Read Vaiphei NASEPTE 28 Bible Online

NASEPTE 28 - Vaiphei bible

NASEPTE 28

¹Dam tak ah mualkâng ka gâl kai phat un, tuikual gam chu Malta ahi ti ka he tau a.

²Zia gam mite chun ei mu phât un, pha tak in ei la khawtuau a. Gawzuk ziakin a dap ten ah, mei a hun sêm ua, mitin in ei la lop ua.

³Paul chun thing lom khat a chom ah, mei lak ah a vak ti leh, a sat phatin gûl pakhat a hung pawt ah, a khut in a kikhâi ziang ta.

⁴Zia gam ah mite chun a khut ah gûl kikhâi chu a mu phât un, “Zia pa hi tualthat hi ngei ngei in ah; tuisuagiat ah kipat suakcha leh le, phuba lapa chun a hin ding a phal ma ma lo hi’n a,” a tiu a.

⁵Himaleh, ama chun mei lak in a thingtha, bangma a ti him him puai.

⁶Ahi’n, amau chun a gu’n a jel suak phat leh thakhat ah kipuk intin, thi ziang in ah, ti gingchan a la en zing ua; himaleh bang chan a hem a et nung unle bangma a ti him him ta pua; a ngaidan uh chu a hung kisâng ah, pathian khat hi’n a, a ti tau a.

⁷Zia tuam vêl ah chun, zia gam ah mi minthang pakhat lou gam nei a um a, zia pa min chu Publias ahi; ama chun ei la lop ma ma ah, ni thum sung chu kipak tak in ei zintun a.

⁸Publias pa chu khawsik leh santen vei in a um a. Paul chu a kiang in a valût ah, a pauchap ah, a chung in a khut a nga, a hi’dam tai.

⁹Zia thu chu a het phat un mi dang le a hung ua, zia gam ah damlo hung taphotte chu sukdam in a um chiat tau a.

¹⁰Amau chun nasa tak in ei jau ah; ka kipatdaw kit ding phat ua chun, ka mamaw thilteu chu ei piau a.

¹¹Tha thum nung ah chun Aleksandria Long pakhat, phalbi sung a la châm, pathian kiphîk tepte’na nei Long ah chun ka chuang ua, ka kipandok kit tau a.

¹²Zia kipat chun Sirakius ka tung ua, ni thum ka châm malam kit ua.

¹³Zia kipat chun ka kitawl kit ua, Rhejiam ka kitawl tung tau a. Zia zaw ni khat nung ah chun simlam hui a hung hang kit ah, a jing in Puteoli ka tung ua.

¹⁴Zia tak ah chun unaute ka muu ah, a kiang un ni sagi nichuang dingin ei tho un. Tichun, Rom ka tung tau hi.

¹⁵Zia tak ah chun unaute’n ka umdan uh a het phat un, zia kipat chun Appia Vaihawmna mun leh Khualbûk Pathum tiang ah ei dawn dingin a hung tau a. Paul in zia haw chu a mu phât in Pathian kiang in kipak thu a gen ah, a lungmuang tai.

¹⁶Rom ka tun phat un, Paul chu sepai pakhat a vêng ding a guat chuam uh chu tawh, a nop dan dan ah umsak dingin a phal piak tai.

¹⁷Chun, ni thum zaw in Paul chun Juda upate a ko khawm a. A hung khawm phat un a kiang un, “Suapite haw, mipi siatna ding leh, dan lo gual leh I pu leh pateu dan thu bawsiatna ka neilo sapi’n Jerusalem ah kipat Rom mite khut ah suangkul ngâksa piakdaw in ka um a.

¹⁸Amau chun pha tak ah ei dawpchet nung un, ka thina ding hial bangma a hepuau ah, ei thâ daw le a nuam un.

¹⁹Himaleh, Judate’n a nialkãl ziak un, Lengpa Kaisar kiang tutsawn dingin ka kisa ta’n; zia hi ka chipite ka hêkna vang ahi puai.

²⁰Zia ding ah hin ka hun ko khawm la hiu hi, eimau I kimutuau ah I kihotua theina ding un; keima hi Israelte kinepna thu ziak ah thik khau ah kân ka hi bep hi,” tia.

²¹Amau chun a dawnhuu ah, “Nangma chungchâng ah hin Judea gam ah kipat lekha ka la mu puau a, unaute a hung sunte’n le nang demna thu bangma a gen kha puau hi.

²²Himaleh, tu’hin, la ngaidan khenkhat hetnop um ka sau hi; zia pawlte chanchin hi a gensiatnau ka la hekha sek ngal un,” a tiu a.

²³Ni a tiam tau ah, zia ni chun a tunna In ah mi tam tak a hungkhawm tau ah. Jingkal ah kipat nitâk tiang in zia thu chu a hilchian ah, Pathian gam thu chu gen in, Mosi Dan leh Jawlneite lekhabu thu ah kipat in, Jesu chungchâng ah thuzaw a gua’n.

²⁴A khenkhat in a thugen chu a gingchau ah, a dangte chun a gingcha puau a.

²⁵Tichun, a kithutuak theilo phat un, a peljak masang un Paul in thu kam khat a gen a, Thagau Thiangtho in jawlnei Isai mang ah la pu leh pateu kiang ah a la gen kha a dik ngei hi:

²⁶Zia mite kiang ah hin chia’n la, a kiang un: Het chu hia’n la tiu in, himaleh, hethiam thei pua’n lau, mu chu mu’n la tiu in, himaleh, muchian tak tak diak pua’n lau.

²⁷Zia mite lung hi a la tâk ta’n, a bil uh a la ngong ah, a mitteu le a si’ng un, achutilo leh a mit un mu’n tiu in, a bil un hia’n tiu in, a lung unle he ta’n tiu in, kihei kit intiu in, Keima’n a la hi’dam kha ding ka hi, ti hi.

²⁸Ziaziakchun, zia hi he tau in, zia Pathian hukdamna hi Jentelte kiang ah sawl a hita’n, amau chun a la ngai ta’n au, a tia.

²⁹Zia a gen zaw phat ah chun Judate chu a peljak tau ah, nasatak in a kinial tau hi .

³⁰Tichun, Paul chu kum ni sung hial chu ama In kisân in a um ah, a kiang ah mi vachia kha tapote chu a la lop sek a,

³¹a kiang un Pathian gam chanchin leh Lalpa Jesu Khrista chanchin umjia chu hangsan tak leh a dâl umlo in mite a zilsak sek tai.