Read Vaiphei JOHAN 5 Bible Online

JOHAN 5 - Vaiphei bible

JOHAN 5

¹Zia nung ah chun, Judate Kût pakhat a um a; Jesu chu Jerusalem lam in a chia to a.

²Jerusalem ah Belam Kotkhak kiang ah chun dil pakhat a um a, zia chu Hebrai pau in Beth-zatha a tiu ah, hulliap panga a nei hi.

³Zia tak ah chun damlo tam tak: Mitthûm, kengbâi leh zeng a um khawm un. (Tui hung kichok ngak in a um un;

⁴a châng châng leh zia dil ah chun LALPA vansawlchâk pakhat a hung sek in, tui chu a hung chok sek a; zia tak chuleh bang natna nei hilehle, zia tui kichawna lak ah chawm lut masa pen pen chu a dam sek ui. )

⁵Zia tak ah chun mi pakhat, kum sawmthum leh giat hial damlo a la um ta’n.

⁶A lum zing chu Jesu’n a mu phât in, zia gual ah chu sawt tak a la um ahi tai ti a he ngal ah, a kiang ah chun, “Sukdam la nuam em?” a tia.

⁷Damlopa chun, “He pu, tui a hung kichaw tak leh, dil ah ei koilut ding kuama ka nei pua’n, ka chia kâl in midang in ei makhel man kit sek un,” a tia.

⁸Jesu chun, “Hung ding in, la puanpha chu la’n la chia ta’n,” a tia.

⁹Thakhat in ama chu a hung dam ta’n, a puanpha chu a la’, a chia tai; zia ni chu Sabbath ni a la hi khel khel a.

¹⁰Zia damlo sukdam ah umpa kiang ah chun, Judate’n, “Tu’ni hi Sabbath ni ahi ziakin, la puanpha la kipuakdaw hi dan ahi puai,” a hung tiu a.

¹¹Ama chun a dawnhu a, “Ama ei hi’dampa khan ka kiang in, la puanpha la’n la, chia ta’n, ei ti ahi,” a tia.

¹²Ziaphatchun, a kiang in, “La puanpha la’n la, chia ta’n, hun tipa chu kua a hem?” ti’n a dong tau a.

¹³Himaleh, a dampa chun kua ahi a hepua’n, zia tak ah mipi umte lak ah kipat chun, Jesu chu a chia mang tangal a.

¹⁴Chomkhat nung in, Jesu’n ama chu tempul ah a mu’n, a kiang in, “Ngaitia, la dam tâk hi thil hi’khial kit ta kin, achutiloleh, thil phalo zaw la chung ah hung tung kha’n a,” a tia.

¹⁵Ziaphatchun, zia pa chu a pawtdok ah, ama hi’dampa chu Jesu a hi ti, Judate kiang in a vahil tai.

¹⁶Tichun, Judate chun Jesu chu Sabbath ni thil a bawl ziak ah chun, mat ah tha theina ding a hun ngaitua tau a.

¹⁷Himaleh, Jesu’n a kiang un, “Ka Pa’n tutiang hin na a sêm zing in, ke’nle ka sêm ahi,” a tia.

¹⁸Judate chun, sabbath ni a bawsiat ziak beple hilo in, “Ama leh ama Pathian gual ah kisiam in, Pathian chu ka Pa ahi, a tii,” a ti ziak un, tha a nuam deu deu un, a thalup theina ding chu a hawl zaw diak tau hi.

¹⁹Jesu’n a kiang un, Titakzet in ka hil la hiu, Chapa hin ama thu thu’n bangma a bawl puai; Pa thu hiatsak in bangkim a bawl zaw ahi; ama’n thil a hi’taphot chu, zia ma chu Chapa’nle a hi’ sek ahi.

²⁰Pa chun Chapa hi a hepi hen, ama’n a hi’ding zosia chu ama a hiatsak sek hi; ziaziakchun, zia haw sâng ah thil nasa zaw hile hun mu’n la tiu in, mak hun sa’n lau.

²¹Pa chun, mithile kaitho kit ah hinna a piak sek gual in, Chapa hinle a nop nop chu hinna a pethei hi.

²²Pa chun, kuama chung thu a tan pua’n, bangkim Chapa khut in a nga zaw ahi.

²³Ziaziakchun, mi zosia’n Pa a ja gual un, Chapa le a ja diu ahi. Kuale, Chapa jalote chu, Pa, ama hun sawlpa jalo a hiu.

²⁴Titakzet in ka hil la hiu, kuale ka thu he ah, ei sawlpa ging chun, kumtuang hinna a nei tai, vaihawmna lut ta pua’n tin, thina kipat pawt in hinna’n lut zaw ta’n a.

²⁵Titakzet in ka hil la hiu, a hun tung ding ahi tai, a tung male a hiziang tai; ziaphat chuleh, mithite chun Pathian Chapa aw hia’n tiu in, a hete zosia chu hing in au.

²⁶Pa chun ama ah chun hinna a nei hi; zia gual ma chun Chapa’nle hinna nei dingin a pia’i;

²⁷ama chu Mihing Chapa ahi ziakin, vaihawmtheina thuneina zosia chule a kiang in a pia tai.

²⁸Zia hi maksa kiu in, a hun tung ding ahi tai; zia hun tak chuleh thân ah um zosiate chun a aw hia’n tiu in;

²⁹tichun, thilpha bawlte chu hinna chang dingin hung thokit intiu in, thil phalo bawlte chu vang thiamlo chang dingin hung thokit in au.

³⁰Keima’n ka thu thu’n bangma ka hi’thei puai. Ka het dan tak in vai ka hawm zaw sek hi; keima dawi gual gual ah ka bawl a hi’lo ziakin, Pa, ei sawlpa chun a ti dan dan in vai ka hawm zaw ahi; ziaziakchun, ka vaihawm chule a dik hi.

³¹Keima leh keima kigenpha mai hileng chu, ka kigenphatna chu dik lo ding ahi.

³²Midang pakhat ka chung thu hiatsak sek a um ah, zia pa chun keima chung thu a hiatsaknate chu a dik ngei ahi, tile ka hia’i.

³³Johan kiang ah mi la sawl ua khan, ama chun thutak tak a la gen ahi kha.

³⁴Himaleh, mihing thu hiatsak ka kipakpina le a hipua’n, hukdam ah la um theina ding uh ka ti a hizawi.

³⁵Ama kha thaumei kuang zing leh vâk chu ahi, chomkhat a vâk ah chun kipak tak ah a jal zaw la nop uh kha!

³⁶Himaleh, Johan sâng ah hiatsakpa lopi zaw ka nei hi. Zia chu, Pa’n ka sep zaw ding ah ei piakte ka sep zaw hin, zia nasep ngei chun, Pa ei sawl ka hi’dan kichian tak in a hiatsak ahi.

³⁷Ziaziakchun, Pa, ei sawlpa, ama ngei chun ka chanchin a hiatsak ahi. Ama chu bangtik lai inle a aw la hekha puau in, a mêlle la mukha puau hi.

³⁸Chuleh, a mi sawl hi la ginchâk lo ziak un, a thule nangmau ah a um puai.

³⁹Pathian Lekhabu sung ah kumtuang hinna um ah la het ziak un, gunchu tak in la sim sek ui; ziate chu keima thasâng ah thu hun hiatsak ahi ngal a.

⁴⁰Himaleh, hinna la neina ding un ka kiang in la hung nuam puau hi.

⁴¹Mihing pakchâkna mai hi ka kipakpi puai.

⁴²Himaleh, nangmau ah Pathian hepina a um puai, ti ka hia’i.

⁴³Ka Pa min ah hung ka hi’n; himaleh, lei la lop puau hi; kua a hem khat, ama min ah hung leh vang a la lop ding la hiu a.

⁴⁴Pathian bep ah pâkchâkna hawl ding ahi dan helo in, nangmau kipâkchâkna mai la hawl ua leh, bangti’n gingcha thei ding la hiu em?

⁴⁵Keima’n Pa kiang ah ka hun hêk ding gingcha kiu in; a hun hêk mi pakhat a um hi, la gin uh Mosi ngei chu.

⁴⁶Mosi kha a la ging tak tak hileuchin, keima le ei ging ding la hiu: Ama khan kei chungchâng thu ngen a la zik ahi ngal a.

⁴⁷Himaleh, a lekha zikte haw hi la ginchâk lo ua leh, keima bangti’n ei gingcha thei him ding la hiu em? a tia.