Read Vaiphei NASEPTE 18 Bible Online

NASEPTE 18 - Vaiphei bible

NASEPTE 18

¹Zia nung ah chun, Paul chu Athen ah kipat pawtdok in Korinth khua a tung ta’n.

²Klaudia chun Rom khua kipat in Judate zosia pawtdok ding ah thu a piak ziakin, Juda mi Akuila kiti, Ponto gam ah piang, a ji Prisila tawh Itali gam ah kipat hung tung lim a um a. Paul chu amau kimupi dingin a chia a.

³A nasep uh kibang ahiziak in, amau kiang in a tung ah, na a sêm khawm sek ua, a kivâknau chu puanbûk siam ahi.

⁴Tichun, sabbath ni si’n leh sunagog ah chun, Judate leh Grikte chu a thuzaw theina dingin, phatchuamngai tak in thu a zilsak sek a.

⁵Sila leh Timothi chu Makedonia ah kipat a hung tun phat un, Paul chu thugen lam bep in a kipia’n, Jesu chu Messiah ahi ti Judate kiang in a hilchian sek a.

⁶Amau hawn dodâl ah, a gensiat phat un, Paul in a puan ah kipat leivui thingtha’n, a kiang un, “La thisan uh chu la chung un um hen! Kei ka hileh ka thiang hi. Tu’ ah kipat hin Jentelte kiang in chia ta’ng ka,” a tia.

⁷Sunagog ah kipat chun a pawt ah, Tita Jasta kiti, mi pakhat In ah a lut ah, zia pa chun Pathian a ho sek ah; a In chule sunagog tawh kizom a hi.

⁸Sunagog ah vaihawmpa Krispa chun a chanaute zosia tawh Lalpa a ging tau a; Korinth khua mi tam tak Paul thugen hete chun le a ginchak tâk ziak un, baptisma a chang tau a.

⁹Jan khat Lalpa chu Paul kiang in a kilâk a, “Lau kin la, thu chu gen inla, thipsan kin;

¹⁰keima la kiang in ka um ah, kuama’n bangma hun law pua’n au; zia khawpi hin mi tam tak ka nei hi,” a tia.

¹¹Zia khua chun kum khat leh tha guk sung a lak un Pathian thu hil in a um tai.

¹²Akaia gam vaipua ah Gallio a pan phatin, Judate chu Paul dodâl ding in a hung kithutuak tau a; tichun, ama chu vaihawmna Inpi ah a hun kai lut pai tau a.

¹³“Zia pa hin dan lo gual tak ah Pathian ho dingin mi a jawl hi,” a tiu a.

¹⁴Paul in thugen ding ah a kisak lai tak in, Gallio chun Judate kiang in, “Zia hi gitlona tak tak leh thil hi diklona tak tak a hi chun, aw nang uh Judate, la thubuai uh ka hun ngaithâk ding him a hi’n;

¹⁵himaleh, zia hi, thu a hem, mi mal min a hem leh nangmau dan thu mai ah kinialna ahi chun, nang un kingaitua unla, keima’n vang zia gual thu hi vaihawm piak lo ding ka hi,” a tia.

¹⁶Tichun, vaihawmna mun ah kipat chun a nawdok tai.

¹⁷Ziaphatchun, mipite chun sunagog hotu Sosthen chu a man un, vaihawmna In mai tak ah chun a vuau a. Himaleh, Gallio chun zia haw chu bangmacha’n a ngai piak puai.

¹⁸Zia nung ah chunle Paul chu ni tam tak a um nalai ah, ziazaw ah chun unaute kiang in kithâkna thu a gen a, Suria lam in a kitawl kâi a, zia lam chun Priskila leh Akuila tawh a kiton ua. Kitepna khat a nei ziakin Kenkria ah chun a sam a mêt a.

¹⁹Ephesa khua a hung tun phatin, amau chu zia chun a nusia kit ah; himaleh, ama chu sunagog ah lut in, Judate kiang in phatchuamngai tak in thu a gen a.

²⁰A lak ua chun hun sawt deu châm dingin a tho ua, himaleh ama chun lem a sa pua’n,

²¹“Jerusalem ah Kûtna ka pan tei tei ding ahi, Pathian in lem a sak leh, ka hung kit lam leh hung bâng malam jaw’ng ka,” ti’n mangpha a thâk zaw tai. Tichun Ephesa khua kipat Long in a kipandok tai.

²²Kaisaria gam a kai phat un, Jerusalem in a chia to ah, zia tak ah kochuamte chu chibai a bûk ah, Antiok lam in a chia theng tai.

²³Zia tak ah chun hun bangchan a hem a um nung in, a kipan kit ah, Galatia gam leh Phrugia gam zosia a ban ban in a chuan vêl ah, nungzuite zosia chu a tîlhat pek tai.

²⁴Zia hun lai chun mi pakhat Juda mi, a min Apollo kiti chu Ephesa khua’n a hung ah, ama chu Aleksandria ah piang ahi’n. Thugen thei tak leh Pathian lekha thu he ma ma mi khat ahi.

²⁵Ama chu Lalpa Lampi thu zilsak leh, Johan baptisma bep he mi himaleh, lungthim ah phatchuamngai tak ahiziak in, Lalpa chanchin chu phatak in a gen a.

²⁶A tun in sunagog ah hangsan tak in thu a gen pan ngal a; himaleh, Akuila leh Priskila chun a ko ua, Pathian Lampi chu a kimzaw diak in a hil tau a.

²⁷Chun, Akaia lam ah chia ding a guat phatin unaute’n lekha puaksak in, nungzuite chun ama a la lop dingin a tîl un. Ama chu a tun phatin, Pathian hepina ziak ah gingtu hung hite chu nasa tak in a panpi a;

²⁸ama chun, mipi lak ah Judate le a nial zo ah, zia chun Pathian lekha thute chu mang in Jesu chu Messiah ahi, ti’n mipi chu nasa tak in a thuzaw tai.