Read Vaiphei NASEPTE 20 Bible Online

NASEPTE 20 - Vaiphei bible

NASEPTE 20

¹Buaina chu a hung kiven phatin, Paul in nungzuite chu a ko khawm ah; a tîlkho zaw in Makedonia zuan in a kipan tai.

²Zia tuamvêl gam chu a fan suak phatin, gingtute tîlhanna thu tam tak a gen zaw nung in, Grik gam a hung tung a,

³zia tak ah chun tha thum sung a châm a, Suria lam ah kitawl kâi ding a guat lai in, Judate’n a la châng ui ti a het phat in, Makedonia lam ah kile’kit dingin a kisa zaw tai.

⁴Beroea khua Pirhas chapa Sopater tawh, Thessalonika khua Aristarkas leh Sekundas tawh, Derbi khua Gaias tawh, Asia gam ah Timothi, Tukika tawh Trophimas cheng inle a hun zui tau a.

⁵Ziate chu Troas ah a la tung masau a, zia tak ah chun ei la ngak ua.

⁶Vaithum Thawipanglo Kût bawl zaw ah chun, kei uh chu Philippi ah kipat Long in ka kitawl ua, ni nga ka kitawl nung un Troas khua a kiang uh ka tung un; zia tak ah chun ni sagi ka châm ua.

⁷Cholkâl khat sung ah ni masa pen ni ah vaithum ne ding ah nungzuite sia ka kikhopnau ah chun, Paul in thu a gen a; a jing ah kipandok ta ding ahizik in, jankhang tiang in thu a gen a.

⁸Pindan chungnung ka kikhopnau ah chun, thaumei tam tak a um a.

⁹Tangval pakhat, a min Eutikas kiti chu tukvan in a kichu. Paul thugen chu a sawt bêk tâk ziakin, a la ipmu vuang ta’n; zia Insawng thumna kipat chun a ketha’n, a thisa’n a vaphongdok tau a.

¹⁰Himaleh, Paul chu a kum suk ah, a baw khum ah, a pâi ah, “Lungkham kiu in, a hinna a um nalai hi,” a tia.

¹¹Tichun, Paul chu a hung kal to kit phatin, vaithum phelsua ah a nêk kawm un hun chomkhat, phalvak tiang in a holim kit ah; tichun, a kipandok tai.

¹²Tangvalpa kha dam tak in a pui mang tau ah, thamuan namen in a thamuang puau a.

¹³Asos zuan in Long in ka la chia masau ah, Paul le hung chuang ding ka tiu ahi’n; ama chu kenglam ah hung ding a ti zaw ta’n.

¹⁴Asos ah ka kisuktua phat un, ama le Long ah chun a hung chuang ah, tichun Mitilen lam in ka chia tau a.

¹⁵Zia kipat chu kitawl pek in, a jing in Khaios zawn ka tung tau a. A jing kit in Samos ka tung ua, a jing in Mileta ka tung tau hi.

¹⁶Paul chun, a thei liai leh, Jerusalem ah Pentikost ni mat a tup ziak in, Asia gam ah chun hun sawt tak mat nuam lo in, Ephesa khua hawthen a gaw tai.

¹⁷Mileta ah kipat Ephesa khua lam in mi a sawl ah, a kochuam ua upate chu a vakosak a.

¹⁸A hung tun phat un, a kiang un:

¹⁹kingaitawm tak leh thepna lak ah mitthi tam tak sêng in Lalpa na ka sêm a, Judate’n ei chân-gûkna ziak ua haksatna tam tak thuak in ka um a;

²⁰himaleh, nangmau phatna ding ahi’phot leh bangma kipadam lo in, mipi lak inle thu ka gen tho ah, thu tam tak ka hun hiatsak ta’n, a In In ah le ka chuantha chiat ahi kha;

²¹Juda mi leh Grik mi kuama khenchuam lo in, Pathian lam ah la lung hei theina diu ngaitua ziakin, I Lalpau Jesu ah chun ginna nga det zawn la lak un na ka sêm a.

²²Tu’hin vang thagau ah koltâng gual in, Jerusalem lam ah chia ding ka hi; zia tak ah chun ka chung in bang thil a tung diam ti vang ka hepuai;

²³Thagau Thiangtho in, khawtin in kânna leh sukgentheina’n a hun ngâk zing hi,” ti bep ei hiatsak hi.

²⁴Himaleh, ziate chun ei hi’lungkia diak puai; ka kitaisiakna lampi ka mabâk hi, kipak tak ah zaw ngei ding leh, Pathian hepina zia chanchinpha hiatsak ding ah Lalpa Jesu kiang ah, zia nasepna na ka mu hi sêm zo phot leng, ka hinna hile thâkla tâk in ka ngai puai.

²⁵Tu’hin ngai un, nanghaw hi Pathian gam thu tângkopi zel ah, ka vâk tawl tawl seknate hin, ka mêl mu kit ta puan lau ti ka hia’i.

²⁶Ziaziakchun, tu’hin mi zosia thisan in ka hul ahi, ti tu’ni hin ka hun hiatsak la hiu;

²⁷la kiang un Pathian thiltup gen ka kipadâm pua kha.

²⁸Pathian kochuamte, a chapa thisan ah a leisate chu vâk dingin, nanghaw leh la gan-gualteu chung ah chun chingthei un; Thagau Thiangtho in amau haw chu entup ding ah a hun koite chu la hingal un.

²⁹Ka pawt daw nung tak leh ngei hangsante la lak un hung lut intin, belam honte hi hun hawi puan ah ti ka hia’i.

³⁰Nangmau lak ngei inle mi khen khat in nungzui khenkhatte chu puidaw gua’n, puikawina thute hun gen ding a hiu.

³¹Ziaziakchun, a sun a jan ah mitthi pum ah chawlnga lo hial ah ka hun thuhil sek la hiu a; ziate kha hezing in, chingthei tak leh kivêng tak in um zing un.

³²Chuleh, tu’hin chu Pathian leh a hepina thu, a sukthianthote zosia lak ah hun siam piting thei leh golua ah hun siam ding, zia thu chu vopdet zing dingin ka hun kolsak la hiu.

³³Kuama dangka leh sana leh sil leh chên ka eng ngai puai.

³⁴Keima khut ngei ah hin na ka sêm ah, keima leh ka lawite tâksap awng chu ka huk sek ahi, ti nangmau ngei inle lei hetpi ma ma ngal un.

³⁵Bangkim ka hun nunmu ah, migentheite panpina ding ah la sep gim ding dan uh leh, ama I Lalpau Jesu ngei in, “Lâk sâng in piak in lukhawng a nei zawi,” a ti kha hezing un, a tia.

³⁶Zia thute chu a gen zaw phatin, a khiangkho ah a lêng un a pauchappi a.

³⁷Thasia tak in a kap tau a; Paul chu a ngawng ah kawi in a chawp un,

³⁸a mêl chu mu kit talo ding a hiu ti chu a lungngaipi pen un. Ziazaw ah chun a Long chuanna ding tiang in a vathak tung tau hi.