Read Vaiphei NASEPTE 16 Bible Online

NASEPTE 16 - Vaiphei bible

NASEPTE 16

¹Paul in Derbi leh Lustra khuate hile a hun chuan a; zia tak ah chun nungzui pakhat Timothi kiti a la um ah, ama chu a pa Grik mi, a nu chu gingtu pha tak khat Juda mi ahi.

²Ama chu Lustra leh Ikoniam vêl ah um unaute lak ah mi minpha tak a hi.

³Paul in ama chu pui a nuam ah; a nai tuam ah Juda mite zosia’n, a pa chu Grik mi ahi ti a het ziak un zek a tansak ah a pui tai.

⁴Khua chuam chuam a hun chot lai un, a chiana lam lam un, Jerusalem ah upate leh apostolte thupûkna thute kha a gen malam pek un, zia chu zawm dingin a hil malam pek tau hi.

⁵Tichun, kochuamte chu ginna phudet in a um pek ua, nisi’n in a pung hul hul tau hi.

⁶Phrugia leh Galatia gam a chuan suak tau a; himaleh, Asia gam ah thugen ding chu Thagau Thiangtho in a zada a.

⁷Musia gâl lam a tun phat un, Bithunia gam ah lut a guau a; himaleh, Jesu Thagau in a phal pua’n;

⁸zia phat chun, Musia gam chu paltheng in Troas lam in a hung suk zaw tau a.

⁹Jan ah chun Paul in kilâkna a mu ta’n: Makedonia gam ah mi pakhat ding in a mu’n, zia mi chun, “Makedonia lam ah hung gâl kâi unla, ei hung panpiu in,” ti’n a hun ko a.

¹⁰Zia kilâkna chu a hun mu phât in, LALPA‘n chanchinpha gen ding ah zia lam ah chun ei ko ahi ngei hi, ti ka het tâk ziak un, Makedonia lam ah gâl kâi dingin ka kisa tau a.

¹¹Troas ah kipandok in, Long in Samothres, tui chetua kâl ah khua chun ka kitawl lut tau ah, a jing in Neapolis ka tung un;

¹²zia kipat chun Philippi khua ka tung un; zia khua chu Makedonia gam ah khawpi lianpen khat, Rom mite chênna ahi. Zia khua chun ni tam deu ka châm tau a.

¹³Sabbath ni chun, khawpi pâm lui pang ah ka vapawtdok ua, pauchapna mun ding ah lemchâng tak hi’n ka hiau ah; tichun, ka kichukhawm ua, zia vêl ah numei umte kiang ah chun thu ka gen tau a.

¹⁴Zia tak ah chun numei pakhat, Thuatira khawpi puan sandup zuak sek, a min Ludia kiti chu a um a; ama chu Pathian ho sek mi ahiziak in, ka thugen uh chu pha tak in a ngai a. A lungthim chu LALPA‘n a hong ah, Paul thugen ah chun a hung lunglut ma ma tai.

¹⁵Amanu leh a chanaute chu baptisma a chan phat un, amanu chun ka kiang un, “Lalpa ah mi ginum ah lei ngai ua leh hung unla, ka In un hung tung un,” ti’n ei chial ngût ngût a.

¹⁶Ni khat chu pauchapna mun ah ka chiau leh, nungak pakhat, thithajawl a um ah, thilhithei tak ahi’n, amanu chun a âisân ziakin a pu â dingin sum tam tak a law sek a.

¹⁷Zia nu chun Paul leh kei uh chu ei hun zui ah, “Zia mite hi Chungnungpen Pathian nasemte a hiu in, eimau kiang ah hukdamna lampi ei kawkmu ding ah hung a hiu hi,” ti’n a hung kiko zui pek a.

¹⁸Zia gual chun ni tam tak ahi zing ta’n. Paul chun lungna tak in a kihei ah, zia thitha kiang ah chun, “Zia nu ah kipat chun hung pawtdok dingin Jesu Khrista min in thu ka pia la hi,” a hun tia. Zia hun ma ma ah chun a pawtdok tai.

¹⁹Zia nu pute chun a sum mu’nau a bei tai ti a het phat un, Paul leh Sila chu a man ua, kaithial lai ah vaihawmte kiang in a kai lut tau a.

²⁰Thukhente ma-âng ah a pui lût phat un: “Zia mite hi Juda mi hingal in khawpi sung a subuai ui;

²¹Rom mite â ding ah dan ka zui lo ding uh leh zui thianglote a gen gen ui,” a tiu a.

²²Ziaphatchun, mipi chu amau nialkãl dingin a hung pung khawm tau a; thukhentute chun a puan uh a lîpthâk piak ua, amau chu savun khau ah vok dingin thu a hun piau a.

²³Nasa tak ah a vok zaw phat un suangkul in a khum ua, suangkul vêngpa chu bit tak ah vêng dingin thu a piau a.

²⁴A thuhil dungzui ua chun suangkul gil lam tak ah chun a koi ua, a keng uh bul det tak in a bultuk tau hi.

²⁵Jan khang lai tak in Paul leh Sila chu a pauchap ua, Pathian pâk in La a sau a; suangkul ngâkte zosia’n a ngaitha zing ua.

²⁶Zia lai tak ah chun thakhat in lîn a hung kilîng ah, suangkul chu hung kilok in, a kotkhak zosia chu thakhat in a hung kihong ta’n; tichun, mitin kolbute chule a hung kiphel zo tai.

²⁷Suangkul vengpa ipmu lai chu thakhat ah a khatlaw phatin, suangkul ngâk zosia chu jam mang zo ta ding ua a ginchâk ziakin, kisutlup ding gua’n a chemjam a hun jukdok a.

²⁸Himaleh, Paul chu aw ngai tak in a hung kiko ah, “Bangma kilaw kin, ka leng un zia hin ka um nau hi,” a hun tia.

²⁹Ziaphatchun, suangkul vêngpa chun meivak a hawl ah, a hung chawm lut ah, kithing kawm kawm in Paul leh Sila kengbul ah chun a hung bokkhup ta’n.

³⁰Amau chu a puidok ah, a kiang ua chun, “Pute haw, hukdam ah ka um theina dingin bang ka hi diam?” ti’n a dong tai.

³¹Amau chun, “Lalpa Jesu Khrista ging in; tichun, hukdam in um in la tin, la Inkuanpite le,” ti’n a dawnhuu a.

³²Ama leh a In ua um zosia kiang ah chun Lalpa thu chu a hil tau a.

³³Zia jan ma ma chun a voknau beliamte chu a sil piak a; tichun, khawdâng lo in, ama leh a Inkuanpite chu baptisma a chang chiat tau hi.

³⁴Amau chu a In ah pui lût in, a an nêk ding uh a lui piak ah; a sunghawu ah Pathian a hun gin tâk ziak un a kipak ma ma tau hi.

³⁵Jingkal ahi phatin, thukhente chun sepaite a hun sawl ua, “Zia mite kha thadok tau in,” a hun tiu a.

³⁶Suangkul vêngpa chun zia thu chu Paul kiang in a hun tut ah, “Thukhente chun thâdokna ding thu a hun puang tau hi; ziaziakchun, hung pawtdok unla, thamuang tak in chia tau in,” a tia.

³⁷Himaleh, Paul in, “Rom mi ka hingal un, ka thiam leh thiamlo uh het lo in, vantang mit mu’n lei vuau ah, suangkul ah lei khum ua; tu’hin a gûk ah thâdaw lei guat uh a hem? Chutichu hithei him him pua’n a! Amau hung uh hen la, amau ngei ngei in ei hung puidok uh hen,” a tia.

³⁸Tichun, sepaite chun thukhente kiang in a gen kit un; Rom mi a hiu ti a het phat un a lau ma ma tau a.

³⁹A hung ua, a kiang un ngaidam a don tau a. Chun, a puidok ua, zia khawpi chu nusia ta dingin a don tau a.

⁴⁰Suangkul nusia in Ludia In ah a lut kit un; unaute tawh a kimu tua kit un, tîlkhona thu a gen zaw phat un, a kipan kit tau hi.