Read Vaiphei NASEPTE 1 Bible Online

NASEPTE 1 - Vaiphei bible

NASEPTE 1

¹Theophilas, ka lekha zik masak ah khan Jesu nasep pattil leh a thu zilsak zosia leh,

²apostolte, ama têlte kiang ah Thagau Thiangtho ah a thupiak zosia a piak dan leh, lâk to ah a um ni tiang in, a leng in ka hun zik hi.

³Zia apostolte kiang ah chun thokgimna a thok zaw nung in, hetchianna tam tak in mihing in a kimusak ah, ni sawmli hial a kiang ua kilâk in, Pathian gam thu a gen hi.

⁴Amau tawh a um khawm lai un, a kiang un, “Jerusalem khua hi nusia kiu in la, Pathian thil tiamsa, la kiang ua ka la gen la het tâk uh kha ngâk zing un,” ti’n thu a pia.

⁵Johan khan tui in a baptis sek a; himaleh, tu’nung ni sawt lo cha sung in Thagau Thiangtho ah baptisma chang ding la hiu, a ti’n.

⁶Chun, amau chu a hung kikhawm ua, a kiang in, “Lalpa, tu’hin a hem Israelte kiang ah lenggam la piak kik ding chu?” ti’n a dong ua.

⁷Ama chun, a kiang un, “Pa’n ama thuneina a koi ahiziak in, a hun leh nite chu nangmau het ding ei puai.

⁸Himaleh, Thagau Thiangtho chu la chung ua a hung tun phat leh, thilhitheina nei ta’n lau; tichun, Jerusalem, Judea gam leh Samaria gam leh kawlkil tiang ah, ka thu hiatpite hung hiding la hiu,” ti’n a dawnhu a.

⁹Zia thute chu a gen zaw phatin, a et zing lai un, ama chu lâk to in a um ta’n, sûm in ama chu a pui to ah, a mupha ta puau hi.

¹⁰Ama lâk to ah a um lai tak ah van lam a et zing lai un, a kiang un mi pani puan vâm sil in a hung ding phut ziang tau a.

¹¹Amau chun, “Galili mite haw, bangatia van lam en ah ding zing la hiu em? Zia Jesu, la kiang ua kipat van lam ah lâk to ah um hi, van lam ah chia to la mu gual ngei un hung kit ding ahi,” a hun tiu a.

¹²Ziazaw chun, Oliv tâng ah kipat chun Jerusalem khua lam in a hung kit tau a; zia mun chu Jerusalem ah kipat sabbath ni chia phâkna chan bep ahi.

¹³Khawpi sung a tun phat un, pindan chungnung ah a umna mun ua chun a lut un, Peter, Johan, Jakob, Andria, Philip, Thoma, Bartholomai, Matthai, Alphâi Chapa Jakob, Zelot pawl ah mi Simon, Jakob suapi Juda tawh a hiu a.

¹⁴Amau chu hun tin in lungthim munkhat pu’n a pauchap un, numei khenkhat, Jesu nu Mari tawh a suapite tawh le a hiu a.

¹⁵Zia hun lai ah chun Peter chu gingtute lak ah chun a hung dingdok a, (zia tak ah kikhawmte chu mi za leh sawmni vel a hiu,) ama chun,

¹⁶“Unaute haw, Jesu mante mapui ah pang, Juda chung thu, Thagau Thiangtho in David kam ah a la gen, Pathian lekha thu kha a guitung ding him ahi.

¹⁷Ama chu I lak ua simkhawm ahi’n, zia nasepna hinle chan a nei hi,” ti in.

¹⁸(Zia pa khan a gitlo man ah a lawdaw sum ah chun lou mun khat a chaw’n; zia tak ah chun a bungbusip in a chu, a gilpi puakjak in, a gil a lawt tai.

¹⁹Zia thu chu Jerusalem ah chêng zosia’n a hiau a; ziaziakchun, zia lou mun chu amau pau in Hakeldama a tiu ah, zia chu, “Thisan Lou mun,” ti’na ahi.)

²⁰“Pâkna Labu ah chun zia gual hin a la kizik ah: ‘A umna mun chu a ngawn ah nutsia in um hen la, a sung ah chêng ding kuama um kiu hen’; ti leh, ‘Ama hotu hi’na chu midang in lua tau hen,’ ti in.

²¹Ziaziakchun, Lalpa Jesu I lak ua a um lai ah I lak ua a la pang zing;

²²Johan baptisma chansak hun lai ah kipat, eimau kiang ah kipat van ah lâk to ah a um tiang ah I lak ua a la pang mi pakhat chu, a thawkitna hetpi ah I pankhawmpi ding un têl hitiu,” ti in.

²³Tichun, mi pani, Barsaba kiti, Jasta le kiti sek Joseph chu tawh Matthia chu a hun têldok tau a.

²⁴Chun, a pauchap ua, “Lalpa, nang in mi zosia lungthim la hia’i. Zia mi panite lak ah la têl zawk chu ei hun hetsak in,

²⁵Juda chun ama mun lam ah a chiatheina ding ah a nutsia, zia nasepna leh sawlchâk hi’na mun chu hun lua ding pen chu,” ti in.

²⁶Chun, amau â dingin âi a hun sân ua; a âisân uh chu Matthia chung in a chu ta’n: tichun, ama chu sawlchâk sawm leh khatte lak ah simkhawm ahi tai.