Read Vaiphei NASEPTE 2 Bible Online

NASEPTE 2 - Vaiphei bible

NASEPTE 2

¹Pentikost ni a hung tun phatin, amau chu a leng un mun khat in a la um khawm un.

²Thakhat in van ah kipat hui hât tak gi tawhbang a hung tung ah, zia chun a kichutna Insung uh chu a lua dim ta’n.

³Meikuang gual ah kilang lei a hung um ah, a hung kihawmjak ah, amau haw a chang chiat tau a.

⁴A leng un Thagau Thiangtho in a hung dim tau a, Thagau in a pausak dungzui in pau dangte’n a hung pau tau ahi.

⁵Van nuai nam tin lak ah kipat Juda mi Pathian ho-te chu Jerusalem in a um un.

⁶Zia husa ziak ah chun mipi a hung khawm tau ah, a thugen uh chu mitin chun amau pau chiat ah a het ziak un, a lungkham ma ma tau a.

⁷Mak leh lungkham um a sak ziak un, “Zia thugente zosia hi Galili mi hilo a hiu em?

⁸Aleh, bangatia I leng ua I pianpi pau chiat ua he ziang I hiu em?

⁹Parthai mite, Mid mite, Elam mite leh Mesopotamia gam, Judea gam, Kappadokia gam, Pontus leh Asia gam ah chêngte leh,

¹⁰Phrugia leh Pamphulia, Aigupta leh Kurini kîmvêl ah Libia ah chêngte leh, khenkhat Rom ah kipat hung khualzin Juda phungkâite,

¹¹Kret mite leh Arab mite I hiu ah, I leng un Pathian thilhi lopite a gen uh chu eimau pau chiat in I he ziang un,” a tiu a.

¹²A leng un mak a sau ah, a ngaina a hepuau ah, “Zia um zia hi bang a hem?” a kiti tua chiat tau hi.

¹³Himaleh, khenkhat in a nuisan un, “Uain thak kham a hiu hi,” a tiu a.

¹⁴Ahi’n, Peter chu sawm leh khatte tawh ding khawm in, aw ngai tak in a kiang un thu a hun gen ta’n: Judea mite leh Jerusalem ah chêng zosiate haw, zia hi a la hiau inla, ka thugen hi ngai un;

¹⁵Ziate hi la ginchâk gual ua zukham ahi puau hi, jingkal dak kua bep ahi nalai ngal a.

¹⁶Zia hi Jawlnei Joel in a gen kha ahi zawi:

¹⁷Pathian in, ni nunung lam leh, mizosia chung in ka Thagau buntha’ng ka tin; chutichun, la chapateu leh la chanuteu in thu gen intiu in; la tangvalteu in kilâknate mu’n tiu in, la têkseteu chun mang in mat in au.

¹⁸Ahi, ka suak, numei leh pawsalte chung inle, zia ni ah chun ka Thagau hun buntha’ng ka tin; amau chun thu genlawk in au.

¹⁹Chung lam van ah chun thilmakte leh, nuai lam lei ah teptênate mu sak ing ka tin, thisan tawh, mei tawh, meikhute tawh.

²⁰Nisa chu thim hung suak intin, thapi chu thisan suak in a; Lalpa ni thupi leh lopi tak a hung tun masang ah chun.

²¹Ziaphat chuleh, kuale Lalpa min lam tapo chu, hukdam in um in au, ti kha.

²²Nanghaw Israel mite haw, ka thugen hi a la ngai un: Nazareth Jesu, Pathian in a hetpi ngei kha, ama mang in Pathian in la lak un thil lopi takte, thilmakte leh tepte’nate a bawl ah, zia chu nangmau ngei inle la hiatsau ahi’n,

²³zia pa ngei, Pathian in a gêl zawsa leh a hetlawkna dungzui ah la khut ua piakdaw ah um chu nanghaw’n dan pawlam ah umte khut in kros ah khenden in, la that tau a.

²⁴Himaleh, ama chu thina’n a tûktân zaw ding gual ahilo ziakin, Pathian in thina kipat tandok in, a kaitho kit ta’n.

²⁵David in a chung thu chu zia gual hin a la gen a: Lalpa chu ka âng in ka mu zing sek ah, ka kichawn lona ding in ama chu ka changlam in a um ah;

²⁶tichun, ka lungthim a kipak a, ka lei le a lim hi; ka taksale kinem tak in chawl in a.

²⁷Ka thagau chu mithi khua’n nusia pua’n la tin, la mithiangtho chu a muatmang dingle phal diak pua’n la.

²⁸Nang in hinna lampite chu lei kawkmu ta’n, nang in la mêl ah chun kipakna’n ei sudim ding la hi, ti’n a la gen hi.

²⁹Ka suapi Israelte haw, I suantu bul uh David thu ah hin, la kiang un hangsan tak in ka gen ngam hi: Ama chu a thi ta’n, vui in a um tai; chuleh, a thân le tu’ni tiang hin I kiang un a um nalai hi.

³⁰Ama kha jawlnei a la hiziak in, Pathian in a kiang ah a gen chu a hia’n, ama khalbe piang ngei chu a lalchutpha chutsak dingin a kihaksial a.

³¹Zia thilte hi mulawk in, David chun Khrista thawkitna thu ah zia gual hin a la gen hi: “Ama chu mithikhua nutsia in a um pua’n, a taksa chule a muat mang diak puai,” ti in.

³²Jesu chu Pathian in a kaitho ta’n, zia chu ka leng ua hin a hiatpitute ka hiu hi.

³³Ziaziakchun, tu’hin ama chu Pathian khut changlam ah choisa’n ah um in, Pa ah kipat Thagau Thiangtho hun sawlna ding thutiam chu chang in, a hun sawl tha ta’n, zia chu tu’ ah la muu leh la het uh hi ahi.

³⁴David chu van ah a kal to puai; himaleh, ama chun, Lalpa chun ka Lalpa kiang in,

³⁵“La mêlmate la keng nuai ah ka koi piak masia, ka changlam ah kichu’n,” a la ti kha.

³⁶“Israel Insung ah mi zosia’n zia hi he tau hen: Zia Jesu ngei, la khetden uh kha, Pathian in ama chu Lalpa leh Messiah in a siam tai,” ti in.

³⁷Zia thute chu a het phat un, a lung uh chu a kisun gual a hung hi ta’n; Peter leh sawlchâk dangte kiang ah chun, “Suapite haw, bangti ding ka hitau em?” a hun tiu a.

³⁸Peter chun a kiang un, “La lung uh hei unla, Jesu Khrista min in baptisma chang leu chin, la gitlonau ngaidam hi’ntin; tichun, Thagau Thiangtho thilpiak hi chang in lau.

³⁹A thutep chu nanghaw â ding, la chateu â ding, gamla tak ah um zosia a ding tawh, I Lalpau Pathian in a kiang ah a ko tapote â ding ahi ngal a,” a ti’n.

⁴⁰Chuleh, thudang tam tak tawh le hilchian in, a tilkho ah, “Tu’lai khang ah gitlonate lak ah kipat in kihukdok un,” a ti’n.

⁴¹Tichun, a thugen pomte chu a baptis tau a; zia ni chun mi sâng thum vêl belap in a um ui.

⁴²Amau haw chu sawlchâkte thuhilnate leh kithua khawmna, vaithum phelna leh pauchapnate’n a kipelut zing tau a.

⁴³Sawlchâkte mang ah thilmak leh tepte’na tam tak bawl ah a um ziakin mitin chu launa’n a dim tau a.

⁴⁴A ging zosia chu a um khawm un, thil bangkim a kikop tau hi.

⁴⁵A thilneiteu leh a vanteu chu zuak in, a khot zat uh chu mitin kiang ah a mamaw dungzui un a hawm sek un.

⁴⁶Nisi’n in tempul ah hun a mat khawm sek ziak un, a In un vaithum a phel sek ua, a anteu chu lungthim kipak leh huangphal tak in a ne sek ui.

⁴⁷Pathian a pâk zing ua, mitin doisakna a chang un. Chuleh, nisi’n in LALPA‘n a lak un hukdam ah um dingte chu a hun belap jel tai.