Read Vaiphei NASEPTE 24 Bible Online

NASEPTE 24 - Vaiphei bible

NASEPTE 24

¹Ni nga nung ah chun, thiampu lianpen Ananiah chu upate tawh dan lam thiam tak, Tertula a tiu tawh a hung tung suk ua, gam awppa âng ah Paul a hêkna thuu a hun tut tau a.

²Paul chu a hun puidaw phat un, Tertula chun a hêkna thuu chu a gen a: Ja um tak, la phatna nasa tak ka don ziak un thamuang tak in ka la um tau a, la thiamna jal in zia gam leh namte â ding hin thilpha tam tak la la bawl tâk ziakin, ka hun pakchau hi.

³Muntin leh hun tin ah ka hun kipakpi ma mau hi.

⁴Ahi’n, hun sukbuai sawt ka nop lo ziak un, zia thu tawmcha ka hun gen ding hi jangai tak ah ei ngaithâk piak dingin ka hun ni hi.

⁵Zia pa hi mi subuai leh lau um tak ahi’n, khawvel pumpi Judate lak ah buaina bawldok vet sek, Nazareth pawl ah a mapui pen a hi ti kichian tak in ka he tau hi.

⁶Zia ban ah chun tempul le sukbuak a gua’n, zia lai tak ah chu kiman ahi.

⁷Himaleh, sepai hotulian Lusia chu a hung ah, ka khut ua kipat thagum hat ah a puidaw ahi .

⁸Tu’hin nangma ngei in le dawpchian in la tin; ka hêkna thuteu hi he suak thei ngal dingin ka hun kineppiu hi, a tia.

⁹Judate chunle zia thu chu a dik hi ti’n a panpiu a.

¹⁰Gam awppa chun Paul chu a vak khutjap phatin, Paul in zia gual hin a hun gen a: “Kum tam tak zia namte leh gamte ah hin vai la hawm tai, ti ka he, tu’hin zia tak ah ka thiamna thu gen thei ding ah ka um ziak hin ka kipak hi.

¹¹Zia thilte hi nangma ngei inle hethei ziang in la tin, ni sawm leh ni le a vâl nai pua’n. Jerusalem ah Pathian ho dingin ka hang chia a.

¹²Khawpi sung leh sunagog hihen la, tempul sung hitaleh, mipi tawh kinial ah, ka sukbuaina him him a um puai.

¹³Tu’ ei hêknau hile a chetna ding nei diak pua’n au.

¹⁴Ahi’n, tu’hin, zia hi la kiang in ka puang ahi: Dan leh Jawlneite lekhabu ah kizikte kha ka gin ziakin, I pu leh pateu biak Pathian chu bia’n, amau in a diklo ah a ngai uh, zia Lampi hi ka zui ahi.

¹⁵Pathian lam ah kineppi pen, zia chu amau hawnle a ginchak tho uh, midik leh midiklote thawkitna thu hi a dik ngei hi ti keima’n le ka gin ahi.

¹⁶Zia thu hin ka sia leh pha hetna ziakin Pathian lam leh mihing lam inle theitawp ah panpi dingin ka kisa him ahi.

¹⁷Tu’hin kum bang a hem jat nung in, ka chipite â ding ah thilpiak leh thillat chu pua’n ka hung a.

¹⁸Zia thil chu ka lat lai in, mipi umlo leh buai lo in, tempul ah kithian sak ah um in ei hung muu a.

¹⁹Himaleh, zia tak ah chun Asia gam ah Juda mi kuate a hem a um un, ziate lawi chun ka chung ah thubuai a nei ua leh, la ma ah hin ei hung hek ding uh hileh kilawm tak ahi’n.

²⁰Ahiloleh, zia mite ngei hin, vaihawmte ma ah ka din lai in ka thil hi’khial a muu em gen uh hen la,

²¹amau ma ah kiko ah, mithi lak ah kipat thawkitna thu kam khat ka gen ziak ah, tu’ni la ma ah hêk ah um ka hilo ngal leh, bangma gen ding a nei puau hi,” ti’n a gen a.

²²Felik chun zia thute chu a het phat in, Lampi chung thu a la he ma ma ta ahiziak in, amau haw chu a peljaksak a, “Sepai hotulian Lusia a hung tak leh la thubuai uh hi genchian gua’ng ka,” a tia.

²³Ziaphatchun, sepai zahotu chun Paul pha tak ah vêng kawm ah, zalen tak ah umsak ah, a gual leh paite’nle a hung ve thei ding ua umsak dingin thu a pia tai.

²⁴Ni bang jat a hem zaw chun, Felik chu a ji Juda numei Drusila tawh; Khrista Jesu ah ginna thu chu a het nop ziak un, Paul chu kosak in a gensak tau a.

²⁵Paul in dikna thute, kisûmna thute, vaihawmna hung tung ding thute pha tak ah a gen phatin, Felik chu a kithing hial a, “Chia kit phot in; hun lemchâng ka nei phat leh hun ko kit ing ka,” a tia.

²⁶Chuleh, Paul in dangka a piak le a kinep ziakin a ko sek ah, a kihopi veu sek hi.

²⁷Himaleh, kum ni nung in, Porkia Festa chun Felik a hun sâng ta’n; tichun, Felik chun Judate kiang ah min phat a dawi ziakin Paul chu suangkul in a nusia tai.