Read Vaiphei JOHAN 2 Bible Online

JOHAN 2 - Vaiphei bible

JOHAN 2

¹Chun, ni thum ni chun, Galili gam ah Kana khua chun mo lawpna a um a; zia tak ah chun Jesu nule a um a.

²Zia mo lopna chun, Jesu leh a nungzuite le a chial un.

³Uain a hung tâksap phat un, Jesu nu chun a kiang in, “Uain a tasam tau hi,” a vatia.

⁴Ahi’n, Jesu’n a kiang in, “Numei, nang leh kei kisakla’na ding bang a hem um, ka hun a tung nai puai,” a tia.

⁵A nu chun tuanvaite kiang in, “La kiang ua a gen tapo chu bawl mai un,” a tia.

⁶Zia tak ah chun, Judate kisukthianna dan gual in, suang tuibêl paguk a tun uh a um a, gallon sawmni a hem, sawmthum a hem dawl chiat a hiu a.

⁷Jesu’n a kiang un, “Zia tuibêlte a khan tui hun sungdim chiat un,” a tia. Tichun, a gei tiang chiat in a hun sungdim tau a.

⁸Ziazaw chun a kiang un, “Thâl unla, tuanvai hotupa va-etsak un,” a tia. Tichun, a thâl ua, a va-etsak tau a.

⁹Tuanvai hotupa chun, tui uain hung suak ta chu a la tep a, khoi ah a lâk uh ahi la a hepua’n; (himaleh, tuanvaite, zia tui hun thâlte chun a hiau a.) Gualvâkna hotupa chun moneipa chu a vak ko a,

¹⁰a kiang in, “Min a lim leh uain chîk a hawmsak masa sek un, mi a hung vâ deu tak ua leh, a dau zaw deute a hawm sek ui; ahi’n, nang in tu’tiang hinle a chîk la nei nalai hi,” a tia.

¹¹Zia a thilmak bawl masak pen hi, Galili gam ah Kana khua a bawl ahi; a lopina chu a hi’lang ah, a nungzuite chunle ama a gingcha tau hi.

¹²Ziazaw chun, a nu, a suapite leh, a nungzuite tawh Kapernaum lam in a chiau a; zia tak ah chun ni tam lo a vachâm tau hi.

¹³Judate Chiakân Kût a nai tâk ziakin, Jerusalem lam ah Jesu chu a chia to a.

¹⁴Tempul sung ah bawng, belam leh vapâl zuakte leh, dangka thengte a la kichu dep dup chu a mu’n;

¹⁵khauhual in a jep a, tempul sung ah kipat chun a bawngteu leh a belamteu chu a nawdok sik sek a; dangka thengte dangka a butthâk piak a; a dawkânteu chule a sotpâi piak a.

¹⁶Vapâl zuakte kiang ah chun, “Zia thilte haw hi ladok sik sek un; ka pa In sumkawlveina’n mang kiu in,” a tia.

¹⁷Ziaphatchun, a nungzuite’n, “La In ah ka phatchuam ngaina’n ei ne zo ding ahi,” ti thu kizik kha a hun hedok tau a.

¹⁸Ziazaw chun Judate’n, “Zia tawhbang thil la bawl hi, tepte’na bang lei musak thei em?” a tiu a.

¹⁹Jesu’n a dawnhu a, “Zia tempul hi suchim leuchinle, ni thum sung in tungding kit ding ka hi,” a tia.

²⁰Judate chun, “Zia In hi kum sawmli leh guk kisa ahi, nang in maw ni thum sung ah la tundin kit ding?” a tiu a.

²¹Himaleh, ama chun ama taksa tempul a genna ahi zaw ngal a.

²²Ziaziakchun, mithi lak ah kipat a thawkit phatin, zia chu a la genna ahi, ti a nungzuite’n a hun hedok kit tau a; chuleh, Pathian Lekha thu leh Jesu thugen chu a taksang tau ahi.

²³Chiakân Kût nêk bawl sungsia Jerusalem in a um ah; zia hun sung ah chun, mi tam tak in a thilmak bawlte a mu ziak un a min chu a gingcha tau a.

²⁴Himaleh, Jesu’n a lungthim uh a het ziakin muang tak in a um puai;

²⁵A ziak chu, kuama gen piak hilo in, a man mihingte lungput dan chu a he suak hi