Read Vaiphei NASEPTE 22 Bible Online

NASEPTE 22 - Vaiphei bible

NASEPTE 22

¹Suapite leh pate haw, tu’hun a la lak ua ka hun gen ding, ka thiamna thu hi pha tak in ei la ngaithâk piak un, a tia.

²Hebrai pau ah thu a gen phatin, a hung thip zaw diak tau a; tichun, a gen zom a:

³Kei hi Juda mi dik tak, Kilikia gam ah Tarsa khua piang ka hi’n, chuleh, Gamaliel kengbul ah seilian, I pu leh pateu dan le bukim tak ah zil ka hi; tu’hun ah nanghaw zosia gual tho ah keile Pathian lam ah phatchuamngai tak mai ka la hi.

⁴Zia Lampi mite chu a thina ding tiang ua sawi inle ka la pang ah, a numei a pawsal kân in suangkul ah khum dingin ka pesek hi;

⁵zia haw chu thiampu lalte leh upate zosia’n le ei hiatpiu hi. Amau ah kipat phalna lekha chawi in, Damaska ah unaute chu vaman ah, gawt ding ah kânsa Jerusalem lam ah hun pui dingin ka kuan a.

⁶Chutia, lampi ka chia lai ah chun, sun lai tak ah hin, Damaska khua ka tung vâng vâng ta’n. Zia tak ah chun thakhat in van ah kipat vâk nasa tak in ei hun sal phut a.

⁷Ziaphatchun, leitual in ka kipuk ta’n; chun, aw khat ka hun he, Saul, Saul, bang a tia ei hi’genthei la hem? ei hun ti’n.

⁸Keima’n, Lalpa, kua la hem? ti’n ka dong a. Ama chun, Nazareth Jesu, la sukgenthei hi ka hi, ei hun tia.

⁹Ka lawite chun vâk chu a muu a, ei hopa aw chu vang a hepuau hi.

¹⁰Kei chun, Lalpa, bang hi’dingin lei dawi em? ka ti’n. Lalpa chun, kipan inla, Damaska khua’n chia in; zia tak ah chun la hi’ding ah guatsa umte chu hun hetsak in au, ei tia.

¹¹Zia vâk chu a nasat ma ma ziakin khua ka mu thei ta pua’n. Ka kitonpite chun ei kaibât tau a; Damaska khua chu ka tung thei tai.

¹²Zia tak ah chêng mi pakhat, dan lam ah le mi kipe zo tak mai, Judate lak ah le mi min pha tak, Ananiah kiti chu a la um a;

¹³ama chu ka kiang in a hung ah; a ding ah ka kiang in, unaupa Saul, khua mu thei ta’n! ei tia. Zia dâkkâl sung ma ma chun ama chu ka vak et leh ka mu thei ta’n.

¹⁴Ama chun, I pu leh pateu Pathian in a lung lam he ah, midik tak chu mu ding leh a kam ah thupawt chu he ding in a hun têl a;

¹⁵la thil mute leh la hiatte chu mi tin kiang ah a thu hiatsaktu hung hi ding la hi.

¹⁶Bang ding ah khawdâng la hem? Kipan inla, ama min in baptisma chang inla, la gitlonate sawp thian ah um in, a min chu ko ta’n, ei ti ta’n.

¹⁷Jerusalem khua ka hung tun kit phatin, tempul sung ah ka pauchap sung in jel in ka hung um kit a;

¹⁸Jesu chu ka mu’n, ka kiang in zia thu hi a hun gen a: A kinthei penin Jerusalem ah kipat pawt in, keima chung thu ah la thugen haw chu pom pua’n au, a ti’n.

¹⁹Keima’n, Lalpa, sunagog tin ah kipat in mi tam tak, nangma hun gingte chu ka la man sek ah, suangkul ah le mi tam tak ka la khum tai, ti a hiatsau ahi;

²⁰chuleh, nangma ziak ah Stephen thisan a kisua lai ah khanle, a kiang un ka la ding ah, a thi ding lem ti’pi in, ama thatte puan ka la choi piak hi, ka ti’n.

²¹Ziaphatchun, ama chun, zia kipat hin pawt in, gamla tak ah Jentelte kiang ah hun sawl ding ka hi, ei tia, ti’n a gen a.

²²Zia tiang ah chun a ngaithau a; chun, a kiko ua, “Zia tawhbang mi chu lei ah kipat koimang un! A hing tâk ahi puai,” a tiu a.

²³Chun, kiko in, a puanteu pai mang in, leivui van lam in a theu a.

²⁴Sepai hotu lalpen chun kul sung ah pui lût ah, a kikona ziak pen uh hetna ding ah vok ah thu dot dingin thu a pia ta’n.

²⁵Himaleh, thikkol a hun busak phat un, Paul chun a kiang ah ding sepai zahotu kiang ah chun, “Thiamlo chansak hi nailo, Rom mi zia gual ah vok ding la tiu hi dan a hem?” ti’n a dong a.

²⁶Sepai zahotu chun zia chu a het phat in, a hotu lian kiang ah chun, “Bang a hem la bawl guat chu? Zia pa hi Rom mi ahi,” a vatia.

²⁷Ziaphatchun, sepai hotulian chu a hung a, Paul kiang in, “Rom mi la hi em? Ei hil in,” a tia. Ama chun, “I, ka hi,” a tia.

²⁸Sepai hotulian chun, “Zia tawh bang h’ina muna ding ah chun keima’nle dangka tampi ka la sên ahi,” a tia. Paul chun, “Kei chu a hisa pia’ng ka hi,” a tia.

²⁹Tichun, dot chian gawte chun a nusia tau a; sepai hotu lianpen in le Paul chu Rom mi ahi ti a het phat in a lau ah, a la kân ziak ah chun a lauthawng ta’n.

³⁰A jing in Judate’n a hêkna ziak uh chu a hetdaw theina dingin, a kolbu chu thap piak in, thiampu lalte leh vaihawmte chu a âng a hung dingin a ko khawm a. Ziaphatchun, Paul chu a pui suk ah, a âng un a din sak a.