Read Vaiphei NASEPTE 12 Bible Online

NASEPTE 12 - Vaiphei bible

NASEPTE 12

¹Zia ban ah chun, Lengpa Herod in kochuamte lak ah kuate a hem hi’genthei gua’n a hung kipan a.

²Johan suapi Jakob kha le chemjam in a that ta’n.

³Zia gual ah a bawl chun Judate a kipaksak hi ti a het phat in, Peter chule mat a gua kit ngen a. (Zia chu Thawipanglo Kût hun lai a hin.)

⁴A mat nung in suangkul in a khum ah, a ngâk dingin sepai pawl li, pali chiat in a kisânsak ah, Chiakân Kût zaw phat leh mipi mai ah puidaw a guat ahi.

⁵Peter chu suangkul ah a um lai in, kochuamte’n ama â dingin phatchuamngai tak in Pathian kiang in a la pauchap piak tau a.

⁶Herod in puidaw a guat jan tak ah chun, Peter chu sepai pani kikâl in thikkhau pani but in a ipmu; a vêngte chunle kotkhak bul ah chun, suangkul chu a vêng un.

⁷Lalpa vansawlchâk pakhat a kiang in a hung lut ah, suangkul sung chu a hung salvâk tai. Peter pangche a hun bêng ah, “Tho vak in,” a tia. Chuleh, a kihênna khaute chu a khut ah kipat in a kitham tai.

⁸Vansawlchâk chun a kiang in, “La kawng gâk inla, la kengtawdap but in,” a tia. Zia gual ah chun a bawl tai. Chuleh, a kiang in, “La puan sil inla ei zui in,” a ti kit a.

⁹Peter chu a pawt ah, a zui ta’n; vansawlchâk tawidan chu a tak ahi ti a hepua’n, kilâkna a mu hizaw dingin a ngaitua a.

¹⁰Tuatil pen leh a ban ah a vêngte chu a khêl nung un khawpi sung lam lutna thik kotkhak bul chu a tung tau a. Kotkhak chu amau â dingin a la kihong kawm in a la um ah; a pawt ua, khua sung lamlian khat a zui un, vansawlchâk chun a nusia tai.

¹¹Peter chu a hung pil phatin, “LALPA‘n a vansawlchâk a hun sawl ah, Herod khut leh Juda mite kinepna zosia ah kipat ei hukdok ahi ti tu’hin dik tak in ka he tai,” a tia.

¹²Chutia, a kingaitua zaw ah chun, Johan Marka a tiu, a nu Mari In ah chun a vachia ah; zia tak ah chun pauchap in mi tam tak a la um khawm ua.

¹³Peter in sumkûl kotkhak a hun kiu phatin, Rhoda kiti nungak pakhat a dawnhu dingin a vachia a.

¹⁴Peter aw chu a het phat in, kipak talua’n kotkhak chule hong lo in, a tailut kit ah, Peter kotkhak bul in a ding hi, ti’n a vagen a.

¹⁵Himaleh, amau chun, “A ngol la hita maw!” a tiu a. Ama chun, “Ahi tak tak hi,” a tia, a pang tei tei a. Chuleh, amau chun, “A vansawlchâk ahi chu,” a tiu a.

¹⁶Zia hun sung chun Peter chun kot chu a kiu zing ah; kot a hon phat un, ama chu a mu tau ah, mak a sa ma ma ziang ua.

¹⁷Ama chun a thipna ding un a khut a jap ah, LALPA‘n suangkul ah kipat a hung puidaw dan chu kichian tak in a hil a. Ziazaw chun, “Chiau in la, zia thilte hi Jakob leh unau dangte kiang in vahil un,” a tia. Tichun, a pawtdok ah, mundang in a chia mang tai.

¹⁸Khua a hung vak phatin Peter khoi ah bangti a tam, ti ngaitua in sepaite chu buai namai in a buai ta puau a.

¹⁹Herod in a hawl phat in a mu ta him him pua’n, a ngâkte chu a dawpchian ah, tha dingin thu a pia tai. Peter chu Judea gam ah kipat Kaisaria khua’n a chia suk ah, zia chun a um den tai.

²⁰Zia hun lai ah chun, Tura leh Sidon mite chung in Herod chu a lungna ma ma a. Tichun, kithutuak tak in a kiang in a hung un; Blasta, lal In ah vaihawm pakhat chu a hun ho lungdam masau ah, kichamna thu a hung gen tau ah; amau chu zia lal gam neipa gam ah kipat chu nêk leh châk hung la sek ahi ngal un.

²¹Tichun, a nitiam niu ah chun, Herod chu a lal puan ah kithuam in, a lalchutpha’n a kichu ta’n, a kiang un thu a hun gen a.

²²Mi zosia chun, “Pathian aw ahi, mihing aw ahipuai,” ti in a hung kiko tau a.

²³Ziaphatchun, ama’n Pathian kiang ah lopina a piak lo ziakin, Lalpa vansawlchâk in phutlo in a gawt ah, gûlkût in a ne, a thi tai.

²⁴Ahi’n, Pathian thu chun ma a sawn jel ah, gingtu le a hung pung deu deu tau hi.

²⁵Barnaba leh Saul chun a nasep ding siau a hun sukbutin phat un, Jerusalem ah kipat in Johan, Marka kiti kha tawh kiton in a hung kile’kit tau hi.