Read Vaiphei JOHAN 3 Bible Online

JOHAN 3 - Vaiphei bible

JOHAN 3

¹Pharisaite lak ah mi pakhat, a min Nikodem kiti, Judate hotu a um a.

²Ama chu jan ah Jesu kiang in a hung ah, “Rabbi, nang hi Pathian ah kipat zilsakpa ding ah hung la hi ti ka hiau a; kuale ama ah Pathian umnate longal chun, zia la thilmak bawlte gual hi bawl thei pua’n au,” a hung tia.

³Jesu’n a dawnhu a, “Titakzet in ka hil la hi, mi chunglam ah kipat a pianthak lo chun, Pathian gam muthei pua’n a,” a tia.

⁴Nikodem in a kiang in, “Mi a têk nung in bang ti’n piang kit thei ding a hem, a nu sung ah lut kit in hung piang kit thei ding a hem?” a tia.

⁵Jesu’n a dawnhu a, “Titakzet in ka hil la hi, mi kuale, tui leh Thagau ah a pianlo chun, Pathian gam lutthei pua’n a,

⁶taksa ah piang chu taksa ahi’n, Thagau ah piang chu thagau ahi.

⁷‘La pianthak ding ahi,’ ka ti hi maksa kin.

⁸Huizang a nopna lam lam in a hâng sek in, a git la hiau in; himaleh, khoi ah kipat hung a hem, khoilam ah chia ding a hem ti la he puai; kuale Thagau ah piang chu zia gual chu a hisek hi,” a tia.

⁹Nikodem chun a kiang in, “Bang ti’n zia thilte chu a hithei diam?” a tia.

¹⁰Jesu’n a dawnhu a, Israelte hotu pakhat la hingal ah, bangatia ziate hi hethei lo la hem?

¹¹Titakzet in ka hil la hi, kei un ka het uh chu ka gen sek un, ka muu chu ka hiatsak sek ui; himaleh, la taksang ngai puau hi.

¹²Lei lam thilte ka hun hil ah bawn la het theilo ua leh, van lam thilte hun hil leng bang ti’n hethei ding la hiu em?

¹³Kuama van ah kal to kha a um puau, van ah kipat hung sukpa, Mihing Chapa van ah umpa tilo ngal hi.

¹⁴Mosi’n gamthip ah sumgul a khaikâng gual khan, Mihing Chapa hile khaikâng ah um intin.

¹⁵Kuale ama ging taphot chun mangthailo ah, kumtuang hinna a nei zawkna ding un.

¹⁶Pathian in khawvel a hepi ma ma ziakin, a Chapa changkhat neisun chu a hun pia tai; kuale ama ging taphot chu mangthailo ah, kumtuang hinna a nei ngeina ding un.

¹⁷Pathian in khawvel thiamlo chansakna dingin, a Chapa khawvel ah a hun sawl puai, ama ziak ah khawvel hukdam ah a umna dingin a hun sawl zaw ahi.

¹⁸Ama ging taphot chu thiamlo chang pua’n tin; himaleh, ama ginglo taphot chu thiamlo changsa ahi tai, Pathian Chapa changkhat neisun min a ginlo ziakin.

¹⁹Zia hi thiamlo channa chu ahi, vâk chu khawvel in a hung a; himaleh, mite’n vâk sâng in thim a dawi zawu hi, a thil hi’teu a phatlo ziakin.

²⁰Thil phalo bawl tapo in vâk a dawi puau in, vâk inle a hung nuam puau hi.

²¹Himaleh, thutak ah thilbawl sekte chu, Pathian ah kipat a bawl uh ahi ti kilatna dingin vâk in a hung sek ui, a tia.

²²Zia nung ah chun, Jesu leh a nungzuite chu Judea gam in a hung ua; zia tak ah chun chomkhat a châm un, mi a baptis sek ui.

²³Johan inle Salim khua kiang ah Ainon ah chun tui a tam ziakin mi baptisma a chansak sek ah, zia mun chun mipi a hung khawm ua, baptisma a hung chang sek un;

²⁴Johan chu suangkul ah khum a hinai tâkdilo ziak ahi.

²⁵Zia hun ah chun Johan nungzuite khenkhat tawh, Judate mi khat hi kisukthianna thu in a kinial ua.

²⁶Tichun, Johan kiang in a hung ua, “Rabbi, Jordan lui gâl lam ah la kiang ah hungpa, a chanchin la la hiatsak sekpa khan mi a baptis hen, ngaitia, mi zosia a kiang in a chia ziang ui,” a vatiu a.

²⁷Johan chun a la dawnhu a, van ah kipat piak a hilo ngal ua leh, kuama’n bangma a nei thei puau hi.

²⁸Keima chu, Messiah ka hipua’n, a ma-âng ah sawl masak ka hizawi, ka ti kha, nangmau hi a hiatpite la hiu.

²⁹Mo neipa chu mo-pa chu a hisek hi; himaleh, mo-pa dinpi a gualpa chun, a thu a la hetpi in, zia mo-pa thugen ziak ah chun nasa tak in a la kipak sek hi; zia gual ma chun, zia hi ka kipakna bukimna chu a hi.

³⁰Ama chu hung pung deu deu intin, kei chu hung kiam deu deu ding ka hi.

³¹Chunglam ah kipat hungpa chu mi zosia chung in a um a; lei ah kipan chu lei ah mi ahi’n, lei lam thu a gen sek in; van ah kipat hungpa chu mi zosia chung ah mi ahi.

³²A mu leh a het taphot a hiatsak ah, a thu hiatsak chu kuama’n a pom puau hi.

³³Kuale a thu hiatsak a la pomte chun, Pathian chu dik tak ahi, ti a sudet tau hi.

³⁴Pathian sawl ahi ziakin Pathian thute chu a gen hi; Pathian in te’ chît chiat in Thagau chu a pia puai.

³⁵Pa chun Chapa chu a hepi hen, a khut in bangkim a pia tai.

³⁶Kuale Chapa ging chun kumtuang hinna a nei tai; chuleh, kuale Chapa ging lo chun hinna mu pua’n tin, Pathian lungnatna chu um zaw’n a, a tia.