Read Vaiphei JOHAN 20 Bible Online

JOHAN 20 - Vaiphei bible

JOHAN 20

¹Hapta khat ah ni masa pen ni, phalvak in, Mari Magdalin chu thân lam ah a chia leh, thân sitna suang chu likdaw sa’n a vamu ta’n.

²A hung tai ah, Simon Peter leh Jesu’n a hepi nungzui kiang in a hung a, “LALPA kha thân ah kipat in a la kila mang tai, khoi ah a koi uh a hem ka he ta puai,” a hung ti’n.

³Simon Peter tawh nungzui dang pakhatpa chu thân lam zuan in a chia tau a.

⁴A paniu chun a tai ua, nungzui pakhat chun Peter chu a makhel ah, thân chu a la tung masa tai.

⁵A bok ah, a sung chu a zuk en ah, a puan malngat kha a um ngai ah um in a mu’n; ahiziak in a sung in a lût ziang puai.

⁶Ama nung ah chun Simon Peter le a hung tung ah, thân sung ah chun a lût ngal a. Ama’nle zia puan malngat a um ngai gual ah um zing chu a mu’n;

⁷a luchang tuamna puan, a luchang lam jawn ah um chu puan malngat chu tawh a um khawm ta pua’n, a kiang ah chun a lom ah jialdawsa’n a la um ta’n.

⁸Nungzui pakhatpa, thân a la tung masa zawkpa khale a lut ah, a mu phatin a taksang tai;

⁹zia hun ah chunle, Pathian lekhabu’n, “Ama chu thina kipat thokit ding ahi,” ti thu kha a hedok nai diak puau a.

¹⁰Ziazaw a chun, nungzuite chu a In lam un a chia kit tau hi.

¹¹Mari chu thân pawlam ah ding in a kap a. A kâ kawm in a khûn ah, thân sung chu a vak en a;

¹²vansawlchâk pani puan vâm sil in, Jesu luang lupna mun ah chun, pakhat a lu lam ah, pakhat a keng lam ah kichu a mu’n.

¹³Amau chun, a kiang in, “Numei, bang ding ah kap la hem?” a tiu a. Ama chun a kiang un, “Ka LALPA a lamang un, a koinau ka he pua ahi,” a tia.

¹⁴Zia a gen zaw chun a hung kihei leh, Jesu a kiang ah a la ding chu a mu ta’n; Jesu ahi ti a he ziang puai.

¹⁵Jesu’n a kiang in, “Numei, bang ding ah kap la hem? Kua a hem la hawl?” ti’n a dong a. Amanu chun huan neipa hiding ah a ginchâk ziakin a kiang in, “He pu, zia tak ah kipat la lakdaw ahileh, la koina mun ei hil in, keima’n pawdok ing ka,” a tia.

¹⁶Jesu’n a kiang in, “Mari!” a hun tia. Ama chu a hung kihei ah, a kiang in, “Rabboni!” a hun tia, zia chu “Hotupa,” ti’na ahi.

¹⁷Jesu’n a kiang in, “Ei tu kin, tu’tiang hinle Pa kiang ah ka kal to nai puai; himaleh, ka unaute kiang ah vachia’n la, a kiang un, ‘Ka Pa, la Pau, ka Pathian, la Pathian kiang un kal to ding ka hi, a tii,’ vati’n,” a tia.

¹⁸Mari Magdalin chu a vachia ah, a nungzuite kiang in, “LALPA ka mu tai,” a tia; a kiang un zia a thu gente chule a hil tai.

¹⁹Chun, zia ni, hapta khat ah a ni masa pen nitâk lam ah chun, Judate a lau ziak un nungzuite chu kot a kikhak khum lai un, Jesu chu a lak un a hung ding ah, “La chung un thamuanna um ta hen!” a tia.

²⁰Ama’n zia chu a gen zaw in, a khut leh a nâk a etsak a. LALPA chu a mu phât un nungzuite chu a kipak ma mau a.

²¹Jesu’n a kiang un, “Ka Pa’n ei sawl gual in nang hawle ka hun sawl la hiu, la lak un thamuanna um ta hen!” a ti kit a.

²²Zia a gen zaw chun amau chu a hu a tha khum ah, “Thagau Thiangtho nei un.

²³Kua gitlona le la ngaidam taphot uh chu, ngaidam hi’ntin, kua gitlona le la ngaidam lo uh chu ngaidam hilo ding a hiu,” a tia.

²⁴Jesu a lak ua a kilâk lai khan Thoma, Diduma (piangkop) a tiu, sawm leh nite lak ah pakhat kha a la um pua’n.

²⁵Nungzui dangte chun a kiang in, “LALPA chu ka mu tau hi!” a tiu a. Ama chun vang a kiang un, “A khut thikkil kikhetna beliamte kha ka mu ah, thikkil kikhetna beliam leh a nâk liam ah ka khutzung ka thun zet lo chun taksang pua’ng ka,” a tia.

²⁶Ziazaw ni giat nung ah chun, a nungzuite chu In ah a kikhawm kit un; Thoma le a lak un a pang ta; kot kikhak zing lai ah chun Jesu chu a hung ah, a umna lailung tak ua chun a hung ding ah, “La lak un thamuanna um ta hen!” a hun tia.

²⁷Thoma kiang ah chun, “La khut in hun bân inla, ka nâk ah thun in. La khutzung in hun khoi in, ka khutte hi en in. Taksanglo in um kin la, taksang in,” a tia.

²⁸Thoma chun, “Ka LALPA leh ka Pathian!” a tia.

²⁹Jesu’n a kiang in, “Thoma, nang in lei mu ziak ah ei gingcha la hi maw? Mulo ah ei gingte chu mi hampha a hiu,” a tia.

³⁰Zia lekhabu kizik lo hile, Jesu’n a nungzuite mu in tepte’na tam tak a bawl ah; ziate haw zosia chu zia lekhabu hin zik ahi puai;

³¹himaleh, zia lekhabu hi, Jesu chu Pathian Chapa Messiah chu ahi ngei hi, ti la hun taksan ua, ama ging ah, a min ah kumtuang hinna la neina ding ua zik ahi zawi.