Read Vaiphei JOHAN 21 Bible Online

JOHAN 21 - Vaiphei bible

JOHAN 21

¹Zia nung ah chun Jesu chu Tiberia Dilpâm ah, a nungzuite kiang in zia gual hin a kilâk a:

²Simon Peter, Thoma (Diduma) piangkop kiti kha, Galili gam Kana khua um Nathanael kha tawh, Zebedai chate pani tawh mun khat in a um khawm un.

³Simon Peter chun a kiang un, “Sanga man ah chia ding ka hi,” a ti leh, amau chunle, “Kei uh le hung ing kau,” a hun tiu a. A kipan ua, kuang pakhat in a lut ngal tau a; zia jan ah chun bangma a man puau hi.

⁴Jingkal lim in, Jesu chu se’pho in a hung ding ah; ahi’n, a nungzuite chun Jesu ahi lam a hepuau hi.

⁵Ama chun a kiang un, “Naute haw, nêk ding sanga la nei awm?” a tia. Amau chun, “Ka nei puau hi,” ti’n a dawnhuu a.

⁶Ama chun a kiang un, “La kuang changlam pang uh khan lên sep leu chin man in lau,” a tia. A seu leh sanga a khu’khâk tam ma ma ziak un a kaidok lâ hial ziang tau hi.

⁷Nungzuite lak ah Jesu’n a hepi khan, Peter kiang in, “LALPA ei vei!” a vak tia. Simon Peter chun LALPA ahi ti a het phat in, a puanâk a âk ah, ama chu a ngawnchang ah um ahi’n, tui lak ah chun a chawmtha tai.

⁸Ahi’n, nungzui dangte chu kuangneu in a hung kitawl un; a umnau chu mualkâng ah kipat chun a gamla pua’n, tong za ni ding vêl bep ahi’n; a lên uh chu a sungdim ah sanga tawh a hun kai pek un.

⁹Tuipâm ah a hun kaidaw phat un, suangmeihol mei ah kitik leh, a chung ah sanga kihâimin leh vaithum a la um chu a muu a.

¹⁰Jesu’n a kiang un, “La sanga mat uh kha a khenkhat hun lau in,” a tia.

¹¹Simon Peter chu a chia to ah, a lên uh chu sanga lian tak tak a dim sêt in a hang kaidok ah, zia sangate chu za leh sawmnga leh pathum a pha’n; zia gual ah chun sanga tam maleh, a lên uh chu a sia puai.

¹²Jesu’n a kiang un, “Hung un la, an hung neu in,” a tia. A nungzuite chun LALPA ahi ti a het ziak un, kuama’n, “Kua la hem?” ti’n a dong puau hi.

¹³Jesu chu a hung ah, vaithum chu a la a kiang un a hawm ah, zia gual ma chun, sanga chule a hawm tai.

¹⁴Zia hi a nungzuite kiang ah ama ngei, thina kipat a thawkit nung ah a kilâk a thumveina ahi.

¹⁵Chun, jing an a nêk zaw phat un, Jesu chun Simon Peter kiang in, “Simon, Johan chapa, nang in ziate haw sâng ah hin lei hepi zaw em?” ti’n a dong a. Ama chun a kiang in, “I, LALPA, ka hun hepi hi ti la hia’i,” ti’n a dawnhu a. Ama chun a kiang in, “Ka belamnote vâk in,” a tia.

¹⁶Chuleh, a niveina chun, “Simon, Johan chapa nang in lei hepi em?” a tia. Ama chun, “I, LALPA, ka hun hepi hi ti la hia’i,” a tia. Jesu chun, a kiang in, “Ka belamte enkol in,” a tia.

¹⁷A thumveina chun, “Simon, Johan chapa, nang in kei lei hepi em?” a ti kit a. Peter chu, a thumveina, “Nang in lei hepi em?” a ti ziak ah chun a lungthim a na ta’n; a kiang in, “LALPA, nang in bangkim la he hen, ka hun hepi hi ti le la hia’i,” a tia. Jesu’n a kiang in, “Ka belamte vâk in;

¹⁸titakzet in ka hil la hi, la naupan lai in nang in la kawng la kigâk in, la nopna lam lam in la chia sek hi. La hung upat phat leh vang, la khut jak in la tin, midang in la kawng hun gâk piak intiu in, la chia nop lona lam lam in hun kai in au,” a tia.

¹⁹(Zia thu chu, ama bang gual ah thi’n Pathian a chawisâng diam ti a genna ahi.) Zia chu a gen zaw in, “Ei zui in,” a tia.

²⁰Peter chu a hung kihei leh Jesu’n a hepi nungzuipa kha a hun zui in a mu’n; ama chu a jan an nêk lai ua a kiang ah kinêlcha, “LALPA, kua a hem a hun matsak ding pen chu?” tia vak dongpa kha ahi.

²¹Peter chun ama chu a vak mu phât in, Jesu kiang in, “Aleh, LALPA, ziapa saw la, bang tiding maw?” a tia.

²²Jesu’n a kiang in, “Ama chu ka hung kit masia a la um ding ti lengle, nang in bang ding la tia a hem? Nang in ei zui ziang in,” a tia.

²³Ziaphatchun, zia nungzuipa chu thi lo dingin a lak un a la kithang tai. Ahi’n, Jesu chun ama chu thi lo ding a ti a hipua’n, “Ama chu ka hung kit masia a la um ding ti lengle, nang in bang ding la ti a hem?” a ti bep ahi ngal a.

²⁴Zia lekha hun zik ah, zia thil umdante genpa hi, zia nungzuipa chu ahi; a thu hiatsak le a dik hi ti I hiau hi.

²⁵Jesu thilbawl dang tam tak le a um nalai hi; ziate chu kimchang tak in kizik suak hen la hileh, khawvel pumpi hin zia lekhabute chu dawl ding in ka gingcha puai.