keima la kiang ah hung ding ka hi tai. Pa thiangtho, ei teni pumkhat I hi gual in amau le pumkhat ahi theina ding un, nang in kei lei piakte haw hi la min in vop pha’n.

¹²A kiang ua ka um sung khan, nang in kei lei piakte haw hi la min in ka vop pha tai. Amau haw hi ka vêng in, Pathian Lekha thu guitunna dingin mangthai chapa bep longal pakhat chale a mangthai puau hi.

¹³Tu’hin, nangma kiang ah hung ding ka hi tai; zia thute hi khawvel ah hin ka gen tai; amau ah ka kipakna a bukim theina dingin.

¹⁴Keima’n la thu a kiang un ka pia ta’n, keima khawvel ah mi ka hi’lo gual ma’n, amau hawle khawvel ah mi a hi’lo ziak un, khawvel in amau chu a haw tai.

¹⁵Khawvel ah kipat amau ladok dingin ka don pua’n, himaleh, gitlona lak ah kipat vêng bit dingin ka don zaw ahi.

¹⁶Keima khawvel ah mi ka hi’lo gual ma hin, amau hawle khawvel ah mi a hita puau hi.

¹⁷Thutak in amau hi’thiang in, la thu chu thutak ahi ngal a.

¹⁸Nang in khawvel ah lei sawl gual khan, keima’nle amau khawvel ah ka sawl hi.

¹⁹Amau hawle thutak ah hi’thiantho a hitheina ding un, amau ziakin keima le ka kihi’thiangtho tai.

²⁰Ziate â ding bep hin ka don puai, amau haw thugen ziak ah keima ei hun ging dingte â dinginle ka pauchap hi;

²¹amau hawle pumkhat ah a um theina ding un. Nang ka Pa, keima ah la um ah, keima le nangma ah ka um gual in; amau le eimau ah a um ua, khawvel in keima hi nang ei sawl ka hi ti a ginchâk theina ding un.

²²Ei teni pumkhat I hi gual ah amau hawle pumkhat a hi’theina ding un, nang in lopina lei piakte kha amau kiang in ka pia tai.

²³Kei amau ah, nangma keima ah la um gual in, amau pumkhat ah a hung bukim theina ding un; nang in keima khawvel ah lei sawl ahi ti leh, keima lei hepi gual ah amau le la hepi hi, ti a hettheina ding in.

²⁴He pa nang in lei piak lopina chu nang in lei piak haw hin a mutheina ding un, keima umna chun ka kiang ah amau hawle um leu ka ti ahi; lei chung pia’n ma’nle nang in lei hepi ahi tangal a.

²⁵Aw ka pa midik tak, khawvel in nang a hun hepua’n, keima’n vang ka hun hezing hi; ziate hinle nangma ei sawl ka hi ti a he tau hi.

²⁶La min chu ka taklang ta’n, hun taklang jel ding ka hi; hepina, nang in keima lei hepina ngei chu amau ah a umtheina ding leh, amau ah keima le ka um zing theina dingin, a tia.