Read Vaiphei NASEPTE 3 Bible Online

NASEPTE 3 - Vaiphei bible

NASEPTE 3

¹Ni khat Peter leh Johan chu pauchap hun; zia chu nitâk lam dak thum ahi’n, tempul ah a chia to un.

²Pawsal pakhat, a pian ah kipat kengbai a hun paw lut ua. Ama chu nisi’n leh Kêlkot Mêlpha a ti’na mun ua chun, mite’n a hung sial sek un; ama chun tempul ah lut dingte kiang ah chun khut a la daw sek a.

³Ama chun, Peter leh Johan tempul ah chia chu a mu phât in, a kiang un khut a la daw a.

⁴Peter leh Johan chun ama chu a en zing un, a kiang in, “Kei uh ei hun en in,” a tiu a.

⁵Ama chun bang a hem khat ei pia ding hi’n au ti kinem in a en zing a.

⁶Himaleh, Peter chun a kiang in, “Dangka leh sana ka nei puai; ahi’n la, ka neisun hun pia’ng ka: Nazareth Jesu Khrista min in dingdok in la, lam zawt ta’n,” a ti’n.

⁷Chun, a khut changlam in a tu, a kaitho ta’n; thakhat in a kengte leh a âkkhawmit gute chu suk-hat ahi ngal tai.

⁸A kichawmdok ah, a hung ding ah, lam a hun zawt tai; chun, chia kawm ah kichawm in Pathian a pâk a, tempul ah chun a lut khawm tau hi.

⁹Mipi zosia’n ama lamjawt leh Pathian pâk chu a muu a,

¹⁰ama chu tempul Kêlkot Mêlhoi bul ah khutdaw sekpa kha ahi ti a he chiat tau ah; a chung ah thil tung ziak ah chun mak sakna leh lamdang sakna’n a dim tau hi.

¹¹Ama chun Peter leh Johan chu a tuchak zing ah, mipi chun maksa’n, hulliap, Solomon Hulliap kiti ah chun a hung taikhawm sau sau tau a.

¹²Peter in zia chu a mu phât in, mipite kiang ah chun thu a hun gen ah, nanghaw, Israel mite haw, bangatia zia hi lamdang sa leh keimau thilhitheina a hem, thianthona ziak a hem ah lam ka zawtsak gual ua chuti etnop ziang la hiu em?

¹³Abraham, Isak leh Jakob Pathian, I pu leh pateu Pathian chun a suak Jesu chu a choisa’n ahi tai; ama chu la la pedok un, Pilat in thâdaw a guat lai ah khan a ma-âng in la la kihiatlosak tau a.

¹⁴Mithiangtho leh dik tak chu doi lo in, tualthat pakhat la kiang ua piak dingin la don zawu a;

¹⁵Hinna Siampa chu la that un, Pathian in ama chu thina ah kipat in a kaitho tai. Zia chu keimau hi a hiatpitute ka hiu hi.

¹⁶Ama min chu zia mipa hin a gin ziakin, a min ngei ah chun zia pa, la muu leh la het uh hi, a suhat ta ahi; tichun, Jesu a ginna ah chun ama chu la leng ua mit mu in damna bukim a pia ta ahi.

¹⁷Tu’hin, suapite haw, nangmau leh la hotuteu in la mawlna ziak bep un, zia thilte chu la la hi’khâk uh ahi, ti ka hia’i.

¹⁸Himaleh, Khrista chun zia thilte chu thuak ngei ding ahi, ti Pathian chun a jawlneite zosia mang in a la hillawk ah, zia gual tak ah chun a guitung ta ahi.

¹⁹Ziaziakchun, la gitloteu thaimang ah a umtheina dingin la lung uh hei unla, Pathian kiang lam ah hung kinung hei kit un;

²⁰tichun, Lalpa kiang ah kipat hihalna hung tung thei in a; tichun, nangmau â ding ah kiguat Messiah, zia chu Jesu ahi’n, hun sawl ding ahi.

²¹Khawvel siamtil ah kipat Pathian in a jawlneite kam ah a la gensa gual khan, bangkim siamthak hun a hung tun masia, ama chu van ah um tadi ding ahi.

²²Mosi khan, nangmau mite lak ngei ah kipat in, nang uh â ding jawlnei, keima tawhbang pakhat Lalpa la Pathian uh chun hun tungdok intin. Ama’n la kiang ua a gen taphot chu la ngaithâk diu ahi.

²³Chuleh, kuale zia jawlnei thugen ngaisak lo taphot chu, mipite lak ah kipat in hi’mangthai dim dem ah um ding a hiu, a ti ta kha.

²⁴Chuleh, jawlnei zosia, Samuel ah kipat a nung ah hung um te tawh, thu a la gen kha taphot chun, zia nite hi a la genlawk tau ahi.

²⁵Nanghaw hi, zia jawlneite leh Pathian in la suanpateu kiang ah thuthung a la piak suante chu la hiu hi; ama chun Abraham kiang in, La suante ah chun lei ah namtinte maljawl ah um ding a hiu, a la ti’n.

²⁶Pathian in a suak chu a tundaw lai in, la bawsiatnateu la hun haisan ua, a hun maljawl kit theina dingin, nanghaw kiang in a hun sawl masa ahi, ti’n a gen a.