Read Vaiphei NASEPTE 4 Bible Online

NASEPTE 4 - Vaiphei bible

NASEPTE 4

¹Peter leh Johan in mite kiang ah thu a gen lai ua chun, thiampute, tempul hotute leh Sadukaite chu a kiang un a hung un.

²Mi a hil ziak uh leh, Jesu ah chun mithi lak ah kipat thawkitna a um hi ti thu a hil ziak un, a lungawi pua ma mau a.

³Tichun, amau chu a man ua, nitâk ahi tâk ziakin, a jing tiang dingin a hên tau a.

⁴Himaleh, thu ngaithate lak ah tam tak chun a ging tau ah; a tam lam uh chu sang nga vêl a hiu hi.

⁵A jing ah chun, a vaihawmteu, a upateu leh a lekhazikteu chu Jerusalem ah a hung khawm un,

⁶thiampu lianpen Anna tawh Kaiapha, Johan tawh Aleksander, chuleh thiampu lianpenpa Inkuan ah mi zosia tawh le a hiu a.

⁷Mat ah umte chu a lak un a din sak ua, “Zia hi kua thilhitheina leh kua min mang ah la bawl uh a hem?” ti’n a dong ua.

⁸Ziaphatchun, Peter chu Thagau Thiangtho ah dim in, a kiang un, “Mipi vaihawmte leh upate haw,

⁹mi damlo pakhat chung ah thilpha ka bawl ziak ua, bangtidan ah sukdam ah hung um a hem, ti thu dot ah um ka hiu chun,

¹⁰la leng un, Israel mi zosia’n a la he tau in: Zia pa hi damna tawh la ma-âng ua a din thei hi; Nazareth Jesu Khrista, la khetden uh, Pathian in thina kipat a kaithawpa min ziak chu ahi.

¹¹Zia Jesu chu, ‘Nanghaw Insa mite’n la suang doi lo uh kha; a kil ah suang poimaw pen in a hung pang tai,’ a tia.

¹²Midang kuama kiang in hukdamna a um puai, van nuai mihing minsak lak ah ei hukdam thei ding min dang piak in a um pawngal a,” a ti’n.

¹³Peter leh Johan hânsan dan chu a muu in, amau la lekha helo a hiu ti a het phat un, lamdang a sa ma mau a; Jesu tawh kithua sek ahi ngei ui ti a he tau a.

¹⁴A mi sukdampau a kiang ua ding zing chu a mu zing ua, a nialna ding un bangma a gen thei puau a.

¹⁵Tichun, amau chu vaihawmna ah kipat chun a sawldok phot ua, amau ngawn a kiho tau a.

¹⁶Amau chun, “Zia mite hi bang law ding I hi tau em? Thilmak tepte kham tak a bawl ui ti hi Jerusalem ah chêng zosia’n a hiau a, zia chu kihiatlosak thei I hi puau hi.

¹⁷Himaleh, zia hi mipite lak ah a kithan sawn lona dingin, amau hi vau lau hitiu in, zia min ahi bangma ahi tâk lona ding un,” a tiu a.

¹⁸Tichun, amau chu a ko lut ua, Jesu min ah thu gen talo ding leh, thu hil talo hial dingin thu a piau a.

¹⁹Himaleh, Peter leh Johan chun a dawnhuu ah, “Pathian mit mu ah chun Pathian thu mat sâng ah nang uh thu mat jawk chu dik ding a hem, ti hi ngaituau in;

²⁰ka thil muu leh het uh chu gen lo thei ka hi puau hi,” a tiu a.

²¹A vau lau kit zaw un, a thâdok tau a; mipite ziak ah chun amau gawttheina ding lampi a muthei puau ah, thiltung te ziak ah chun mipi zosia chun, Pathian a pâk tangal un.

²²A chung ah sukdamna tepte’na a bawl piak pau chu, kum sawmli sâng ah upa zaw ahi tangal a.

²³Thâdaw ahi phat un, a lawiteu kiang in a chiau ah, thiampu lalte leh upate’n a kiang ua a genteu chu a hil tau a.

²⁴Zia thute chu a het phat un, kithu gual tak leh aw ngai tak in, Pathian kiang in, “Thunei pen Lalpa, nang, lei leh van leh tuisuagiat leh a sung ah um zosia siampa,

²⁵nang in Thagau Thiangtho ah chun, ka suantupau, la suak David kam in, ‘Bangatia Jentelte chu lungna, mipite chunle thil phalo ngaitua a hiu em?

²⁶Lalpa leh a Messiah dodâl dingin, lei ah lengte chu a hung dingdok un, lalte chule a hung kikhawm tau hi,’ la ti gual ah khan.

²⁷Zia khawpi sung ah hin, ahi, Herod tawh Pontia Pilat ngei le, Jentelte leh Israel mite chu tawh, la suak thiangtho Jesu, sathau la nu’sa chu dodâl dingin a kikhawm tau a,

²⁸la khut leh la lemguatna ah la guatlawk taphot chu, hung guitun sak ding in.

²⁹Tu’hin, Lalpa, a vaunateu hi en inla, la suakte hi hangsan tak in la thute chu gensak inla;

³⁰mite hi’dam dingin la khut jakdok inla; la suak thiangtho Jesu min ziakin, tepte’nate leh thilmakte bawldawsak in,” a tiu a.

³¹A pauchap zaw phat ua chun, a kikhopkhawmnau mun chu a hung kilîng ah; a leng un Thagau Thiangtho in a hung dim tau a, hangsan tak in Pathian thu a gen tau hi.

³²A gingte zosia chu lungthim leh ngaituana munkhat in a um un; a lak ua kuama’n a thil neiteu chu, kei â chuam ahi tilo in, a thil nei zosiau a kikop sek ui.

³³Sawlchâkte chun thilhitheina lopi tak tawh, Lalpa Jesu thawkitna thu chu a dinpi sek un; a leng ua chung in doisakna nasa tak a um a.

³⁴A lak un kuama a tasam a um puau hi; gam leh In nei tapo in a zuak ua, a man chu a hun chawi khawm ui.

³⁵Apostolte keng bulin a hun koikhawm sek un; mitin a mamaw dungzui jel un a hawm piak sek ui.

³⁶Levi mi pakhat, Kupra mi, Joseph kiti a um in, ama chu apostolte’n Barnaba (zia chu, Thamuanna chapa, ti’na ahi,) a tiu a.

³⁷Ama chun gam a nei chu a zuak ah, a dangka chu hun chawi in, apostolte kengbul in a hung koi ta’n.