Read Vaiphei JOHAN 18 Bible Online

JOHAN 18 - Vaiphei bible

JOHAN 18

¹Jesu’n zia thute chu a gen zaw phatin, a nungzuite tawh a pawtdok un, Kidron guam gâl lam ah huan ah chun a chiau a, zia tak ah chun a nungzuite tawh a lut tau a.

²A matsakpa Juda khanle zia mun chu a hiatsa ahi’n; zia tak ah chun a nungzuite tawh tamvei tak a la chia tau hi.

³Juda chun, thiampu lalte leh Pharisaite hun sawl pawsal hon lawi khat leh miman hotute a hun pui a, thaumei tawh, meisel tawh hiam leh thal tawh a hung tau a.

⁴Jesu’n a chung ah thil tung ding zosia chu a la het masak ziakin, a vapawtdok ah, “Kua hawl la hiu em?” ti’n a dong a.

⁵Amau chun, “Nazareth Jesu,” ti’n a dawnhuu a. Jesu’n a kiang un, “Keima hi ka hi,” a tia. A matsakpa Juda chule a lak un a ding a.

⁶A kiang ua, “Keima hi ka hi,” a la ti phat ah chun, a kinung tawl ua, leitual in a kipûk tau a.

⁷Ziazaw chun, ama’n a dong kit a, “Kua hawl la hiu em?” a tia. Amau chun, “Nazareth Jesu,” a hun ti kit ua.

⁸Jesu’n a dawnhu a, “Keima hi ka hi, ti ka hun hil ta kha lam; keima ei hawl ah hung la hiu leh ziate hi chia mang sak phot un,” a tia.

⁹“Nang in lei piakte lak ah pakhat chale ka mansua puai,” tia a gen kha a guitunna ding in.

¹⁰Zia hun ah chun, Simon Peter in chemjam khat a nei chu a hun jukdok ah, thiampu lianpen suakpa chu a sat leh a changlam bil a satthâk piak a. Zia suakpa min chu Malkhas ahi.

¹¹Peter kiang in Jesu’n, “La chemjam kha a pâi ah thun kit ta’n. Ka Pa’n ka dawn ding ah ei piak no hi dawn lo ding ka hia hem?” a tia.

¹²Tichun, Rom sepaite leh hotute tawh Judate mi mante chun Jesu chu a man ua, a kân tau a.

¹³Zia kum ah thiampu lianpen ah pang Kaiapha a hiziak in a sungpa, Anna kiang in a pui masau a.

¹⁴Zia Kaiapha chu ahi, “Mi zosia thasâng ah mi pakhat thi a pha zawi,” tia Judate a la hilpa kha.

¹⁵Simon Peter tawh nungzui dang pakhat chun Jesu a zui pek tau a. Zia nungzuipa chu thiampu lianpen mêlhet ahi ziakin, thiampu lianpen In huang sung tiang ah chun Jesu a zui lut a.

¹⁶Peter ahileh chu kot pawlam in a ding a. Thiampu lianpen mêlhet nungzuipa chu a hung ah, kotkhak ngâknu kiang ah chun a gen piak ah, Peter a puilût tai.

¹⁷Numeinu chun Peter kiang in, “Nang le zia pa nungzuite lak ah pakhat hilo la hem?” a hun tia. Ama chun, “Ka hi puai,” a tia.

¹⁸Khua a vot ma ma ziakin, suakte leh mi mante chun suangmeihol a tik un; zia mei chu dinsa’n a awi un. Peter inle amau tawh ding khawm in mei a awi a.

¹⁹Thiampu lianpen chun, Jesu chu a nungzuite leh a thu zilsak chanchin a dong a.

²⁰Jesu’n a dawnhu a, “Khawvel kiang ah chun langchang tak in thu ka gen ah, sunagog In leh tempul ah Judate umna’n thu ka zilsak sek hi. A gûk in bangma ka gen ngai puai.

²¹Bangatia, keima ei dong la hem? Ka thugen ngaitha sekte leh a kiang ua thu ka gen seknate kha dong ta’n la; ziate chun ka gente chu a hiau hi,” a tia.

²²Zia a gen zaw phat ah chun, a kiang ah ding zing mi man pakhat hin, “Bangatia, Thiampu lianpen zia gual ah chu dawnhu la hem?” a tia; Jesu chu a vak bêng a.

²³Jesu’n a dawnhu a, “Thu diklo ka gen ahileh, a dik lona chu ei hil in, thudik tak ka gen leh bangatia lei bet a hem?” a tia.

²⁴Ziaphatchun, Anna chun kânsan thiampu lianpen Kaiapha kiang lam in a sawl tai.

²⁵Simon Peter in ding kawm in mei a la awi zing a. A kiang in, “Nang le a nungzuite lak ah pakhat hilo la hem?” a hun ti kit un. Himaleh, ama chu a kilep a, “Ka hi puai,” a ti kit a.

²⁶Thiampu lianpen suakte lak ah pakhat, Peter in a bil a sat thâk piakpa chanaute pakhat chun, “Huan ah khan a kiang ah la um kha ka hun mu hilo a hem?” a tia.

²⁷Peter chu a hung kilep kit a; ziazaw zaw chun âk a hung khuang ngal tai.

²⁸Jesu chu Kaiapha In ah kipat in, vaihawmna Inpi lam in a pui tau a. Zia chu jingkhang ahi nalai a. Amau haw chun, Chiakân Kût an nêk theina ding ah kisukbuak khâk ding uh a kivên ziak un, zia vaihawmna Inpi sung ah chun a valût puau hi.

²⁹Pilat chu a lak un a hung pawtdok ah a kiang un, “Zia mi hi bang thu la hêk uh a hem?” a hun tia.

³⁰Amau chun, “Zia mi hi thi tâk hiloleh chu, la kiang in hun pui lo ding ka hiu,” a tiu a.

³¹Pilat chun a kiang un, “Nang un pui unla, nangmau dan dungzui in a chung thu hi ngaituau in,” a tia. Himaleh, Judate chun, “Keimau dan in mi thina ding vaihawm theina ka nei puau hi,” a tiu a.

³²Zia hi Jesu’n a thidan ding a la gen kha a guitunna ding ahi.

³³Ziaphatchun, Pilat chu vaihawmna Inpi’n a lut kit a, Jesu chu a ko ah, a kiang in, “Judate Lengpa la hi em?” a tia.

³⁴Jesu’n a dawnhu a, “Zia lei dot chu nangma thu lei dot a hem; ahiloleh, midang in a hun hil ziak ua lei dot a hem?” a tia.

³⁵Pilat chun a dawnhu ah, “Kei hi Juda mi eisa la hem? Nangma chipite ngei leh thiampu lalte’n ka kiang ah a hun pui uh la hi. Bang a la bawlkha la hi em?” a tia.

³⁶Jesu’n a dawnhu a, “Ka lenggam chu zia khawvel hi ahi puai. Ka lenggam chu zia khawvel hi hileh vang, ka sepaite’n hun do intiu in, zia Judate ei piak daw thei ding hin um pua’ng ka. Ka lenggam chu zia tak hi ahi puai,” a tia.

³⁷Pilat chun a kiang in, “Aleh, leng la hi chu maw?” a tia. Jesu’n, “Leng ka hi chu nang inle la gen ta chulam. Thutak hiatsak ding leh zia thil ziak tak ah hin khawvel ah hung ka hi. Kuale mi thutak tapo chun ka aw a ngaithau hi,” a tia.

³⁸Pilat chun a kiang in, “Thutak chu bang a hem?” a tia. Zia a gen zaw chun Judate kiang in a vapawt kit ah a kiang un, “Ama ah hin a mawna ding ka mu puai.

³⁹Himaleh, la hi’dan ngai uh dan pakhat a um hi, Chiakân Kût ni hin mi pakhat thâdaw piakna ding dan la nei ui. Zia Judate Lengpa hi hun thâdok mai leng pha la sa puau em?” a tia.

⁴⁰A hung kiko ua, “Zia pa hi hilo in, Barabba kha hun thâdok zaw’n,” a tiu a. Zia Barabba chu suammang ahi.