Read Vaiphei JOHAN 6 Bible Online

JOHAN 6 - Vaiphei bible

JOHAN 6

¹Zia nung ah chun, Jesu chu Galili Dil, Tiberia Dil le a tiu, gâl langkhat lam a gâl kâi kit a.

²Damlote chung ah thilmak a hi’te chu a la mu ziak un, mipi tam tak in ama a zui tau hi.

³Jesu chu tâng in a chia to ah, zia tak ah chun a nungzuite tawh a kichuu a.

⁴Zia hun ah chun Judate Chiakân Kût chu a nai ta’n.

⁵Jesu a hung dâkdaw leh, mipi tam tak hung khawmte chu a mu’n; Philip kiang in, “Ziate haw nêk ding hi vaithum khoi tak ah I vachaw ta diam uh?” a tia.

⁶Ama chun a hi’ding chu a hezing ngal a; himaleh, ama a patepna ding ah a gen ahi.

⁷Philip chun a dawnhu a, “Tha guk law in kichaw leh le, neucha chiat ah chan dinginle kiting diak pua’n a,” a tia.

⁸A nungzuite lak ah pakhat, Simon Peter suapipa Andria khan,

⁹“Zia tak ah hin pawsal naupang pakhat, barli bu vaithum panga leh sanga neucha cha pani nei a um in; himaleh, mi zia jat â ding hin bang kham hiding a hem?” a tia.

¹⁰Ziaphatchun Jesu’n, “Mipite chutsak un,” a tia. Zia tak ah chun hampa a tam ah; tichun, mipite chu a hung kichuu ah, a leng un sang nga ding vêl a hiu a.

¹¹Jesu chun, vaithum chu a lâ, kipak thu a gen zaw in, a nungzuite kiang in a hawm ah, a nungzuite chun mipi kichute kiang in a hawm tau a; zia gual ma chun sangate chule a doikhop chiat un a hawm piak tau hi.

¹²A hung vâ chiat phat un a nungzuite kiang in, “A nêkbang uh kha hun luak khawm kit un, bangma a mangthai umlo dingin,” a tia.

¹³Tichun, a luak khawm kit ua, barli bu vaithum panga a hawmnau ah chun, a nêkbang uh bawm sawm leh ni a hun luak dim kit tau hi.

¹⁴A thilmak bawl chu a musak phatin, amau haw chun, “Jawlnei khawvel ah hung dingpa chu ama ngei hi a hita hi,” a ti tau hi.

¹⁵Ama chu a chamlo ah a lengpa ding ua siam ding ah, mat hung gua a hiu ti, Jesu’n a het ziakin, tâng lam ah chun ama ngawn in a chia mang tai.

¹⁶Nitâk lam a hung hi in, a nungzuite chu dil ah chun a vachiau a,

¹⁷kuang in a chuang ua, Kapernaum khua lam zuan in a kitawl tau a. Zia hun ah chun khua a thim ta’n, ahiziak in, Jesu chu a hung tung nai puai.

¹⁸Huipi nasa tak a hân ziak in tui chu a fawn nasa ma ma ziang ta’n.

¹⁹Mêl thum a hem mêl li a hem a kitawl nung un, Jesu chu a keng ah tui chung in, amau umna lam hun zuan in a muu ah; a la lau ma mau a.

²⁰Himaleh, ama chun, “Keima ka hi, lau kiu in,” a hun tia.

²¹Tichun, kuang sung ah kipak tak in a ko lut un; chomlokâl cha’n kuang ah chun a zotnau khawmual chu a tung kawm tau hi.

²²A jing ah chun Dilgâl langkhat lam ah mipi ding haw chun, zia tak ah chun a nungzuite chuanna longal chu kuang dang a um puai ti leh, Jesu chu a nungzuite chuanna kuang ah chu chuang lo in, a nungzuite amau ngawn in a chiau hi ti a he tau a.

²³Ahi’n, Tiberia lam ah kipat in LALPA‘n kipak thu a gen zaw ah, vaithum a nêknau mun kiangnai ah khan kuang pakhat a hung a.

²⁴Mipite chun, zia tak ah chun Jesu leh, a nungzuite chule a um ta puau hi ti, a het phat un, kuang ah chuang in Jesu hawl in Kapernaum khua a hung tung tau hi.

²⁵Dilgâl langkhat lam ah a hung mu phât un, “Rabbi, bangtik ah zia lam hi a la tung la hem?” a tiu a.

²⁶Jesu’n a dawnhu a, “Titakzet in ka hil la hiu, thilmakte la mu ziak ua ei hawl la hipuau in, vaithum la nekvâ ziak ua ei hawl la hizawu hi;

²⁷an mangthai ding hawl in sêmgim kiu inla, Mihing chapa’n a hun piak ding, kumtuang ah um zing ding an chu hawl in sêmgim zawu in. Zia ding ah chun Pathian in ama chu a tepte’ tangal a,” a tia.

²⁸Tichun, amau haw chun, “Pathian na ka septheina ding un bang ka hi diam uh?” a hung tiu a.

²⁹Jesu’n, “Pathian nasep chu zia hi ahi: a mi hun sawl hi gingcha leu chin,” ti’n a dawnhu a.

³⁰Amau chun a kiang in, “Aleh, nang ka hun gintheina ding un, bang tepte’na lei etsak thei diam? Bang la hi’ diam?

³¹Ka pu leh pateu in gamthip ah khan manna a neu ah; ‘Van ah kipat in a nêk ding uh vaithum a pia’i,’ ti ah zik gual ah khan,” a tiu a.

³²Ziaphatchun, Jesu’n a kiang un, “Titakzet in, ka hil la hiu, zia van ah kipat vaithum kha, Mosi hun piak a hipua’n, ka Pa’n van ah kipat vaithum tak chu a hun pia ahi.

³³Pathian vaithum chu van ah kipat hung suk ah, khawvel â ding ah a hinna pepa hiding ahi,” a tia.

³⁴Amau chun, “LALPA, zia vaithum chu ei pia ta’n la,” a hun tiu a.

³⁵Jesu’n a kiang un, “Keima hi hinna vaithum chu ka hi, ka kiang ah hung tapo chu a gilkial ngai pua’n tin, ei ging tapo chu bangmatik in a dangchâk ngai ta pua’n a.

³⁶Himaleh, ka hil la hiu, nanghaw hin lei mu zing un, ahi’n, lei gingcha puau hi.

³⁷Ka Pa’n ei piak zosia chu ka kiang ah hung ding a hiu; a hung tapo chu deldok lo hial ding ka hi;

³⁸keima doigual hi’ding ah van ah kipat hung ka hipua’n, ei sawlpa doigual hi’ding ah hung kum ka hizawi.

³⁹Zia hi ka Pa ei sawlpa doigual chu ahi, ama’n ei piak zosia chu, bangma matsua neilo in, nitawp ni leh kaitho zaw leng.

⁴⁰Chuleh, zia hi ka Pa doigual chu ahi, kuale Chapa mu ah, ama gingcha chun kumtuang hinna nei uh hen la; chuleh, nitawp ni leh ama chu keima’n kaitho leng,” a tia.

⁴¹Keima hi van ah kipat vaithum hung suk chu ka hi, a ti ziakin, Judate chu a chung in a phun tau a:

⁴²“Ama hi Joseph chapa, Jesu kiti kha hilo a hem, a nu leh pale I hiau hilo a hem? Bangatileh, ‘Van ah kipat hung suk ka hi,’ ti thei a hem?” a tiu a.

⁴³Ziaziakchun, Jesu’n a dawnhu ah, a kiang un, “Phun phun kiu in,

⁴⁴ka Pa, ei sawlpa chun a hîplo leh, kuama ka kiang ah hung theilo a hiu. Ahi’n, keima’n nitawp ni leh kaitho ing ka.

⁴⁵Jawlneite Lekhabu khan, ‘Amau haw chu Pathian hil in um in au,’ ti’n zik ahi. Ziaziakchun, mitin Pa thu he ah, zil taphot chu ka kiang in a hung sek ui.

⁴⁶Pathian ah kipat hung bep longal chun, kuama’n Pa chu a mu kha puau in, ama bep chun Pa chu a mu ahi.

⁴⁷Titakzet in ka hil la hiu, kuale keima ei gingcha chun kumtuang hinna a nei hi.

⁴⁸Keima hinna vaithum chu ka hi.

⁴⁹La pu la pateu in gamthip ah khan manna a neu ah; himaleh, a thizo tau hi.

⁵⁰Zia hi van ah kipat hung suk vaithum chu ahi, la nêk ua, la thilona ding un.

⁵¹Keima hi vaithum hing, van ah kipat hung suk chu ka hi. Zia vaithum ne tapo chu kumtuang in hing zing intin; zia vaithum, khawvel hinna ding ah ka piak ding chu ka taksa hi ahi,” a tia.

⁵²Ziaphatchun, Judate chu a kinial tau a; “Zia mipa hin bang ti’n a taksa I nêk ding un ei pia thei ding a hem,” a tiu a.

⁵³Jesu’n a kiang un, “Titakzet in ka hil la hiu, Mihing Chapa taksa la nêk ua, a thisan la dawn lo ua leh, nang un hinna neilo la hiu.

⁵⁴Kuale ka taksa hi ne’, ka thisan dawn chun kumtuang hinna a nei hi, zia mi chu nitawp ni phat leh kaitho kit ding ka hi;

⁵⁵ka taksa hi an tak tak chu ahi’n, ka thisan chule dawn dingtak tak chu ahi.

⁵⁶Kua’nle, ka taksa hi a nêk ah ka thisan a dawn chun, keima ah chêng ahi’n, keima le ama ah chun ka um ahi.

⁵⁷Pa hing chun ei sawl ka hiziak in, Pa ah hing ka hi; ziaziakchun, kuale ei ne’ chu keima ah hing ding ahi.

⁵⁸Zia hi van ah kipat vaithum hung suk chu ahi, la pu leh pateu in manna a nêk ua, a thi gual uh kha ahi puai; kuale zia vaithum ne’ hi kumtuang ah hingden ta ding ahi,” a tia.

⁵⁹Zia thute hi Kapernaum khua kikhopna In ah a thuhilna a gen ahi.

⁶⁰A nungzui tam takte chun zia thu chu a het phat un, “Zia hi thu haksa tak ahi; kua’n pom thei ding a hem?” a tiu a.

⁶¹Zia thu chun a nungzuite a phun ui ti Jesu’n a het phat in, a kiang un, “Zia thu hin a hun subuai ahi maw?

⁶²Chuti ahileh, Mihing Chapa hi masang ah a umna ngai ah khan, a kal to mu leuchin bang la tiding awm?

⁶³Hinna pia chu thagau ahi’n, taksa chu bangma ahi puai. La kiang ua ka thugente hi thagau ahi’n, hinnale ahi.

⁶⁴Himaleh, la lak un khenkhat a gingcha theilo la um ui,” a tia. Jesu chun, a tîl ah kipat in a gin lo uh chu a hiatsa him ahi’n; ama matsak dingpa chule a he him ahi.

⁶⁵Chun, ama’n, “Ziaziakchun ahi la kiang ua, ‘Pa’n a panpi lo chun kuama ka kiang ah hung thei pua’n a,’ ka ti kha,” a tia.

⁶⁶Zia kipat chun, a nungzuite lak ah tam tak a chia mang tau ah, ama a zui ta puau hi.

⁶⁷Chutichun, Jesu’n sawm leh nite kiang ah chun, “Nang hawle chia mang la nuam awm?” a tia.

⁶⁸Simon Peter in a hun dawnhu ah, “LALPA, kua kiang ah chia ding ka hiu em? Nang in kumtuang hinna thute chu la nei hi.

⁶⁹Nangma hi, Pathian Mithiangtho chu la hi ngei hi ti ka he tau in, ginle ka hun gingcha tau hi,” a tia.

⁷⁰Jesu’n a dawnhu, “Nanghaw sawm leh nite hi keima hun têl hilo la hiu em? Ahi’n, la lak ua pakhat Diabol la hi zing ui,” a tia.

⁷¹Simon chapa Juda Iskariot chung thu kha a genna ahi’n; ama chu sawm leh nite lak ah pang hinapi’n, a mat gua pang ahi ngal a.