Read Vaiphei NASEPTE 23 Bible Online

NASEPTE 23 - Vaiphei bible

NASEPTE 23

¹Paul chun, vaihawm pawlte chu en zing in, “Suapite haw, tu’ni tiang ah hin Pathian ma ah sia leh pha hetna thiang tak in ka um zing hi,” a tia.

²Ziaphatchun thiampu lianpen Ananiah chun a kiang ah dingpa kiang ah chun a mukno betpiak dingin thu a pia.

³Paul in, “Nang bâng kijutvampa, Pathian in nang hun bêng zaw ta hen! Dan dungzui ah ka chung thu ngaitua ding ah kichu hingal in, dan lo gual tak ah keima ei bêng dingin mi thu la pemaw?” a tia.

⁴A kiang ah mite chun, “Pathian thiampu lianpen bang ding ah lau lo ah vau ziang la hem?” a tiu a.

⁵Paul chun, “Suapite haw, thiampu lianpen ahi lam ka he pua ahi; ‘La chipite hotu chung ah thu phalo gen kin,’ ti zik ahi ngal a,” a tia.

⁶Paul chun amau chu a khenkhat Sadukaite, a khenkhat Pharisaite a hiu ti a het phat in, vaihawmna mun a chun a kiko a, “Suapite haw, keima hi Pharisai chapa, Pharisai mi ka hi. Tu’hin mithi thawkitna kinepna ziak ah hêk ah um ka hi,” a tia.

⁷Zia a gen phat ah chun Pharisaite leh Sadukaite chu a hung kikhen tau a; mipi chule a hung kilang khen ngal tau hi.

⁸(Sadukaite chun thawkitna, vansawlchâk ti leh thagau tite hi um dingin a gingcha puau a; himaleh Pharisaite chun zia cheng pathum chu a gingcha ngal un.)

⁹Nasa tak in a kiko veng vung tau ah, Pharisaite lak ah lekhazik khenkhatte chu langpan in, a hung dingdok ua: “Zia mi hi a mawna ka mu puau: Thagau a hem, vansawlchâk a hem in a kiang ah thu a la gen hi kha taleh, Pathian dodâl hi khai tiu,” a tiu ah, a nialkãl lam in a hung pang tau a.

¹⁰Kinialna sâng tak mai a hung suak phatin, sepai hotu lian chun Paul chu a puaitel khak ding uh lauthawng in, sepaite chu vachia suk ah, thagum hat ah vakaidok ziang dingin thu a pia, kulpi sung ah um dingin a pui lût tai.

¹¹Zia jan ah chun, Lalpa a kiang in a hung ding ah, “Hangsan tak in um in! Jerusalem khua ka thu la taklat gual hin Rom khua’n le taklang ding la hi,” a tia.

¹²Khawvak phatin Judate chu a kihoguu ah, kihaksial hial in, Paul thalup ahi masia bangma ne leh dawn lo dingin a kitiam tau a.

¹³Zia tawhbang ah kitiamna neite chu mi sawmli vâl a hiu a.

¹⁴Tichun, thiampu lalte leh upate kiang in a vachiau a, “Keimau leh keimau kihaksial in, Paul ka thalup masiau bangma ne leh dawn lo ding ka hiu.

¹⁵Tu’hin, nanghaw vaihawmte hin sepai hotulianpa kiang in, ama chung thu kim zaw diak ah dawp ding gual in, jing leh hun pui suk kit ding in hil unla, ama a hung phat leh, kei un a hung tun masang ah a la that ziang ding ah kisa zosa’n a la pang ing kau,” a tiu a.

¹⁶A la chân guk ding dan uh a gennau chu Paul suapinu chapa khat hin a la hegu ta’n, kul sung ah Paul chu a vahil a.

¹⁷Paul chun sepai zahotu pakhat a ko ah, a kiang in, “Zia tangval hi sepai hotu lianpen kiang ah khan pui tiam in a kiang ah gen ding a nei hi,” a tia.

¹⁸Tichun, ama chun a pui ah, sepai hotu lianpen kiang ah chun a pui lût a, “Paul suangkul ah umpa khan ei ko ah, zia tangvalpa hi la kiang ah pui dingin ei sawl ah, la kiang ah gen nop khat a nei hi,” a tia.

¹⁹Sepai hotu lianpen chun a khut in a tuk ah, a chuam in a puidok ah, a guk in, “Bang a hem ka kiang ah gen ding la nei chu?” ti’n a dong a.

²⁰Ama chun, “Jing leh Judate chun Paul hi a chanchin kim zaw diak ah dong nuam gual in vaihawmna hun pui suk dingin hung don ding a hiu a.

²¹Himaleh, a vaisawm uh chu a la pom kin, ama chânggu dingin mi sawmli hial kitiamna nei a um tau hi. Ziate chun Paul a thalup masiau bangma ne leh dawn lo dingin a kitiam tau hi. Tu’hin nangma ah kipat thu hung pawt ding chu ngâk in a um zing ui,” a tia.

²²Sepai hotu lianpen chun zia tangval chu pha tak in thu a vaithâk a, “Zia thilte lei hung gen hi ti kuama hiatsak kin,” ti’n a sawl mang tai.

²³Sepai hotu lianpen chun sepai zahotu pani a ko a: “Tu’hin, sepai zani siamtup unla, sakol chungchuang mi sawmsagi tawh, cheicha chawi mi za ni tawh, jan dak kua kipan ah, Kaisaria lam ah chia dingin kisau in.

²⁴Chuleh, Paul chuanna dingle sakol pakhat ngaituau inla, gam awptu Felik ma ah bit tak ah la vathak diu ahi,” a tia.

²⁵Zia gual hin lekha khat a zik a:

²⁶Keima Klaudia Lusia hin, gam awppa ja um tak Felik chibai ka hun bûk hi.

²⁷Zia pa hi Judate’n a man ua, that dingin a kisa hial tau ah; ama hi Rom mi ahi ti ka het ziakin sepaite ka pui a, ka vahukdok tau a.

²⁸Ama hi a hêkna ziak pen uh het ka nop ziakin, mipi vaihawmna mun ah ka dinsak a.

²⁹A dan thu ziak ua a hêk uh ahi ti ka he ta’n; himaleh, ka dawp chian leh, ama hin thina ding leh kolbuna ding hial ah a hi’khial bangma ka mu puai.

³⁰Ahi’n, Judate ama that ding ah kitiam zet ah chânggu pawl a um ui ti, ei hil phat un, a kinthei pen ah nang kiang ah ka hun sawl ziang ahi; chuleh, ama hêkte hawle nangma kiang ah a hêkna thuu hung gen zaw dingin thu ka pia zaw tai, ti’n a zik a.

³¹Tichun, sepaite chun thupiak gual ah chun Paul chu a pui ua, a jan a jan in Antipatri lam ah a pui tau a.

³²A jing ah chun, sakolchungchuang sepai te chu tawh a kiton ua, a dang cheng chu a hung vaikit tau ah, a kul uh a tung kit pai tau hi.

³³Kaisaria a tun phat un, gam awppa kiang in a lekha puak uh chu a piau a, Paul le a kiang in a pedok tau a.

³⁴Gam awppa chun lekha chu a sim ah, khoi gam mi leh bang mi ahi a dong a. Kilikia mi ahi chu a het phat in,

³⁵“Nangma hun hêkte a hung tun tak ua leh, la thu chu ngaithâk tak tak hi hen,” a tia. Tichun, ama chu Herod Inpi ah vêng bit dingin thu a pia tai.