Read Vaiphei NASEPTE 19 Bible Online

NASEPTE 19 - Vaiphei bible

NASEPTE 19

¹Apollo chu Korinth khua a um sung in, Paul chun a gam sunggil lam sia chu fang suak in Ephesa khua a hung tung kit a; zia chun nungzui khenkhat a kimuu a;

²a kiang un, “Gingtu la hung hi’tâk nung ua hin Thagau Thiangtho la chang tau em?” ti’n a dong a. Amau chun, “Thagau Thiangtho um lam lam le ka hepuau hi,” a tiu a.

³Paul chun, “Bang baptisma a hem la chan uh?” a tia. Amau chun, “Johan baptisma,” a tiu a.

⁴Ziaphatchun Paul in, “Johan in gitlo haisanna dingin mi a baptis sek a; ziaziakchun, mipite kiang in a nung ah hung ding chu a gintheina ding ua, zia chu Jesu gin ding ahi, ti thu a la gen ahi kha,” a tia.

⁵Zia thu chu a het phat un, Lalpa Jesu min in baptisma a chang tau a.

⁶Paul in a chung ua khut a ngat phatin, Thagau Thiangtho a chung un a tung ta’n; pauhetlo in a pau tau ah, Pathian thu a gen tau hi,

⁷a leng un piting sawm leh ni vêl a hiu.

⁸Sunagog ah a lut a, Pathian gam thu ah chun a kinialpi sek a, amau haw chu thuzaw tei tei gua’n, tha thum sung a lak un a um a.

⁹A lak ua khenkhat a lochal ziak un, thu chu gingcha lo ah, mipi âng ah zia Lampi chu a hun gensiat phat un, amau chu a nusia ah, nungzuite chu a pui chuam ah, Turanna Pindan ah chun nisi’n in a kiholimpi tai.

¹⁰Tichun, kum ni sung hial chu zia gual ah chun a sunzom pek a; Asia gam ah um zosia Juda mi hi’n Grik mi hileu, Lalpa chanchin chu a he suak tau hi.

¹¹Tichun, Paul khut in Pathian in thilmak danglam tak tak a bawl a,

¹²a kithekna puan a hem leh, a puanchênte leh a ti sukha photte chule damlote kiang in a hun chawi ua a dam sek ui; a sung ua kipat in thitha buakte le a pawt sek a.

¹³Juda mi thitha nawdok ah vâk tawl tawl pawl khat chun, Lalpa Jesu min ah thitha buak vopte nawdaw a guau ah, amau chun, “Paul in a gen sek Jesu min in ka hun vau hi,” a tiu a.

¹⁴Zia gual ah hi’sek chu, Judate thiampu hotu pakhat, Skeva chapa sagite chu a hiu a.

¹⁵Himaleh, thitha buak chun a kiang un, “Jesu chu ka hia’i, Paul chule ka hia’i; himaleh, nang uh hi kua la hiu em?” ti’n a dawnhu a.

¹⁶Zia thitha buak voppa chu a chung un a chawmdok ah, a zo kei ziang ta’n, a kidelnau ah chun liam leh ngawnchang in zia In ah kipat chun a jamdok tau hi.

¹⁷Zia chanchin chu Judate leh Grikte lak ah a hung kithang ta’n, Ephesa khua chêng zosia chun a he tau ah; a lau thei ma mau a; tichun, Lalpa Jesu min chu a hun chawisâng tau a.

¹⁸Chuleh, a ging tam takte chu a kiphuang ua, a thilhi zosiau chu a tâklang tau a.

¹⁹Dawithiam tam takte’n a lekhabu matteu chu a chawi khawm ua, mipi zosia ma-âng in a hâl tum tau ah; zia lekhabute man zat chu a sût ua leh, dangka sâng sawmnga man in a sutdok ui.

²⁰Tichun, Lalpa thu chu hat tak in a pung ta’n, a zo pek tai.

²¹Zia nung ah chun, Paul in Thagau pui ah Makedonia leh Akaia gam chu taw suak phot ah, Jerusalem chia ding a lung gul a. Ama chun, “Zia chu ka chia zaw tak leh Rom khua le chia ding ka hi,” a tia.

²²Tichun, a kithuapite Timothi leh Erastas chu Makedonia gam in a sawl ah, ama chu vang Asia gam in a um tadi a.

²³Zia lai vêl chun Lampi thu ziak ah chun mite chu buai namen in a buai ta puau a.

²⁴Mi pakhat a min Demetria, dangka sêk mi chun, Artemis biak In lim dangka siampa chun, a sekthiamte chu a lawk tam tak a pesek a.

²⁵Amau chu a nasep kibatpiteu tawh ko khawm in a kiang un, “Pute haw, zia nasepna hi I hau dawnau ahi ti la hiau hi.

²⁶Ephesa khua bep ah le hilo in, Asia gam zosia hial inle, zia Paul hin, ‘Khut ah siam pathiante hi pathian ahi puai,’ ti’n mi tampi a thêm zo ta’n, a pui mang zo tai ti hi nangmau ngei in la muu in, la hiau hi.

²⁷Ziaziakchun, zia I khutthiam thil uh hi bangmalo a hung suak ding bep hilo in, pathiannu lopi Artemis biak In hile bangmalo ah musit hung hiding ahi’n, ziaphat chuleh a ja umna zosia hi sukbei hung hiding ahi, ama hilah Asia gam pumpi leh khawvel in a ho uh ahi ngal a,” a tia.

²⁸Zia a thugen chu a het phat un, lungnatna’n a dim tau ah, a kiko ua, “Ephesa khua Artemis hi a lopi hi,” a tiu a.

²⁹Tichun, khawpi sung ah mi zosia chu a buai tau a; chun, Makedonia gam mi, Paul kitonpite lak ah mi pani Gaias leh Aristarka chu a man ua, a etnop bawlna In ua chun a sawn lut tau a.

³⁰Paul chu mipi lak ah valût ziang ding a gua’n, himaleh, nungzuite chun a phal puau a;

³¹Asia gam ah miliante lak ah chun a lawite khenkhat le a um un, ziate chunle ama chu zia etnop bawlna In ah chu kilâk lo dingin mi a vahilsak tau a.

³²Zia lai ah chun mi khenkhat chu thu chuam in a kiko ua, a dang lawi khat chu thu dang in a la kiko ua; mipi kikhawmte chu a buai tau ah; a lak ua a tamzawte chun bang ziak ah kikhawm a hiu le a hepuau hi.

³³Mipi lak ah khenkhat in Aleksandar chu a thiamna thu gen dan ding a hil un, Judate’n ama chu malam in a sawndok tau a. Aleksandar in a khut a hun jak ah, mipi lak ah chun a thiamna thu a hun gen gua.

³⁴Himaleh, ama chu Juda mi ahi ti a hetdaw phat un, aw kithakhat tak in dâkkâl ni sung ding hial chu, “Ephesa khua Artemis hi a lopi hi!” ti’n a kiko tau a.

³⁵Khawpi sung ah vaihawmte chun mipi chu a thipsak phatin, a kiang un, “Nanghaw Ephesa khua mite haw, Ephesa khua mite hi pathiannu lopi tak, van ah kipat hung ketha Artemis lim ho-te chu la hiu ti helo mi a um ua a hem?

³⁶Zia thu hi nial gual a hilo nung in, la thip hiat hiat ding uh ahi, thunung ngaitua lo in bangma la hi’ding uh ahi puai.

³⁷Zia la hun puiteu hi biak In suamte ahi puau in, la pathian nuu gensetele ahi diak puau hi.

³⁸Demetria leh a gualte mi them thiam haw chunle, kua lak inle thubuai a nei ua leh, thubuai genna In chu honsa hizing lo a hem? Vaihawmte le a um un, zia chun kihêk uh hen.

³⁹Zia chu hilo ah thu dang ah buai la hiu leh vang, vaihawmte a chutkhawm phat ua leh ngaitua mai zawu hen.

⁴⁰Tu’ni buaina thu ah hin dinmun lauthawn um tak in I um tau hi, a ziak bei ah zia thu hi buaipi ding dan ah I um tâk ziak un,” a tia.

⁴¹Zia a gen zaw phat ah chun a kikhawmte chu a pelsak tai.