Read Vaiphei NASEPTE 10 Bible Online

NASEPTE 10 - Vaiphei bible

NASEPTE 10

¹Kaisaria khua chun mi pakhat, a min Kornelia kiti, Italian Pawl a tiu, sepai za hotu a um a.

²Ama chu Pathian ngaisak tak, a sunghawu ah Pathian lau tak ah khawsa mi, migentheite kiang ah le thilpiak chîng mi, Pathian kiang ah pauchap zing mi ahi.

³Ni khat chu nitâk lam dak thum ding vêl ah hin, Pathian vansawlchâk pakhat a kiang in a hung kilâk ah, “Kornelia,” ti’n a hun ko a.

⁴Ama chun lau tak in a vak en ah, “Lalpa, bang a hem?” a tia. Ama chun, a kiang in, “La pauchapnate leh la thilpiakte kha Pathian ma’n het zing dingin a tung to tai.

⁵Tu’hin, Joppa khua mi sawl inla, mi pakhat Simon kiti, a min dang Peter a tiu chu vakosak in;

⁶ama chu savun siampa Simon In ah a tung in, a In chule tuipi pâmchin ah um ahi,” a hung ti’n.

⁷Kornelia kiang ah thu hung gen vansawlchâk chu a chia mang phatin, a In ah a suakte lak ah mi pani a ko a; chuleh, sepai kipezo tak, ama en zui zo zing khat tawh,

⁸amau cheng kiang ah thil umdan pha tak ah a hil zaw phatin, Joppa khua chun a sawl tai.

⁹A jing ah, lampi a chia jel lai ua chun, khawpi chu a hung tung vâng vâng tau a, sûn kim ding vêl ah hin Peter chu Inchung lam ah pauchap dingin a vakal to a.

¹⁰Chun, a gil a hung kial ta’n, an nêk a nuam tai; a nêk ding a bawl lai tak un, jel in a hung um ta’n.

¹¹Van hung kihong in a mu’n, zia tak ah chun bawm tawhbang pakhat, leitual ah hung kikhâitha suk, lian tak mai, killi nei ah kisiam a mu ta’n.

¹²Zia sung ah chun lei ah keng pali nei ganhing chikim, gamsate, ganhing bokvâkte, chunglêng vachate, kim tak in a um un.

¹³Aw khat a het chun, “Peter, kipan inla, that inla, ne’n,” a hun tia.

¹⁴Himaleh, Peter chun, “Hilo e Lalpa, thilbuak leh a thianglo ka ne ngai puai,” a tia.

¹⁵Ziazaw chun, a niveina’n, “Pathian in a sukthian tâk chu nang in a buak in ngai kin,” a hun tia.

¹⁶Zia gual ah chun thumvei a hung um ah, ziazaw chun, zia bawm chu van lam ah khai to in a um kit kawm tai.

¹⁷Peter chun zia a thil mu chu bang ti’na ahi diam tia ngaitua ah a lungkham lai in, Kornelia’n mi a hun sawlte kha, Simon In hun hawl in kêlkot bul in a hung ding tau a.

¹⁸Zia tak ah chun Simon, a min dang Peter kiti chu a tun leh tun lo a hung dong ua.

¹⁹Peter in a thil mu chungchâng ngaitua ah a la um lai tak chun, Thagau chun, a kiang in, “En in, mi pathum in a hung hawl ui.

²⁰Tu’hin kipan inla, kum suk inla, ginglâ lo hial in amau chu zui in; amau chu ka hun sawl a hiu,” a hun tia.

²¹Tichun, Peter chu a kum suk ah, Kornelia mi hun sawlte kiang lam chun a chia ah, a kiang un, “La mi hawl uh chu kei hi ka hi; bang ziak ah hung la hiu em?” a vatia.

²²Amau chun, “Kornelia kiti, sepai za hotu, mi ginum tak leh Pathian kicha tak ah khawsa leh, Juda nam zosiate lak ah le minpha tak ah um chu, Pathian ah kipat hung vansawlchâk thiangtho hiatsak in, a In ah nangma vachia ah, la thugen a ngaithâk theina dingin a hung ko ding ah ei sawl ah, hung ka hiu,” a vatiu a.

²³Peter in amau chu a ko lut ah, In ah chun a tunsak ah; a jing in Peter le a kipan ah, a zui ngal a; Joppa khua unau khenkhatte’n le a zui ua.

²⁴A jing in Kaisaria a tung ua, Kornelia chun amau chu a la ngâk zing in, a chanaute leh a gual dawitheite sia chu a la ko khawm a.

²⁵Peter chu a hung lut phatin, Kornelia chun a la lop ah, a kengbul ah chun a bokkhup ah, a la be ziang tai.

²⁶Himaleh, Peter chun ama chu a kaitho a, “Tho in, keile mihing mai mai ka hi,” a tia.

²⁷Kiholim kawm in a lut ua, mi tam tak um khawm chu a vamu;

²⁸a kiang un, “Juda mite’n nam dangte kiang ah chia leh, kipawl hi dan tawh kikãl ahi dan nang un la hiau ah; himaleh, kuama thianglo leh buak ahi ka ti’lona ding un, Pathian in ei hiatsak ta ahi.

²⁹Ei hung ko phat ua khan, nial lo in ka hung ziang ahi. Ziaziakchun, bang hi ding ah lei hung ko uh a hem?” ti’n a dong a.

³⁰Kornelia chun a dawnhu a, “Ni li a hita’n, tu’ phat vel ah hin ka In ah nitâk dak thum ah ka pauchap lai tak in, mi pakhat puan vâm tak sil in ka ma-âng in a hung ding a.

³¹Ka kiang in, ‘Kornelia, la pauchapna kha het in a um ta’n, mite kiang ah la thilpiakte kha le Pathian in a hezing hi.

³²Joppa khua’n mi sawl inla, Simon, a min dang Peter a tiu chu hang kosak in; ama chu tuipi pâm ah savun siampa Simon In ah tung ahi,’ a ti’n.

³³Ziaphatchun, a ko ding ah mi ka hun sawl pai ziang ahi; la hung hi a phai. LALPA‘n thu a piak tapo he ding in, ka leng un Pathian mit mu in zia hin ka um ui,” a tia.

³⁴Peter chun thu a hun gen pan a: “Tu’hin, Pathian in mi doichuam diak a nei puai ti kichian tak in ka he tai;

³⁵namtin lak ah ama lau ah, dik tak ah a na sêm taphot chu a dawi hi ti ka hechian tai.

³⁶Pathian in a thu chu Israel mite kiang in a hun tun ah, Jesu Khrista ah thamuanna thu a gen, ama chu mi tin Lalpa ahi, ti hi.

³⁷Johan in baptisma thu Galili gam ah a gen ah kipat khan, zia thu chu Judea gam zosia’n a kithang suak tai;

³⁸Pathian in Nazareth Jesu sathau a nu’ a, Thagau Thiangtho leh thil hitheina’n a thuam a; tichun, ama chun na pha tak sêm in, diabol in a engbawl zosia chu a hi’dam sik sek a.

³⁹Judea gam leh Jerusalem ah a nasep phat dan hiatpite chu kei uh ka hiu. Ama chu thing ah khaikâng in a that tau a;

⁴⁰himaleh, Pathian in ama chu a ni thum ni’n a kaitho kit ah, ama ngei le a hung kilâk kit a,

⁴¹mi zosia kiang ah vang a hipua’n; Pathian in a thuhiatpi ding ah a têl, keimau ngei hi, thi’na kipat a thawkit nung ah ama tawh nekhawm leh dawn khawmte kiang in ahi.

⁴²Mite kiang ah a thu gen ding leh, ama chu mihing leh mithite chung thu vaihawmtu ding ah Pathian in a namdet ahi dan, hiatsak dingin ei sawl a.

⁴³Jawlneite zosia’n a chung thu a la gen uh, ‘Kuale a ging tapo chun a min in gitlo ngaidamna chang ding a hiu,’ ti thu kha,” a tia.

⁴⁴Peter in zia thute a gen zing lai ah chun, a thugen ngaitha zosiate chung in Thagau Thiangtho a hung tung ta’n.

⁴⁵Zektan mi Peter hun zuite chun, Jentelte chung ah le Thagau Thiangtho butthâk ah a um chu a muu in mak a sa ma ma ziang ua;

⁴⁶pauhetlo ah a thugenteu chu a hun het phat un, Pathian pakcha a hiu ti le a he tau a. Ziaphatchun, Peter chun:

⁴⁷“Zia mite hinle eimau chan gual gual ah Thagau Thiangtho a chan tâk ziak un, amau le tui ah baptisma a chan lona ding ua khâm thei kua um ding a hem?” a hun tia.

⁴⁸Tichun, Jesu Khrista min ah baptisma chang dingin thu a pia. Tichun, ni bang jat a hem châm tadi ding in a tho tau hi.