Read Vaiphei NASEPTE 17 Bible Online

NASEPTE 17 - Vaiphei bible

NASEPTE 17

¹Amphipoli leh Apolonia khua haw malam ah chia pek in, Thessalonika khua a tung ua; zia chun Judate sunagog khat a um a.

²Paul chun a hi’dan ngai gual in a lut ngal a, sabbath ni thumvei amau tawh Pathian Lekha thu ah kinial in a um un,

³Messiah chun gentheina thuak ah, thina ah kipat thodok ding him a hi’dan chu gunchu tak in a suidawpi ah, a hilchian pek a; “Zia Jesu, a chanchin la kiang ua ka gen hi Messiah chu ahi ngei hi,” ti’n a hil a.

⁴A lak ua khenkhatte chun a ging un, Paul leh Sila chu a zui tau a; ziate lak ah chun Grik mi kipezo tak takte leh numei lak ah mala thei ngenle tam tak a pang ui.

⁵Himaleh, Judate lak ah a taksang lo pawlte chu itsikna’n a dim tau ah, khawlai ah mi vak mai maite leh, mi a mu tapoteu chu a kaikhawm ua, khawpi sung chu a subuai tau a. Paul leh Sila chu mat ah vantâng lak ah puidaw gua’ a hawlna lam un, Jason In chu a buluu tau a.

⁶A mu zaw lo phat un Jason leh gingtu khenkhatte chu khua sung vaihawmte kiang in a kai lut ua, a kiko ua, “Khawvel subuaite kha zia hinle a hung ui:

⁷Zia Jason hin a la tunsak a. Amau haw hi Lengpa, Kaisar vaihawmna dan botsia a hiu a, ‘Leng dang pakhat Jesu kiti a um hi,’ a tiu a,” ti’n a kiko pek ua.

⁸Zia thute chu a hun het phat un, mipi zosia leh khua sung vaihawmte’n le a hun buaipi tau a;

⁹Jason leh a dang dangte kipat chun a thasâng ua hên ding thil khat a lau ah, a thâdok tau hi.

¹⁰Unaute chun Paul leh Sila chu a jan a jan in Beroea lam ah a sawl tau ah; zia tak chu a tun phat un Judate sunagog in a lut ngal tau a.

¹¹Zia ah Juda mite chu Thessalonika mite sâng in a lungthim uh a kihong zaw’n, thu chu thanuam tak in a lop un, a thugenteu chu a dik leh diklo hetna dingin, nisi’n Pathian lekha thu’n a sui sek un.

¹²Mi tam tak in a ging tau a; Grik numei ja umte leh pawsal tam tak in le a ging tau hi.

¹³Himaleh, Thessalonika khua Judate lawi khan Beroea ah le Paul in Pathian thu a gen hi ti a het phat un, zia lam tiang ah chunle a hung pek ua, mipi chu a hung tîlsiau a.

¹⁴Ziaphatchun, unaute’n Paul chu tuipi lam in a sawl ngal tau a; Sila leh Timothi chu vang zia chun a umzing tau hi.

¹⁵Tichun, Paul vathakte chun Athen khua chan in a vathak tung tau a; Sila leh Timothi chun kin tak ah amau hun del kit ziang ding ah a vaithâk ziakin, a kile’kit pai tau hi.

¹⁶Paul chun Athen khua amau a la ngâk sung in zia khawpi chu milim ah dim ahi dan a mudaw ziakin a dâ ma ma a.

¹⁷Ziaziakchun, sunagog ah chun Judate leh sakhaw mi deu deute chu tawh a kinial sek un, kaithial lai inle nisi’n leh a kituakna mun mun un a kinialpi sek un.

¹⁸Epikuria mi leh Stoik mite lak ah mithiam khenkhat inle a hung kinialpiu a. A kim khat in, “Zia mi kamtampa hin bang a hem a gennop?” a tiu a; a dangte chun Jesu leh thawkitna thu a gen ziak ah chun, “Gamdang pathiante thu genpa hi’n a,” a tiu a.

¹⁹Tichun, Areopaga ah chun a pui ua, a kiang in, “Zia thugin thak la gen sek hi ka hethei diam uh?

²⁰Ka het ngailo uh la thugen hi mak ka sau in, zia thil umdan hi het ka nuam ui,” a tiu a.

²¹Athen khua mite zosia leh gam dang mi a chêngdente chu, thuthak him him gen leh ngaithâkna bep in a hun uh a mang sek ui.

²²Paul chu Areopaga mazawn tak ah chun a ding a, Nang haw, Athen khua mite haw, bangkim ah sa’khawmi tak la hiu ti ka hia’i.

²³Khawpi sung ah ka vâk vêl vêl in, la ho leh biak danteu hi ka mu ta’n, mâichâm pakhat ah chun lekha kizik, “HETLO PATHIAN KIANG AH,” kiti ka mu hen. Zia hetlo ah la biak uh chanchin chu ahi ka hun hiatsak nop.

²⁴Zia Pathian chu khawvel Siampa leh a sung ah um zosia Siampa, lei leh van Lalpa, tempul khut ah kisate ah hin a chêng pua’n;

²⁵ama chu thil tâksap nei gual in mihing khut ah zen lum let ngai le ahi puai; ama chun thithei zosia kiang ah hinna, hiattheina leh thil zosia a piak ahi zawi.

²⁶Lei chung zosia ah um dingin suanpa pakhat ah kipat in namtin ah mite a siam ah, amau â dingin hun bîte a guat piak ah, a umnau gamgî le a khen piak a;

²⁷tichun, Pathian chu a hawl ua, a kimai ua, a hun mudaw theina ding un; ama chu eimau ah kipat gamla lo cha ah um zing ahi ngal a.

²⁸Ama ah chun hing in I tawi un, I khawsau ahi, ti leh; la La phuakteu pakhat inle, Eihaw hile a suanteu I hiu, tia a gen gual ah khan.

²⁹Pathian suante I hiziak un, Pathian chu sana a hem, dangka a hem, suang a hem, mihing khutthiam ah bawl kawm thil a hem gual ah I ngai ding uh ahi puai.

³⁰Pathian in I mawllai hunteu ah ei ngaithiam ah; ahi’n la, tu’hin gamtin ah mi zosia chu lunghei dingin thu a pia ta ahi;

³¹ama’n ni a tep ziakin, ziaphat chuleh, a mi guat chu lei ah mite dik tak in vaihawm piak in a, Pathian in ama chu mithi lak ah kipat kaitho in, mi zosia kiang ah a hiatsak tai, a tia.

³²Mithite thawkitna thu a gen khâk phat ah chun, khenkhat chun a nuisan un; midangte chun, “Zia gual thu chu ngaithâk kit ka nuam ui,” a tiu a.

³³Himaleh, Paul chu amau lak ah kipat chun a pawtdok tai.

³⁴Ahi’n, a lak ua khenkhatte chun a thu gen chu a hun zawm un, a ging tau a, ziate lak ah chun Areopaga mi, Dionisia leh numei pakhat a min Damaris tawh, midang khenkhat le a hiu hi.