Read Vaiphei JOHAN 19 Bible Online

JOHAN 19 - Vaiphei bible

JOHAN 19

¹Pilat in Jesu chu a pui ah, a jep a.

²Sepaite chunle linglukhuk a phêk ua a khuksak un, puan sandup a hun silsak tau a.

³A enghona’n, “Judate Lengpa chibai,” ti kawm in a bêng sek un.

⁴Pilat chu a hung pawtdok kit a, “Ngai un, ama demna ding bangma a um puai, ti la hetna ding un ka hun puidok ahi,” a tia.

⁵Jesu chu linglukhuk khuk kawm leh, puan sandup sil kawm in a hung pawtdok a. Pilat chun, “Zia pa hi ahi hi!” a tia.

⁶Thiampu lalte leh hotute chun a la mu phât un, a hung kiko ua, “Kros ah khenden in! Kros ah khenden in!” a hun tiu a. Pilat chun a kiang un, “Pui unla, vakhenden tau in, keima’n vang a chung ah hin demna ding ka mu puai,” a tia.

⁷Judate chun a dawnhuu a, “Dan pakhat ka nei ui, zia dungzui ah chun a thi ding ahi, Pathian Chapa ah a kigen ziakin,” a tiu a.

⁸Pilat chun a thugen uh chu a het phat in a lauthawng deu deu a.

⁹A vaihawmna Inpi chun a lut kit a, Jesu kiang ah chun, “Khoi ah kipat mi la hem?” ti’n a dong a. Ahi’n, Jesu’n a dawnhu puai.

¹⁰Ziaphatchun Pilat in, “Ei ho nuam lo la hi maw? Kros ah khenden thei ka hi ti leh, thâdok thei ka hi, ti helo la hem?” a tia.

¹¹Jesu’n a dawnhu, “Chunglam ah kipat piak la hilo leh ka chung thu hin bangma thu nei thei pua’n la; ziaziakchun, la khut ah ei pedokpa chun gitlona a nei lian zawi,” a tia.

¹²Zia kipat chun Pilat in ama a thâdaw theina ding lampi a ngaitua ah; himaleh, Judate chu a hung kiko ua, “Zia pa hi la thâdaw him him chun Kaisar gualpa hilo ding la hi. Leng ah kisiam taphot chu Kaisar dodâl ahi,” a hun tiu a.

¹³Pilat chun zia thute chu a het phat in, Jesu chu a puidok ah; a min Suang Kizim, Hebrai pau ah Gabbatha a tiu ah chun, vaihawmte chutpha’n a kichu ta’n.

¹⁴Zia ni chu Chiakân Kût kisaklawkna ni ahi’n, sun kim ding vêl ahi tai. Tichun, Judate kiang ah chun, “Zia hin la lengpau a um hi!” a hun tia.

¹⁵Amau haw chu a hung kiko ua, “Hi’mangthai in! Hi’mangthai in! Kros ah khenden in!” a hun tiu a. Pilat chun a kiang un, “La Lengpau hi kros ah khenden ziang ding ka hem?” a ti kit a. Thiampu lalte chun, “Kaisar longal leng dang ka nei puau hi,” a tiu a.

¹⁶Ziaphatchun, khetden dingin a kiang un a pedok tai. Jesu chu a kaidok ua, a pui tau hi.

¹⁷Ama kros ding kiput kawm in, Lugu Mun, Hebrai pau ah Golgotha a ti’na mun lam ua chun a pui tau a.

¹⁸Zia tak ah chun a khenden ua, a kiang in mi pani, a sîk langkhat ah pakhat gêl, a lai tak un Jesu a khenden tau hi.

¹⁹Pilat chun lekha khat a zik ah, kros chung in a tâk ah, zia lekha kizik chu, “NAZARETH JESU, JUDATE LENGPA,” ti ahi.

²⁰Zia lekha kizik chu Judate tam tak in a sim un; Jesu a khetdennau mun chu khawpi pâmchin ahi’n; zia chu Hebrai pau, Grik pau tawh Latin pau ah kizik ahi.

²¹Judate lak ah thiampu lalte chun Pilat kiang in, “Judate Lengpa, ti’n zik kin la, ‘Judate Leng ka hi a tii,’ ti’n zik jaw’n,” a vatiu a.

²²Himaleh, Pilat in, “Ka zik kha ka zik zo tai,” a tia.

²³Sepaite chun, Jesu chu a khetden zaw phat un, a puante chu a lau ah, se’li in a hawm ua; a puanâk chual le a lau ah; zia chu khui lo puanâk, a chunglam ah kipat kigat suk ahi.

²⁴A kiho ua, “Zia hi vang bawsiat dâ hitiu in, a chang ding âisân thaw hitiu,” a tiu a. Pathian lekha thu a: “Ka puante chu a kihawm un, ka puanâk chual chang ding âi a sân ui,” ti thu kha a guitunna ding ahi.

²⁵Ziaziakchun, sepaite chun a chuti bawl uh ahi. Zia hun ah chun kros bul ah dingte lak in Jesu nu tawh, a nu suapinu Kleopa ji Mari tawh, Mari Magdalin tawh le a pang ui.

²⁶Jesu’n, a nu leh a nungzui a hepi kha a kiang ah ding zing a mu’n, a nu kiang in, “Numei, la chapa kha en in!” a tia.

²⁷Ziazaw chun, a nungzui kiang ah chun, “En in, la nu kha!” a tia. Zia phat ah chun nungzuipa chun amanu chu a In lam in a pui tai.

²⁸Jesu’n thil bangkim a bukim tai ti a het phat in, (Pathian Lekha thu guitunna ding in,) “Ka dang a châk hi!” a hun tia.

²⁹Zia tak ah chun bêl pakhat, uain thûk a dim ah kikoi a um a. Thiampon khat zia uain tui chun dia in, husop mol in a tâk ua, a mûk tawh a vak sutuau a.

³⁰Jesu’n uain thûk chu a dawn zaw in, “A kichai tai,” a hun tia. Tichun, a lu a khûn ah, a thagau a thâ tai.

³¹Zia ni chu Judate Kiginni ahiziak in, a luang chu kros chung ah sabbath ni a um zing chu a dawi puau a; zia sabbath ni chu ni lopi ahi ngal a. A keng uh khet bot ah, a luang uh chu lakthâk dingin Pilat kiang in a vadon tau a.

³²Sepaite a hung phat un, a masa pen keng chu a khenbong un, a kiang ah pakhatpa kha le zia gual ma chun a hiu a.

³³Himaleh, Jesu kiang a hung tun phat un, ama chu a la thi zo sa’n a mu tau ah, a keng chu a khen bong ta puau hi.

³⁴Himaleh, a lak ua sepai pakhat chun, chei in a nâk a vak sut leh, thisan leh tui a hung luangdok tai.

³⁵(Zia chu a vamu ngei ngei pa chun a gen ahi, a thugen chu a dik ngei ahi; ama chun a dik ahi ti a het ngei chu a gen a hin, zia chu nang unle la taksan theina ding ua a gen ahi.)

³⁶Pathian Lekha thu ah, “A gu pakhatle suk bot hipua’n a,” ti ah kizik kha a guitunna ding ah zia thilte chu tung ahi.

³⁷Pathian lekha thu mundang khat in, “Amau hawn a sut ngei uh chu en in au,” ti zik gual ah khan.

³⁸Ziazaw chun, Arimathia khua mi pakhat Joseph kiti, ama chu Judate a lau ziak ah a gûk ah a la pang sek, Jesu nungzui ahi’n; ama chun Jesu luang chu lâkdaw dingin Pilat kiang in a vadon a. Pilat chun phalna a la pia; tichun, a hung ah, Jesu luang chu a hung ladok tai.

³⁹Chun, jan ah Jesu kiang ah hung, Nikodem khale a hung ah, ama chun gimtui murra leh aloe kihel bûk za khat ding vêl a hun chawi a.

⁴⁰Amau teni chun Jesu luang chu a lau ah, Judate kivuina dan ngai gual in, gimtui buak khum in, puan malngat in a tuam tau hi.

⁴¹Zia a khetdenna kiang nai ua chun huan pakhat a um a; zia huan ah chun thân kikhuak thak pakhat, kuama kivui khâk nailona a um a.

⁴²Zia ni chu Judate Kisaklawk ni a hiziak leh, a thân umna chule a nai ziakin, Jesu luang chu zia tak ah chun a sial tau hi.